لُكِ 20:6-41

⁶كْنْ شَ وٌن نَ عَ يَابِ، ‹عَدَ مَ،› حَمَ بِرِن وٌن مَفْنْمَ نّ عٍ شَ وٌن قَشَ، بَرِ مَ عٍ لَشِ عَ رَ عَ نَمِحْنمّ نَن نُ يَيَ رَ.»

⁷نَ كُي، عٍ نَشَ عَ يَابِ عَ عٍ مُ عَ كٌلٌن نَشَن يٌ يَيَ شّيشِ.

⁸عِسَ نَشَ عَ مَسٍن عٍ بّ، «ﭑ قَن مُ عَ قَلَمَ وٌ بّ ﭑ يِ قٍيٍ رَبَمَ نَشَن مَ يَامَرِ مَ.»

⁹نَ شَنبِ، عِسَ نَشَ سٌ يِ تَالِ وْيّنيِ مَسٍنقٍ حَمَ بّ. «شّمّ ندٍ نَشَ وّنِ بِلِيٍ سِ. عَ نَشَ نَ هّرِ بْشِ رَوَلِيٍ مَ، عَ قَ بِيَاسِ شْنكُيٍ رَ مِنِ.

¹⁰وّنِ بٌفِ بَ تّمُي تٌ عَ لِ، بْشِ كَنيِ نَشَ كٌنيِ ندٍ شّي بْشِ رَوَلِيٍ شْن مَ، عٍ شَ وّنِ بٌفِ ندٍ سٌ عَ يِ رَ. كْنْ بْشِ رَوَلِيٍ نَشَ نَ كٌنيِ بْنبْ، عٍ عَ رَفبِلٍن عَ بّلّشّ عِفٍلِ رَ.

¹¹بْشِ كَنيِ مَن نَشَ كٌنيِ فبّتّ شّي. عٍ نَشَ نَ قَن بْنبْ، عٍ عَ كٌنبِ عَ مَيَافِشِ رَ، عٍ عَ رَفبِلٍن عَ بّلّشّ عِفٍلِ رَ.

¹²بْشِ كَنيِ نَشَ عَ سَشَن ندٍ مَن شّي. عٍ نَشَ نَ قَن مَشْنْ، عٍ عَ كٍرِ.»

¹³«نَ كُي، بْشِ كَنيِ نَشَ عَ قَلَ، ‹ﭑ مُنسٍ رَبَمَ قَ؟ ﭑ شَ ﭑ مَ دِ مَشَنُشِ نَن شّي. تّمُندٍ، عٍ قَمَ نَ تَن بِنيَدٍ.›

¹⁴كْنْ بْشِ رَوَلِيٍ تٌ عَ تٌ، عٍ نَشَ عَ قَلَ عٍ بٌرٍ بّ، ‹يِ نَن نَ كّ تٌنفٌمَ رَ. وٌن نَ عَ قَشَ عَلَكٌ كّ شَ قِندِ وٌن فبٍ رَ.›

¹⁵بْشِ رَوَلِيٍ نَشَ عَ رَ مِنِ بْشِ رَ، عٍ سَ عَ قَشَ.» «نَ بْشِ كَنيِ مُنسٍ رَبَمَ قَ؟

¹⁶عَ سِفَمَ نّ نَا، عَ نَ بْشِ رَوَلِيٍ قَشَ، عَ عَ شَ بْشِ سٌ مِشِ فبّتّيٍ يِ.» حَمَ تٌ نَ مَسٍنيِ مّ، عٍ نَشَ عَ قَلَ، «عَستْقُلَهِ!»

¹⁷كْنْ عِسَ نَشَ عَ يَ تِ عٍ رَ، عَ عٍ مَشْرِن، «يِ نَشَن سّبّشِ كِتَابُي كُي، عَ قَ قَسَرِ مَ دِ؟ ‹بَنشِتِيٍ مّي فّمّ نَشَن نَ، عَ بَرَ قِندِ تُشُي فّمّ هَفِفّ رَ.›»

¹⁸«نَشَن بِرَ مَ نَ فّمّ مَ، عَ عِفِرَ مَ نّ. نَ فّمّ بِرَ مَ نَشَن مَ، نَ قَن بُتُشُنمَ نّ.»

¹⁹سّرِيّ كَرَ مْشْيٍ نُن سّرّشّدُبّ كُنتِفِيٍ نَشَ عَ كٌلٌن عَ عِسَ يِ تَالِ وْيّنيِ مَسٍنشِ عٍ تَن نَن بّ. عٍ نَشَ كَتَ عٍ شَ عَ سُشُ كٍرٍن نَ، كْنْ عٍ فَاشُ حَمَ نَن يَ رَ.

²⁰عٍ نُ وَ مَ نّ عٍ شَ عَ سَ فٌمِنَ بّلّشّ، عَ شَ لُ عَ تَن نَن شَ نْي بُن مَ. نَ كُي، عٍ نَشَ عِسَ رَبّن، عٍ مِشِ ندٍيٍ شّي عَ يِرٍ عٍ شَ عٍ يّتّ قِندِ تِنشِنتْييٍ رَ، عٍ شَ سَ عِسَ مَسْتْ عَ شَ وْيّنيِ كُي.

²¹نَ كُي، عٍ نَشَ عِسَ مَشْرِن يِ مَسٍنيِ مَ، «كَرَ مْشْ، مُشُ عَ كٌلٌن عِ شَ مَسٍنيِ تِنشِن. عِ مُ مِشِ عٍ رَقِسَمَ عٍ بٌرٍ بّ، عِ عَلَ شَ كِرَ مَسٍنمَ عَ نْندِ كِ مَ.

²²عَ لَنمَ كَ عَ مُ لَنمَ مُشُ شَ دُوتِ قِ رْ مَ مَنفّ مَ؟»

²³كْنْ عِسَ تٌ نُ عٍ شَ كْوتَ كٌلٌن، عَ نَشَ عٍ يَابِ،

²⁴«وٌ فبٍتِ كْبِرِ كٌلٍ مَسٍن ﭑ بّ. ندٍ شِلِ نُن مِسَالِ نَ عَ مَ؟» عٍ نَشَ عَ يَابِ، «رْ مَ مَنفّ.»

²⁵عَ نَشَ عَ مَسٍن عٍ بّ، «وٌ مَنفّ فبٍ رَفبِلٍن مَنفّ مَ، وٌ عَلَ قَن فبٍ رَفبِلٍن عَلَ مَ.»

²⁶نٍيٍ قَن مُ نْ عَ مَسْتْدٍ عَ شَ وْيّنيِ كُي، حَمَ بِرِن يَ شْرِ. قٌ عٍ تٌ كَابَ عَ شَ يَابِ مَ، عٍ سَبَرِ.

²⁷سَدُ سٍنِيٍ، نَشٍيٍ عَ قَلَمَ عَ قَشَمِشِيٍ مُ كٍلِمَ قَشّ مَ، عٍ نَشَ قَ يِ مَشْرِنيِ رَ عِسَ شْن مَ،

²⁸«كَرَ مْشْ، عَننَبِ مُنسَ يِ نَن سّبّشِ مُشُ بّ كِتَابُي كُي، ‹شَ شّمّ ندٍ تَارَ قَشَ، عَ نَشَ عَ شَ فِنّ لُ عَ مُ دِ يٌ بَرِ، عَ نَ شُنيَ نَن نَ فِنّ دْشْمَ، عَلَكٌ عَ شَ بْنسْي قِ عَ تَارَ مَ.›

²⁹نَ كُي، شّمّ ندٍ نَشَ دِ شّمّ سٌلٌقٍرٍ سْتْ. عَ شَ دِ سِنفٍ نَشَ فِنّ دْشْ، عَ قَشَ، عَ مُ بْنسْي يٌ لُ.

³⁰عَ شَنبِرَتٌي نَشَ نَ كَاحّ فِنّ تٌنفٌ، كْنْ عَ قَن نَشَ قَشَ.

³¹نَ نَن مَن نَبَ نَ قَن شَنبِرَتٌي رَ، عَ نُن نَ دِ سٌلٌقٍرٍ بِرِن نَ. عٍ بِرِن نَشَ قَشَ، عٍ سٍسٍ مُ بْنسْي لُ.

³²عَ دْنشْي رَ، فِنّ قَن نَشَ قَشَ.

³³نَ كُي، مَرَكٍلِ لْشْي، نَ فِنّ تٌ دْشْشِ يِ مِشِ سٌلٌقٍرٍ بِرِن شْن مَ، عَ سَ قِندِ مَ ندٍ فبٍ رَ؟»

³⁴عِسَ نَشَ عَ مَسٍن عٍ بّ، «يِ دُنِحّءِفِرِ كُي، شّمّ فِنّ دْشْمَ، فِنّ قَن دْشْمَ شّمّ شْن.

³⁵كْنْ مِشِ نَشٍيٍ بِنيّ سْتْمَ عٍ شَ كٍلِ قَشّ مَ، عٍ شَ سَ سٌ وَشَتِ كُي نَشَن سَ قَمَ، عٍ تَن شّمّيٍ مُ فِنّيٍ دْشْمَ، فِنّيٍ قَن مُ دْشْمَ شّمّيٍ شْن.

³⁶عٍ مُ قَشَمَ سْنْن، بَرِ مَ عٍ لُمَ نّ عَلْ مَلٍكّيٍ. عٍ تٌ بَرَ كٍلِ قَشّ مَ، عٍ قِندِ مَ عَلَ شَ دِيٍ نَن نَ.»

³⁷«كْنْ عَ قَلَقٍ تَن، عَ قَشَمِشِيٍ كٍلِمَ قَشّ مَ، عَننَبِ مُنسَ يَتِ نَ مَسٍن نّ كِتَابُي كُي وُرِ بِلِ شَ قٍ قَلَشِ دّننَشّ، عَ تٌ مَرِفِ شِلِ قَلَ، ‹ﭑ تَن نَن نَ مَرِفِ عَلَتَلَ رَ، عِبُرَهِمَ، عِسِيَفَ، نُن يَشُبَ نَشَن بَتُمَ.›

³⁸قَشَمِشِيٍ شَ مُ عَلَ بَتُمَ، قٌ عَ مِشِ حِحّ. مِشِ يٌ قِندِ عَلَ بَتُي رَ، نَ كَنيِ حِحّ نَن عَ رَ.»

³⁹سّرِيّ كَرَ مْشْ ندٍيٍ نَشَ عَ قَلَ عَ بّ، «كَرَ مْشْ، عِ شَ مَسٍنيِ قَن،»

⁴⁰بَرِ مَ سَدُ سٍنِيٍ مُ سُو سَ مَشْرِنيِ يٌ تِدٍ عَ مَ سْنْن.

⁴¹عِسَ نَشَ عٍ مَشْرِن، «مُنقٍ رَ عٍ عَ قَلَمَ عَ عَلَ شَ مِشِ سُفَندِشِ قِندِشِ دَوُدَ شَ دِ نَن نَ؟