كْنتِ تِقٍ 23:12-23

¹²بَلَمِ نَشَ عَ يَابِ، «عَلَتَلَ نَ مَسٍنيِ نَشَن سَ ﭑ دّ عِ، ﭑ مُ لَن ﭑ شَ نَ قَلَ؟»

¹³بَلَكِ مَن نَشَ عَ قَلَ عَ بّ، «وٌن شَ سِفَ يِرٍ فبّتّ، عِ نْمَ عٍ تٌدٍ دّننَشّ. عِ سّيتِ كٍرٍن نَن فبَنسَن تٌمَ بٍ، عِ مُ عٍ بِرِن تٌمَ. مّننِ عِ نْمَ عٍ بِرِن تٌدٍ، عِ قَ عٍ دَنكَ.»

¹⁴عَ نَشَ بَلَمِ شَنِن سٌقِمِ، ثِسِفَ فٍيَ قَرِ. عَ نَشَ سّرّشّبَدٍ سٌلٌقٍرٍ يَءِلَن مّننِ، عَ تُورَ كٍرٍن نُن يّشّي كٌنتٌنيِ كٍرٍن بَ سّرّشّ رَ نَ سّرّشّبَدٍ كٍرٍن كٍرٍن مَ قَرِ.

¹⁵بَلَمِ نَشَ عَ قَلَ بَلَكِ بّ، «عِ شَ لُ بٍ عِ شَ سّرّشّ قّ مَ، ﭑ تَن شَ ﭑ مَكُيَ دٌندٌرٌنتِ، ﭑ نُن عَلَتَلَ شَ لُ يِرٍ كٍرٍن.»

¹⁶عَلَتَلَ نَشَ مِنِ بَلَمِ مَ، عَ مَسٍنيِ ندٍ قِ عَ مَ، عَ قَ عَ قَلَ عَ بّ، «سِفَ بَلَكِ يِرٍ، عِ شَ يِ مَسٍنيِ تِ عَ بّ.»

¹⁷بَلَمِ نَشَ فبِلٍن بَلَكِ يِرٍ، عَ عَ لِ عَ تِشِ عَ شَ سّرّشّ قّ مَ، عَ تَن نُن مٌوَبَ كُنتِفِيٍ. بَلَكِ نَشَ عَ مَشْرِن، «عَلَتَلَ مُنسٍ مَسٍنشِ؟»

¹⁸بَلَمِ نَشَ يِ مَسٍنيِ تِ عَ بّ، «بَلَكِ، كٍلِ. سِثٌرٌ شَ دِ شّمّ، عِ تُلِ مَتِ.

¹⁹عَلَ مِشِ مُ عَ رَ، عَ مُ وُلٍ قَلَمَ. عَدَ مَدِ مُ عَ رَ، عَ شَ عَ شَشِلِ مَسَرَ. عَ مُ عَ شُي مَسَرَ مَ. عَ مُ نّيمُمَ عَ شَ سَاتّ مَ. عَ مُ لَايِدِ كَنَمَ.

²⁰عَلَ بَرَ ﭑ يَمَرِ ﭑ شَ دُبَ يِ حَمَ بّ. عَلَتَلَ بَرَ بَرَكَ سَ عٍ مَ. ﭑ مُ نْمَ نَ مَسَرَدٍ.

²¹تْورّ مُ لُمَ يَشُبَ بْنسْي يَ مَ. سٍتَرٍحَ مُ تٌمَ عِسِرَيِلَ. عٍ مَرِفِ عَلَتَلَ نَ عٍ قْشْ رَ. مَنفّ شُي مّمَ نّ عٍ تَفِ.

²²عَلَتَلَ عٍ رَ مِنِشِ مِسِرَ بْشِ رَ، سّنبّ نَ عٍ يِ رَ عَلْ سّشّ نِنفٍ.

²³كَرَ مْشْ وَلِ مُ نْمَ يَشُبَ بْنسْي تْورْدٍ. سٍمَتٌي مُ نْمَ سٍسٍ رَبَدٍ عِسِرَيِلَ شِلِ مَ. عَ قَمَ قَلَدٍ يَشُبَ نُن عِسِرَيِلَ شَ قٍ رَ، عَلَ شَ وَلِ مَتٌ!