لٍوِ سّرّشّدُبّ 19:3-18

³بِرِن شَ عٍ نفَ نُن عٍ بَبَ بِنيَ. بِرِن شَ مَلَبُي لْشْي سّرِيّ رَبَتُ. عَلَتَلَ نَن ﭑ نَ، وٌ مَرِفِ عَلَ.»

⁴«وٌ نَشَ كُيٍيٍ بَتُ، وٌ نَشَ وُرٍ رَشُنُ كُيٍ يَءِلَنقٍ رَ. عَلَتَلَ نَن ﭑ نَ، وٌ مَرِفِ عَلَ.»

⁵«وٌ شَ شَنُنتٍيَ سّرّشّ بَ ﭑ تَن عَلَتَلَ بّ عَ رَبَ كِ مَ.

⁶سّرّشّ سُبٍ شَ دٌن عَ قَشَ لْشْي، شَ نَ مُ عَ رَ نَ كُيٍ عِبَ. سُبٍ نَ شِ سَشَن تِ، نَ شَ سَ تّ عِ.

⁷نَشَن لُمَ هَن شِ سَشَن، عَ رَهَرَ مُشِ، عَ مُ لَن نَ مْولِ شَ دٌن.

⁸نَشَن نَ رَبَمَ، عَ نَ سَرٍ سْتْمَ نّ، بَرِ مَ عَ بَرَ ﭑ تَن عَلَتَلَ شَ سٍ سّنِيّنشِ يٍلٍبُ. نَ كَنيِ رَ مِنِمَ نّ عِسِرَيِلَ حَمَ يَ مَ.»

⁹«وٌ نَ شّ شَبَ وٌ شْنيِ، وٌ نَشَ عَ تُشُييٍ شَبَ. بَلٌي نَشَن بِرَ مَ بْشِ مَ، وٌ شَ نَ لُ نَا.

¹⁰وٌ نَ وّنِ بٌفِ بَ وٌ شَ سَنسِيٍ كْن نَ، وٌ نَشَ فبِلٍن عَ مَ عَ قِرِن ندٍ. بٌفِ نَشٍيٍ قَن يٌلٌنمَ عٍ يّتّ مَ، وٌ شَ نٍيٍ قَن لُ نَ سٍتَرٍيٍ بّ، عَ نُن مِشِيٍ بّ نَشٍيٍ كٍلِشِ حَمَنّ فبّتّيٍ مَ. عَلَتَلَ نَن ﭑ نَ، وٌ مَرِفِ عَلَ.»

¹¹«وٌ نَشَ مُحّ تِ. وٌ نَشَ وُلٍ قَلَ. وٌ نَشَ وٌ بٌورٍ يَنقَ.

¹²وٌ نَشَ وٌ كَلِ ﭑ شِلِ رَ وُلٍ قَرِ، بَرِ مَ نَ كُي وٌ وٌ مَرِفِ عَلَ شِلِ نَن كَنَمَ. عَلَتَلَ نَن ﭑ نَ.»

¹³«وٌ نَشَ وٌ نفَشَكٍرٍنيِ تْورْ، وٌ نَشَ عَ مُحَ. وٌ نَشَ وٌ شَ وَلِكّ شَ وَلِ سَرٍ لُ هَن تِنَ.»

¹⁴«وٌ نَشَ تُلِشْرِ كٌنبِ، وٌ نَشَ دْنشُي رَبِرَ. وٌ شَ فَاشُ ﭑ تَن عَلَ يَ رَ. عَلَتَلَ نَن ﭑ نَ.»

¹⁵«وٌ نَشَ كِيتِ سَ تِنشِنتَرٍيَ رَ. وٌ نَشَ سٍتَرٍ رَقِسَ عَ بٌورٍ بّ، وٌ نَشَ بَننَ رَقِسَ عَ بٌورٍ بّ. وٌ شَ كِيتِ بِرِن سَ تِنشِنيِ رَ.

¹⁶وٌ نَشَ وٌ بٌورٍ مَقَلَ. وٌ نَشَ وٌ بٌورٍ تْوحّفّ عَلَكٌ عَ شَ قَشَ. عَلَتَلَ نَن ﭑ نَ.

¹⁷وٌ نَشَ وٌ نفَشَكٍرٍنيِ شْن. وٌ شَ وٌ بٌورٍ رَ سِ، عَلَكٌ وٌ نَشَ يُنُبِ سْتْ عَ شَ قٍ رَ.

¹⁸وٌ نَشَ وٌ فبٍحْشْ. وٌ نَشَ فبّسّنشْننّيَ رَفَتَ وٌ سٌندٌنيِ كُي وٌ نفَشَكٍرٍنيِ بّ. وٌ شَ وٌ بٌورٍ شَنُ عَلْ وٌ وٌ يّتّ شَنُمَ كِ نَشّ. عَلَتَلَ نَن ﭑ نَ.»