كَوَندِلَ 2:1-20

¹ﭑ عَ قَلَ نّ ﭑ يّتّ بّ، «ﭑ شَ حّلّشِنيِ مَتٌ، ﭑ شَ عَ كٌلٌن نَشَن قَن.» ﭑ نَشَ عَ تٌ عَ حّلّشِنيِ قَن مُ بُمَ.

²ﭑ نَشَ ﭑ يّتّ مَشْرِن، «يٍلٍقٍ تُن مُ قِندِشِ قٍ كَمَلِشِ رَ. حّلّشِنيِ تِدٍ نَ مُنسٍ رَ؟»

³ﭑ نَشَ نَتّ تٌنفٌ ﭑ مَ لْننِ قٍنقٍ كُي، ﭑ شَ حّلّشِنيِ قٍن وّنِ رَ. ﭑ نُ وَ مَ عَ كٌلٌنقٍ مُنسٍ مُنَقَنيِ فبٌ عَدَ مَدِيٍ بّ عٍ شَ دُنِحّءِفِرِ كُي.

⁴ﭑ نَشَ وَلِ شُنفبٍ ندٍيٍ سُشُ عَلْ بَنشِ تِقٍ نُن شّ سَقٍ.

⁵ﭑ نَشَ يِرٍ تٌقَنيِيٍ يَءِلَن نَاقُلِ كَنيِ عٍ مَلَبُمَ دّننَشّ سَنسِ تٌقَنيِيٍ يَ مَ.

⁶ﭑ نَشَ يٍ يِرٍ فٍ نَشٍيٍ عَ نِيَمَ يٍ شَ سَ ﭑ مَ سَنسِيٍ مَ.

⁷ﭑ نَشَ كٌنيِيٍ سَرَ، نَشٍيٍ بَرَ دِيٍ سْتْ نَشٍيٍ قِندِشِ ﭑ فبٍ رَ، عٍ قَ لُ ﭑ شْنيِ. ﭑ نَشَ شُرُ سٍ فبٍفبٍ سْتْ، دَنفِ دَرِ سَلَمُكَيٍ بِرِن نَ نَشٍيٍ نُ نَ بٍينُ ﭑ شَ بَرِ.

⁸ﭑ نَشَ فبٍتِ، شّيمَ، نُن نَاقُلِ مْولِ بِرِن سْتْ. ﭑ نَشَ يٍلِبَيٍ سْتْ، عَ نُن فِنّ فَلِ عَدَ مَ وَشْنقٍ شَ قٍ رَ.

⁹ﭑ نَشَ قِندِ مِشِ شُنفبٍ رَ دَنفِقٍ دَرِ سَلَمُكَيٍ بِرِن نَ نَشٍيٍ نُ نَ بٍينُ ﭑ شَ بَرِ. ﭑ نَشَ نَ بِرِن نَبَ لْننِ قٍنقٍ رَ.

¹⁰ﭑ نَشَ ﭑ وَشْنقٍ مْولِ بِرِن قٍن، ﭑ مُ تٌندِ سٍسٍ رَ نَشَن نُ رَقَنشِ ﭑ مَ. ﭑ مَ وَلِ يَتِ نُ رَقَنشِ ﭑ مَ، نَ نَن قِندِشِ ﭑ مَ فٍينِ رَ.

¹¹كْنْ ﭑ تٌ ﭑ مَ وَلِ بِرِن مَتٌ، ﭑ نَشَن نَبَشِ تْورّ كُي، ﭑ نَشَ عَ تٌ نَ بِرِن قُقَقُ. عَ نُ لُشِ نّ عَلْ مِشِ نَشَن بِرَ مَ قٌيٍ قْشْ رَ عَ مُ سٍسٍ سُشُ.

¹²نَ تّمُي ﭑ نَشَ ﭑ حْشْ سَ شَشِلِمَيَ نُن شَشِلِتَرٍحَ شْن مَ. نَشَن تِمَ مَنفّ رَ ﭑ حْشْي رَ، نَ قَمَ مُنسٍ رَبَدٍ؟

¹³ﭑ نَشَ عَ تٌ شَشِلِمَيَ قَن دَنفِ شَشِلِتَرٍحَ رَ، عَلْ نَءِيَلَنيِ قَن تٌ قَنشِ دِ مِ بّ.

¹⁴شَشِلِمَ سٍ تٌمَ عَ يَ رَ، شَشِلِتَرٍ تَن عَ حّرّ مَ دِ مِ نَن كُي. كْنْ عٍ قِرِن بِرِن قَشَمَ نّ.

¹⁵نَ نَن عَ رَ ﭑ نَشَ عَ مَحْشُن، شَ ﭑ تَن نُن شَشِلِتَرٍ بِرِن قَشَمَ نّ، ﭑ مَ شَشِلِمَيَ تِدٍ قَ نَ مُنسٍ رَ؟ ﭑ نَشَ عَ قَلَ ﭑ يّتّ بّ، «شَشِلِمَيَ قَن قٍ قُقَقُ نَن عَ رَ.»

¹⁶شَشِلِمَ نُن شَشِلِتَرٍ شَ قٍ مُ رَتُمَ مِشِيٍ رَ، عٍ نّيمُمَ نّ عٍ قِرِن بِرِن مَ، عٍ قِرِن بِرِن قَشَمَ نّ.

¹⁷نَ كُي دُنِحّءِفِرِ نَشَ رَحَاشُ ﭑ مَ، بَرِ مَ ﭑ بَرَ عَ كٌلٌن ﭑ مَ وَلِ مُ بُمَ. عَ لُشِ نّ عَلْ مِشِ نَشَن بِرَ مَ قٌيٍ قْشْ رَ، عٍ مُ عَ سُشُ.

¹⁸ﭑ مَ وَلِ نَشَ رَحَاشُ ﭑ مَ، بَرِ مَ ﭑ بَرَ عَ كٌلٌن قٌ ﭑ شَ نَ بِرِن لُ مِشِ فبّتّ يِ رَ.

¹⁹نَ مِشِ قِندِ مَ شَشِلِمَ نَن نَ، كَ شَشِلِتَرٍ رَ؟ ندٍ نْمَ نَ كٌلٌندٍ؟ كْنْ عَ تَن يَتِ نْي سْتْمَ نّ ﭑ مَ وَلِ بِرِن شُن مَ! قٍ قُقَقُ نَن نَ كِ.

²⁰نَ كُي ﭑ نَشَ نِمِسَ وَلِ بِرِن شَ قٍ رَ ﭑ نَشَن نَبَ يِ دُنِحَ مَ.