كْنتِ تِقٍ 11:1-23

¹لْشْي ندٍ، حَمَ نَشَ عٍ مَوَ عٍ شَ تْورّ شَ قٍ رَ عَلَتَلَ يَ عِ. عَلَتَلَ نَشَ شْنْ نَ قٍ مَ، عَ قَ تّ رَ سِن حَمَ تَفِ، عَ يِرٍ ندٍ فَن يٌنكِندٍ سّيتِ مَ.

²حَمَ تٌ فبٍلٍفبٍلٍ مُنسَ رَ، عَ نَشَ عَلَتَلَ مَشَندِ. نَ كُي تّ نَشَ شُبٍن.

³عٍ نَشَ نَ يِرٍ شِلِ سَ تَبٍرَ، نَ نَن نَ كِ «تّ مَنكَنّ،» بَرِ مَ عَلَتَلَ نُ بَرَ تّ رَ سِن عٍ تَفِ.

⁴مِشِ كٌبِ ندٍيٍ تٌ وَ دٌنسٍ مْولِ فبّتّ شْن مَ، عِسِرَيِلَكَيٍ مَن نَشَ عٍ مَوَ، عَ قَلَقٍ رَ، «مُشُ وَ مَ سُبٍ نَن شْن!

⁵مُشُ مُشُ رَتُمَ نَ دٌنسٍ قَنيِ مَ مُشُ نَشَن سْتْ مِسِرَ بْشِ مَ كْبِرِ شَنبِ، عَلْ يّشّ، كَاكُنبٌو سِ، بَسِكّتِ، يّبّ، نُن يّبّ مَنِيّ.

⁶كْنْ يَكْسِ دٌنسٍ شْلِ مُ نَ مُشُ مَ، بَرِ مَ ‹مَنَ› دٌنسٍ نَن تُن نَ بٍ.»

⁷نَ «مَنَ» نُ لُشِ نّ عَلْ قُندٍن شْرِ قِيشّ.

⁸حَمَ نُ مِنِمَ عَ مَتٌنفٌدٍ، عٍ قَ عَ دِن فّمّ رَ، شَ نَ مُ، مُلُنيِ كُي. عٍ نُ لّكِ يَءِلَنمَ عَ رَ. عَ نُ لُشِ عَلْ تُرٍ نُ نَ عَ مَ.

⁹مَنَ نُ فٌرٌ مَ شِنِ فٌرٌ تّمُي.

¹⁰مُنسَ نَشَ حَمَ وَ شُي رَ مّ. مِشِ بِرِن نُ عٍ مَوَ مَ عٍ شْنيِ. عَلَتَلَ نَشَ شْنْ كِ قَنيِ رَ. مُنسَ نَشَ كْنتْقِلِ.

¹¹عَ نَشَ عَلَتَلَ مَشْرِن، «ﭑ مَرِفِ، مُنقٍ رَ عِ بَرَ يِ كْنتْقِلِ لُ عِ شَ كٌنيِ مَ؟ ﭑ مُنسٍ رَبَشِ نَشَن عَ نِيَمَ عِ شَ يِ حَمَ شَ كٌتٍ دْشْ ﭑ شُن مَ؟ ﭑ تَن نَن نُ وَ مَ عَ شْن؟

¹²ﭑ تَن نَن عٍ بَرِشِ؟ مُنقٍ رَ عِ بَرَ عٍ سَ ﭑ بّلّشّ، ﭑ شَ عٍ شَنِن بْشِ مَ عِ نَشَن لَايِدِشِ عٍ بٍنبَيٍ بّ، عَلْ دِنفّ عَ شَ دِ شَنِنمَ كِ نَشّ؟

¹³ﭑ سُبٍ سْتْمَ مِندٍن يِ حَمَ بِرِن بّ؟ عٍ عٍ مَوَ مَ عٍ وَ مَ سُبٍ شْن.

¹⁴ﭑ كٍرٍن مُ نْمَ يِ حَمَ بِرِن شَ كٌتٍ رَ، عَ بِنيَ ﭑ بّ.

¹⁵قَشّ نَن قِسَ نَ كٌتٍ بّ. شَ ﭑ مَ قٍ رَقَن عِ مَ، عِ نَشَ ﭑ شُن نَكَنَ.»

¹⁶عَلَتَلَ نَشَ عَ مَسٍن مُنسَ بّ، «عِسِرَيِلَ قٌرِ تٌنفٌ سٌلٌقٍرٍ مَلَن ﭑ بّ، عِ نَشٍيٍ كٌلٌن تَا يَرٍرَتِيٍ نُن كُنتِفِيٍ رَ. عٍ شَ عٍ مَلَن هْرْ مْلِنفِرَ دّ رَ عِ سّيتِ مَ.

¹⁷ﭑ قَمَ فٌرٌدٍ عِ يِرٍ، وٌن شَ وْيّن. ﭑ شَشِلِ سّنِيّنشِ نَشَن قِشِ عِ مَ، ﭑ نَ ندٍ بَمَ عِ مَ، ﭑ شَ نَ سَ عٍ قَن مَ، عَلَكٌ عِ كٍرٍن نَشَ يِ حَمَ شَ كٌتٍ شَنِن سْنْن. وٌ نُن نَ كُنتِفِيٍ نَن عَ شَنِنمَ قَ.»

¹⁸«عَ قَلَ حَمَ بّ، ‹وٌ شَ وٌ يّتّ رَ سّنِيّن، بَرِ مَ تِنَ وٌ سُبٍ دٌنمَ نّ. عَلَتَلَ بَرَ وٌ وَ شُي مّ، عَ قَلَقٍ رَ، «مُشُ وَ مَ سُبٍ نَن شْن مَ. لُقٍ مِسِرَ نَن قِسَ.» عَلَتَلَ قَمَ سُبٍ قِدٍ وٌ مَ وٌ نَشَن دٌنمَ.

¹⁹كْنْ وٌ مُ عَ دٌنمَ شّ شِ كٍرٍن، شَ نَ مُ شِ قِرِن، شَ نَ مُ شِ سُولِ، شَ نَ مُ شِ قُ، شَ نَ مُ شِ مْشْحّن.

²⁰وٌ عَ دٌنمَ نّ هَن كِكٍ كٍرٍن، هَن عَ مِنِ وٌ حْي كُي، هَن عَ رَحَاشُ وٌ مَ، بَرِ مَ وٌ بَرَ عَلَتَلَ رَبّحِن، نَشَن نَ وٌ يَ مَ. وٌ بَرَ وٌ مَوَ عَ قَلَقٍ رَ، «مُنقٍ رَ مُشُ مِنِشِ مِسِرَ؟»›»

²¹مُنسَ نَشَ عَ مَسٍن عَلَتَلَ بّ، «عِ عَ قَلَمَ عِ سُبٍ قِمَ يِ حَمَ مَ كِكٍ كٍرٍن بُن مَ؟ ﭑ نَ شّمّ وُلُ كّمّ سٍننِ نَن يَ مَ.

²²شُرُ سٍ فْورّ مُ نْمَ عٍ رَلِدٍ سُبٍ رَ. هَلِ يّشّ نَشٍيٍ نَ بَا مَ، عٍ مُ نْمَ عٍ رَلِدٍ.»

²³عَلَتَلَ نَشَ عَ يَابِ، «ﭑ سّنبّ شُرُن نَ رَبَدٍ؟ عِ قَمَ عَ كٌلٌندٍ شَ ﭑ مَ وْيّنيِ قِندِشِ نْندِ نَن نَ.»