كْنتِ تِقٍ 14:7-28

⁷عٍ نَشَ قَ يِ مَسٍنيِ تِ حَمَ بّ، «مُشُ بْشِ نَشَن مَتٌشِ، بْشِ قَنيِ قَنيِ نَن عَ رَ.

⁸شِحّ نُن كُمِ يِرٍ نَن عَ رَ. شَ عَلَتَلَ نَ وٌن بّ، عَ وٌن نَسٌمَ نّ نَا، عَ نَ بْشِ قِ وٌن مَ.

⁹يَندِ، وٌ نَشَ عَلَتَلَ مَتَندِ. وٌ نَشَ فَاشُ نَ بْشِ مِشِيٍ يَ رَ. وٌن نْمَ نّ عٍ رَ. عٍ سَنكٍ يٌ مُ نَ سْنْن، بَرِ مَ عَلَتَلَ نَ وٌن تَن نَن بّ. وٌ نَشَ فَاشُ عٍ يَ رَ.»

¹⁰حَمَ نُ وَ مَ عٍ مَفْنْقٍ، كْنْ عَلَتَلَ شَ نْرّ نَشَ مِنِ هْرْ مْلِنفِرَ عِسِرَيِلَكَ بِرِن يَ شْرِ.

¹¹عَلَتَلَ نَشَ عَ مَسٍن مُنسَ بّ، «يِ حَمَ بَمَ ﭑ مَبٍرٍقٍ مُن تّمُي؟ مُنقٍ رَ عٍ سِيكّمَ هَلِ ﭑ كَابَنَكٌي رَبَمَ عٍ تَفِ؟

¹²ﭑ شَ وُفَنيِ رَدِن عٍ مَ، ﭑ نٍيٍ قَشَ. نَ تّمُي ﭑ بْنسْي شُنفبٍ سّنبّمَ ندٍ رَكٍلِمَ نّ عِ سَابُي رَ، نَشَن دَنفِ عٍ تَن نَ.»

¹³مُنسَ نَشَ عَلَتَلَ يَابِ، «مِسِرَكَيٍ بَرَ عَ كٌلٌن، عَ عِ يِ حَمَ رَ مِنِ عٍ شَ بْشِ رَ عِ سّنبّ نَن نَ.

¹⁴عٍ بَرَ بٍكَيٍ رَكٌلٌن. نٍيٍ بَرَ عَ مّ، عَ عِ تَن عَلَتَلَ نَ عِ شَ حَمَ قْشْ رَ، عَ عِ عِ يّتّ مَسٍنمَ عٍ مَ، عَ عِ نُشُي سَمَ عٍ شُن مَ، عَ عِ حّرّ مَ عٍ يَ رَ نُشُي كُي يَنيِ رَ، نُن تّ كُي كْي رَ.

¹⁵شَ عِ قَ يِ حَمَ بِرِن قَشَ كٍرٍنيِ رَ، بْنسْي نَشٍيٍ عِ شَ قٍ مّشِ، عٍ عَ قَلَمَ نّ،

¹⁶‹عَلَتَلَ سّنبّ يٌ مُ نُ نْمَ يِ حَمَ رَ سٌدٍ بْشِ مَ، عَ نَشَن لَايِدِشِ عٍ بّ. نَ نَن عَ رَ، عَ عٍ بِرِن سْنتْ فبٍنفبٍرٍنيِ مَ.›»

¹⁷«عِ شَ عِ سّنبّ مَسٍن عٍ بّ، عَلْ عِ تَن يَتِ عَ يِتَشِ كِ نَشّ، عَ قَلَقٍ رَ،

¹⁸‹ﭑ مُ شْنْمَ مَقُرٍن مَقُرٍن. ﭑ مَ دِحّ نُن قَنيِ فبٌ. ﭑ مِشِيٍ شَ يُنُبِيٍ نُن قٍ حَاشِيٍ شَقَرِ مَ. كْنْ ﭑ مِشِ كٌبِ نُن مِشِ قَنيِ تَفِ رَ سَمَ. ﭑ بٍنبَيٍ شَ يُنُبِ سَرٍ دْشْمَ عٍ شَ دِيٍ شُن مَ هَن بْنسْي سَشَن، شَ نَ مُ نَانِ.›

¹⁹يَندِ، ﭑ بَرَ عِ مَشَندِ، دِحّ عِ شَ حَمَ شَ يُنُبِ مَ عِ شَ هِننّ شَ قٍ رَ، عَلْ عِ عَ رَبَشِ كَبِ عٍ مِنِ مِسِرَ تّمُي نَشّ.»

²⁰عَلَتَلَ نَشَ عَ يَابِ، «ﭑ بَرَ دِحّ عِ شَ مَشَندِ شَ قٍ رَ.

²¹كْنْ، ﭑ بَرَ ﭑ كَلِ، نْندِ نَن عَ رَ عَلْ ﭑ تٌ نَ نَ، عَلْ ﭑ مَ نْرّ نَشَن بْشِ رَقٍمَ،

²²شّمّ نَشَن بِرِن ﭑ مَ نْرّ نُن ﭑ مَ كَابَنَكٌي تٌشِ، ﭑ نَشٍيٍ رَبَ مِسِرَ نُن فبٍنفبٍرٍنيِ مَ، كْنْ عٍ قَ مُرُتَ ﭑ مَ هَن سَنيَ قُ تُلِ شْرْشْي رَ،

²³نٍيٍ سٍسٍ مُ بْشِ تٌمَ، ﭑ نَشَن لَايِدِشِ عٍ بٍنبَيٍ بّ. نَشَن بِرِن مُرُتَشِ ﭑ مَ، عٍ سٍسٍ مُ نَ تٌمَ.

²⁴كْنْ ﭑ مَ كٌنيِ دِ كَلٍبِ تٌ بِرَ شَشِلِ فبّتّ قْشْ رَ، عَ قَ ﭑ نَبَتُ، ﭑ عَ تَن نَسٌمَ نّ نَ بْشِ مَ، عَ نَشَن نَبّنشِ. عَ بْنسْي كّ سْتْمَ نّ نَا.

²⁵عَمَلّكِكَيٍ نُن كَنَانكَيٍ تٌ سَبَتِ فُلُنبَ كُي، تِنَ وٌ شَ وٌ مَقِندِ، وٌ شَ فبِلٍن فبٍنفبٍرٍنيِ مَ شُلُنيُمِ بَا مَبِرِ.»

²⁶عَلَتَلَ نَشَ عَ مَسٍن مُنسَ نُن هَرُنَ بّ،

²⁷«يِ حَمَ كٌبِ ﭑ مَتَندِ مَ هَن مُن تّمُي؟ ﭑ بَرَ عِسِرَيِلَكَيٍ شُي مّ، عٍ نَشَن قَلَمَ ﭑ بّ، عٍ تِ ﭑ كَنكٍ.

²⁸عَ قَلَ عٍ بّ، ‹ﭑ بَرَ ﭑ كَلِ، نْندِ نَن عَ رَ، عَلْ ﭑ تٌ نَ نَ، ﭑ عَ رَبَمَ نّ وٌ بّ عَلْ ﭑ عَ مّشِ وٌ دّ عِ كِ نَشّ.