لُكِ 6:35-49

³⁵كْنْ وٌ تَن شَ وٌ يَشُييٍ شَنُ. وٌ شَ قٍ قَنيِ نَن نَبَ. وٌ شَ دٌنِ تِ، هَلِ وٌ مُ لَشِ عَ قِقٍ رَ. نَ كُي، وٌ بَرَايِ فبٌمَ نّ، وٌ قِندِ عَلَ شِلِ شُنفبٍ كَنيِ شَ دِيٍ رَ، بَرِ مَ عَ تَن قٍ قَنيِ رَبَمَ قِنسِرِوَلِيٍ نُن مِشِ كٌبِيٍ بّ.

³⁶وٌ قَن شَ كِنِكِنِ مِشِ مَ، عَلْ وٌ بَبَ عَلَ كِنِكِنِمَ مِشِ مَ كِ نَشّ.»

³⁷«وٌ نَشَ وٌ يّتّ قِندِ وٌ بٌورٍ عَدَ مَ كّوَلِيٍ مَكِيتِمَ رَ، عَلَكٌ كِيتِ نَشَ قَ كَنَ وٌ قَن نَ عَلَ يِ. وٌ نَشَ مِشِ مَكِيتِ كِيتِ شْرْشْي رَ، عَلَكٌ وٌ قَن نَشَ مَكِيتِ كِيتِ شْرْشْي رَ. وٌ دِحّ مِشِ مَ، عَلَكٌ عَلَ شَ دِحّ وٌ قَن مَ.

³⁸وٌ مِشِ كِ، عَلَكٌ عَلَ قَن شَ وٌ كِ. وٌ كِمَ كِ نَشّ، عَ لُمَ نّ عَلْ مَالٍ نَ مَنِيَ، عَ مَنِيَسٍ رَقٍ عَ قَنيِ رَ، مَالٍ مَدّتّن، عَ شّيّ شّيّ، ندٍ مَن قَ سَ عَ شُن هَن عَ قِلِ عَ مَ. نَ كُي، وٌ مَنِيَسٍ نَشَن نَوَلِمَ بٌورٍيٍ بّ، نَ نَن نَوَلِمَ وٌ قَن بّ.»

³⁹عِسَ مَن نَشَ يِ تَالِ وْيّنيِ قَلَ عٍ بّ، «دْنشُي نْمَ شُلِ سُشُدٍ دْنشُي بّ يِرٍ؟ عَ دِ، عٍ قِرِن بِرِن مُ بِرَ مَ شّ يِلِ كُي؟

⁴⁰تَالِبِ مُ دَنفِمَ عَ كَرَ مْشْ رَ، كْنْ تَالِبِ نَشَن بِرِن نُ فّ عَ مَتِنكَندٍ، عَ لُمَ نّ عَلْ عَ كَرَ مْشْ.»

⁴¹«مُنقٍ رَ عِ وُرِ قُحِ تٌمَ عِ نفَشَكٍرٍنيِ يَ مَ، عَ قَ لِ عِ مُ شٍبٍنيِ تٌشِ نَشَن نَ عِ تَن يّتّ يَ مَ؟

⁴²عِ نْمَ عَ قَلَدٍ عِ نفَشَكٍرٍنيِ بّ دِ، ‹عَ لُ ﭑ شَ نَ وُرِ قُحِ بَ عِ يّتّ يَ مَ،› عَ قَ لِ عِ تَن مُ شٍبٍنيِ تٌشِ نَشَن نَ عِ تَن يَ مَ؟ عِ تَن قِلَنكَقُي، شٍبٍنيِ نَن سِنفٍ بَ عِ يَ مَ! نَ بَ شَنبِ، عِ نْمَ نّ سٍ عِفبّدٍ عَ قَنيِ رَ، عَلَكٌ عِ شَ وُرِ قُحِ بَ عِ نفَشَكٍرٍنيِ قَن يَ مَ.»

⁴³«سَنسِ قَنيِ مُ نَ نَشَن بٌفِ كٌبِ رَ مِنِمَ، سَنسِ كٌبِ قَن مُ نَ نَشَن بٌفِ قَنيِ رَ مِنِمَ.

⁴⁴سَنسِ بِرِن كٌلٌنمَ عَ بٌفِ نَن مَ. شْرّ مُ بَمَ تُنبٍ بِلِ رَ، كُسُ قَن مُ بَمَ بَافِ بِلِ كْن نَ.

⁴⁵قٍ قَنيِ تٌ رَفَتَشِ مِشِ قَنيِ بْحّ كُي، عَ قٍ قَنيِ نَن نَمِنِمَ. قٍ كٌبِ تٌ رَفَتَشِ مِشِ كٌبِ بْحّ كُي، عَ قٍ كٌبِ نَن نَمِنِمَ. نَشَن نَ فبٌ مِشِ بْحّ كُي، نَ نَن دْنشْي مِنِمَ عَ دّ عِ.»

⁴⁶«مُنقٍ رَ وٌ ﭑ شِلِمَ ‹ﭑ مَرِفِ، ﭑ مَرِفِ،› كْنْ وٌ مُ ﭑ شُي رَبَتُمَ؟

⁴⁷مِشِ يٌ قَ ﭑ مَ، عَ ﭑ مَ مَسٍنيِ رَ مّ، عَ قَ عَ رَبَتُ، وٌ وٌ تُلِ مَتِ ﭑ شَ عَ مَسٍن وٌ بّ نَ كَنيِ مَنِيَشِ مِشِ نَشَن نَ.

⁴⁸عَ مَنِيَشِ بَنشِتِ نَن نَ، نَشَن بْشِ فٍ هَن عَ سَ قَنيٍ لِ، عَ قَ عَ شَ بَنشِ بِلِ تِ نَ قَنيٍ قَرِ. لْشْ ندٍ، شُرٍ نَشَ بَنبَرَن يّ هَن عَ دِن بَنشِ مَ، كْنْ عَ مُ نْ سٍسٍ نِيَدٍ عَ رَ، بَرِ مَ عَ نُ تِشِ عَ قَنيِ رَ.

⁴⁹كْنْ مِشِ يٌ نَشَن ﭑ مَ مَسٍنيِ رَ مّ، عَ قَ لِ عَ مُ عَ رَبَتُ، نَ كَنيِ تَن مَنِيَشِ شّمّ نَن نَ نَشَن بَنشِ تِ بْشِ قَرِ مَ، بِلِ مُ عَ بّ. شُرٍ تٌ بَنبَرَن، عَ دِن بَنشِ مَ، عَ نَشَ عَ رَبِرَ كٍرٍن نَ، بَنشِ نَشَ كَنَ عَ حَاشِ رَ.»