كْنتِ تِقٍ 21:21-32

²¹عِسِرَيِلَكَيٍ نَشَ شّيرَيٍ شّي عَمٌرِكَيٍ شَ مَنفّ سِشْن يِرٍ عَ قَلَقٍ رَ،

²²«مُشُ وَ مَ فِرِقٍ عِ شَ بْشِ نَن مَ. مُشُ مُ شّ يِرٍ نُن وّنِ بٌفِ يِرٍ لِمَ. مُشُ مُ وٌ شَ كْلْن يٍ مِنمَ. مُشُ لُمَ مَنفّ شَ كِرَ فبَنسَن نَن شْن مَ، هَن مُشُ عِ شَ بْشِ عِفِرِ.»

²³سِشْن مُ تِن عٍ شَ دَنفِ عَ شَ بْشِ مَ. عَ نَشَ عَ شَ سْورِيٍ مَلَن، عٍ نَشَ مِنِ عِسِرَيِلَكَيٍ شِلِ مَ فبٍنفبٍرٍنيِ مَ، عٍ قَ عٍ فٍرٍ يَهَسِ.

²⁴عِسِرَيِلَكَيٍ نَشَ فٍينِ. عٍ نَشَ عٍ شَ بْشِ بِرِن تٌنفٌ كٍلِ عَرِنٌن شُرٍ مَ هَن يَبٌكٌ شُرٍ، هَن عَمٌنِكَيٍ شَ بْشِ نَانِنيِ رَ. عٍ مُ نْ دَنفِدٍ نَ رَ بَرِ مَ عَمٌنِكَيٍ سّنبّ نُ فبٌ.

²⁵كْنْ عِسِرَيِلَكَيٍ نَشَ عَمٌرِكَيٍ شَ تَايٍ بِرِن سُشُ، عٍ قَ سَبَتِ نٍيٍ كُي. عٍ نَشَ شّسِبْن قَن سُشُ، عَ نُن عَ شَ رَبِلِنيِ.

²⁶شّسِبْن نَن نُ نَ عَمٌرِكَيٍ شَ مَنفّ سِشْن شَ مَنفَتَا رَ. عَ نُ بَرَ نَ تَا بَ مٌوَبَ مَنفّ ندٍ يِ، عَ نُن عَ شَ بْشِ بِرِن هَن عَرِنٌن شُرٍ.

²⁷نَ نَن عَ رَ، بّيتِبَيٍ عَ قَلَمَ، «وٌ قَ شّسِبْن! سِشْن شَ تَا شَ تِ، عَ مَن شَ سّنبّ سْتْ!

²⁸تّ بَرَ شّسِبْن فَن، سِشْن شَ تَا بَرَ كَنَ تّ رَ. مٌوَبَ بْشِ شَ تَا عَرِ قَن بَرَ فَن، نَشَن شَ مِشِيٍ نُ نْمَ عَرِنٌن تٌدٍ.

²⁹حَشَنكَتّ نَ وٌ بّ مٌوَبَكَيٍ، وٌ تَن كٍمٌسِ شَ بَتُلَيٍ. عَ شَ دِ شّمّيٍ بَرَ عٍ فِ. عَ شَ دِ فِنّيٍ بَرَ قِندِ فٍيلِمَنِيٍ رَ عَمٌرِ مَنفّ سِشْن شْنيِ.

³⁰كْنْ مُشُ بَرَ نْ عٍ رَ، شّسِبْن بَرَ كَنَ هَن دِبٌن. مُشُ بَرَ عٍ هَلَكِ هَن نٌقَ، هَن عَ سَ مٍدٍبَ لِ.»

³¹عِسِرَيِلَ نَشَ سَبَتِ عَمٌرِكَيٍ شَ بْشِ مَ.

³²مُنسَ تٌ فّ يَاسّرِ تَا رَبّندٍ، عِسِرَيِلَ نَشَ عَمٌرِكَيٍ كٍرِ نَ لٌنفٌرِ بِرِن مَ.