كْنتِ تِقٍ 16:2-26

²نٍيٍ نَشَ تِ مُنسَ كَنكٍ. عِسِرَيِلَكَ مِشِ كّمّ قِرِن مِشِ تٌنفٌ سُولِ نُ نَ عٍ شَنبِ رَ. كُنتِفِ بٍلٍبٍلٍيٍ نُ نَ عٍ يَ مَ.

³عٍ نَشَ عٍ مَلَن مُنسَ نُن هَرُنَ شِلِ مَ، عٍ قَ عَ قَلَ عٍ بّ، «وٌ شَ مَنفّيَ بَرَ حْن! عِسِرَيِلَ حَمَ بِرِن سّنِيّن، عَلَتَلَ مَن نَ مُشُ تَفِ. مُنقٍ رَ وٌ تَن فبَنسَن وٌ يّتّ عِتٍمَ عَلَتَلَ شَ حَمَ شُن مَ؟»

⁴مُنسَ تٌ نَ مّ، عَ نَشَ عَ يَتَفِ رَقٍلٍن بْشِ مَ.

⁵عَ نَشَ عَ قَلَ كٌرَ نُن عَ شَ مِشِيٍ بّ، «تِنَ فّيسّفّ، عَلَتَلَ قَمَ عَ مَسٍندٍ وٌن بّ، عَ شَ مِشِ سّنِيّنشِ نَ نَشَن نَ. عَ تِنمَ نَ كَنيِ شَ مَكْرّ عَ رَ، عَ نَشَن سُفَندِ مَ.

⁶كٌرَ، عِ نُن عِ شَ مِشِيٍ، وٌ شَ سُرَيِ فَنسٍيٍ تٌنفٌ.

⁷تِنَ وٌ تّ سَ عٍ كُي، وٌ سُرَيِ فَن عَلَتَلَ بّ. عَلَتَلَ نَ نَشَن سُفَندِ، نَ نَن سّنِيّن. لٍوِ بْنسْي، يَكْسِ وٌ بَرَ عَ رَدَنفِ عَ عِ.»

⁸مُنسَ مَن نَشَ عَ قَلَ كٌرَ بّ، «لٍوِ بْنسْي شَ دِيٍ، وٌ وٌ تُلِ مَتِ.

⁹عِسِرَيِلَ مَرِفِ عَلَ وٌ سُفَندِشِ نّ عِسِرَيِلَ حَمَ يَ مَ عَ شَ هْرْ مْلِنفِرَ وَلِ شَ قٍ رَ. وٌ تَن نَن تِمَ حَمَ يَ رَ عٍ سَلِ تّمُي. نَ مُ وٌ وَ سَ؟

¹⁰عَ تِنمَ وٌ تَن لٍوِ بْنسْي شَ مَكْرّ عَ رَ، كْنْ وٌ وَ مَ سّرّشّدُبّ وَلِ قَن نَن نَبَقٍ.

¹¹نَ كُي عِ تَن نُن عِ شَ مِشِيٍ، وٌ بَرَ لَن وٌ بٌورٍ مَ وٌ شَ عَلَتَلَ مَتَندِ. مُنقٍ رَ وٌ نَ تِقٍ هَرُنَ كَنكٍ؟»

¹²مُنسَ نَشَ مِشِ شّي عٍلِيَبِ شَ دِ شّمّيٍ دَتَن نُن عَبِرَ مِ شِلِدٍ، كْنْ عٍ نَشَ تٌندِ، عٍ قَ عَ قَلَ، «مُشُ تَن مُ سِفَمَ.

¹³مُنقٍ رَ عِ بَرَ مُشُ رَ مِنِ بْشِ مَ، كُمِ نُن شِحّ شّلّمَ دّننَشّ، عَلَكٌ مُشُ شَ قَشَ يِ فبٍنفبٍرٍنيِ مَ؟ عِ مَن وَ مَ عِ يّتّ قِندِقٍ مُشُ شَ مَنفّ رَ؟

¹⁴عِ مُ مُشُ رَ سٌشِ بْشِ كُي كُمِ نُن شِحّ شّلّمَ دّننَشّ. عِ مُ شّيٍ نُن وّنِ بِلِيٍ شَ قِشِ مُشُ مَ كّ رَ. عِ حْشْ عَ مَ، عَ عِ نُن دْنشُييٍ نَن عَ رَ؟ مُشُ مُ سِفَمَ!»

¹⁵مُنسَ نَشَ شْنْ كِ قَنيِ رَ، عَ عَ قَلَ عَلَتَلَ بّ، «عِ نَشَ عٍ شَ سّرّشّ سُشُ. ﭑ مُ سٍسٍ تٌنفٌشِ عٍ يِ رَ، هَلِ سٌقَلٍ كٍرٍن. ﭑ مُ قٍ حَاشِ يٌ رَبَشِ عٍ رَ.»

¹⁶مُنسَ نَشَ عَ قَلَ كٌرَ بّ، «عِ تَن نُن عِ شَ مِشِيٍ، تِنَ وٌ نُن هَرُنَ شَ تِ بٍ عَلَتَلَ يَ عِ.

¹⁷وٌ بِرِن شَ وٌ شَ سُرَيِ فَنسٍيٍ تٌنفٌ، وٌ شَ سُرَيِ سَ عَ مَ، وٌ وٌ يّتّ مَسٍن عَلَتَلَ بّ. نَ لَنمَ سُرَيِ فَنسٍ كّمّ قِرِن تٌنفٌ سُولِ نَن مَ. عِ تَن نُن هَرُنَ، وٌ قَن شَ وٌ شَ سُرَيِ فَنسٍ سُشُ وٌ يِ رَ.»

¹⁸عٍ بِرِن نَشَ تّ سَ عٍ شَ سُرَيِ فَنسٍيٍ كُي، عٍ نَشَ سُرَيِ سَ عَ مَ، عٍ قَ تِ هْرْ مْلِنفِرَ دّ رَ. مُنسَ نُن هَرُنَ قَن نُ نَ نَا.

¹⁹كٌرَ تٌ حَمَ بِرِن مَلَن مُنسَ نُن هَرُنَ شِلِ مَ هْرْ مْلِنفِرَ دّ رَ، عَلَتَلَ شَ نْرّ نَشَ مِنِ حَمَ بِرِن مَ.

²⁰عَلَتَلَ نَشَ عَ مَسٍن مُنسَ نُن هَرُنَ بّ،

²¹«وٌ مِنِ يِ مِشِيٍ يَ مَ. ﭑ شَ عٍ سْنتْ كٍرٍن نَ!»

²²مُنسَ نُن هَرُنَ نَشَ عٍ يَتَفِ رَقٍلٍن بْشِ مَ، عٍ قَ عَ قَلَ، «عَلَتَلَ، دَالِ بِرِن مَنفّ، عَ لَنمَ عِ شَ شْنْ حَمَ بِرِن مَ، مِشِ كٍرٍن شَ يُنُبِ شَ قٍ رَ؟»

²³عَلَتَلَ نَشَ مُنسَ يَابِ،

²⁴«عَ قَلَ حَمَ بِرِن بّ، عٍ شَ عٍ مَكُيَ كٌرَ، دَتَن، نُن عَبِرَ مِ شْنيِ رَ.»

²⁵مُنسَ نُن عِسِرَيِلَ كُنتِفِيٍ نَشَ سِفَ عَبِرَ مِ نُن دَتَن يِرٍ.

²⁶عَ نَشَ عَ قَلَ حَمَ بّ، «وٌ وٌ مَكُيَ يِ يُنُبِتْييٍ شَ لِنفِرَيٍ رَ. وٌ نَشَ دِن عٍ شَ سٍيٍ رَ، عَلَكٌ وٌ نَشَ قَ قَشَ عٍ شَ يُنُبِيٍ شَ قٍ رَ.»