عِسِرَيِلَ مَنفّيٍ ١ 18:27-42

²⁷يَنيِ تَفِ تٌ عَ لِ، عَننَبِ عٍلِيَ نَشَ يٌ عٍ مَ، عَ قَلَقٍ رَ، «وٌ وٌ شُي عِتٍ دٍ، بَرِ مَ عَ تٌ قِندِشِ عَلَ رَ، قٍيٍ وُيَ عَ يِ. تّمُندٍ عَ نَ بِيَاسِ كُي، شَ نَ مُ عَ رَ عَ نَ شِقٍ. وٌ شَ عَ رَشُنُ.»

²⁸عٍ مَن نَشَ عٍ شُي عِتٍ سّنبّ رَ. عٍ نَشَ عٍ قَتٍ مَشَبَ سَنتِدّفّمَيٍ نُن تَنبّيٍ رَ، هَن عٍ وُلِ مِنِ.

²⁹يَنيِ تٌ دَنفِ، عٍ نَشَ بَلِ كُيٍ مَشَندِ عَ نَمِحْنمّ دَاشِ هَن نُنمَرٍ سّرّشّ بَ تّمُي. كْنْ يَابِ يٌ مُ قَ، شُي ندٍ يٌ مُ مّ، تْنشُمَ ندٍ يٌ مُ تٌ.

³⁰نَ تّمُي عَننَبِ عٍلِيَ نَشَ عَ قَلَ حَمَ بّ، عَ نَشّ، «وٌ وٌ مَسٌ ﭑ نَ.» حَمَ تٌ نَ رَبَ، عٍلِيَ نَشَ عَلَتَلَ شَ سّرّشّبَدٍ يَءِلَن، نَشَن نُ بَرَ كَنَ مّننِ تّمُي دَنفِشِ.

³¹عٍلِيَ نَشَ فّمّ قُ نُن قِرِن تٌنفٌ، نَشَن لَنشِ يَشُبَ شَ دِيٍ كْنتِ مَ، عَلَتَلَ عَ مَسٍن نَشَن بّ، «عِ شِلِ قَلَمَ نّ عِسِرَيِلَ.»

³²عَ نَشَ سّرّشّبَدٍ يَءِلَن نَ فّمّ قُ نُن قِرِنيِ رَ عَلَتَلَ شِلِ رَ. عَ نَشَ قٌلٍ فٍ نَ سّرّشّبَدٍ رَبِلِنيِ، يٍ كٌنبٌ يَ نَانِ نْمَ نَشَن نَقٍدٍ.

³³عَ نَشَ يٍفٍ سَ نَ قَرِ، عَ تُورَ عِبٌلٌن، عَ نَ سَ نَ يٍفٍ قَرِ.

³⁴عَ تٌ فّ نَ رَ، عَ نَشَ مِشِيٍ يَمَرِ، «وٌ يِ قّحّ نَانِ رَقٍ يٍ رَ، وٌ عَ عِقِلِ يِ يٍفٍ نُن يِ سّرّشّ مَ.» عٍ تٌ فّ نَ رَبَدٍ، عَ مَن نَشَ عَ قَلَ عٍ بّ، «وٌ مَن شَ عَ رَبَ.» عٍ تٌ عَ رَبَ عَ قِرِن ندٍ، عٍلِيَ مَن نَشَ عَ قَلَ، «وٌ مَن شَ يٍ سَ.» عٍ نَشَ عَ رَبَ عَ سَشَن ندٍ.

³⁵يٍ نُ سْلِ سّرّشّبَدٍ رَ، قٌلٍ قَ رَقٍ يٍ رَ.

³⁶نُنمَرٍ سّرّشّ بَ تّمُي، عَننَبِ عٍلِيَ نَشَ عَ مَسٌ سّرّشّبَدٍ رَ، عَ عَ قَلَ، «عِبُرَهِمَ، عِسِيَفَ، نُن عِسِرَيِلَ مَرِفِ عَلَتَلَ، بِرِن شَ عَ كٌلٌن تٌ عَ عِ تَن نَن نَ عَلَ رَ عِسِرَيِلَ. بِرِن شَ عَ كٌلٌن عَ ﭑ تَن نَن نَ عِ شَ كٌنيِ رَ، نَشَن يِ قٍ بِرِن نَبَشِ عِ شُي مَ!

³⁷عَلَتَلَ، عِ شَ ﭑ مَ مَشَندِ سُشُ. يَندِ، عِ شَ عَ سُشُ، عَلَكٌ يِ حَمَ شَ عَ كٌلٌن عَ عِ تَن عَلَتَلَ نَن نَ عَلَ رَ، نَشَن نْمَ عٍ بْحّ رَفبِلٍندٍ عِ مَ.»

³⁸نَ كُي عَلَتَلَ نَشَ تّ رَفٌرٌ، عَ سّرّشّ فَن، عَ يٍفٍ فَن، هَلِ فّمّيٍ نُن بْشِ فَن نّ. يٍ نَشَن نُ قٌلٍ كُي، عَ بِرِن نَشَ شَرَ قٍوٌ.

³⁹حَمَ تٌ نَ تٌ، عٍ نَشَ عٍ يَتَفِ رَقٍلٍن بْشِ مَ، عٍ قَ عَ قَلَ، «عَلَتَلَ نَن عَلَ رَ! عَلَتَلَ نَن عَلَ رَ!»

⁴⁰عَننَبِ عٍلِيَ نَشَ عَ قَلَ عٍ بّ، «وٌ بَلِ شَ نَمِحْنمّيٍ سُشُ. عَ كٍرٍن نَشَ عَ فِ.» حَمَ نَشَ عٍ سُشُ، عٍلِيَ نَشَ عٍ شَنِن كِسٌن شُرٍ يِرٍ، عَ عٍ بِرِن كْن نَشَبَ.

⁴¹نَ تّمُي عٍلِيَ نَشَ عَ قَلَ عَكَبُ بّ، «سِفَ عِ شْنيِ. عِ شَ عِ دّفٍ، عِ شَ عِ مِن، بَرِ مَ نَ شُي عِ نَشَن مّشِ يِ كِ نَ قَمَ تُنّ نَن نَ.»

⁴²عَكَبُ نَشَ تٍ عَ شْنيِ عَ دّفٍدٍ نُن عَ مِندٍ، كْنْ عَننَبِ عٍلِيَ تَن نَشَ تٍ كَرٍ مٍلٍ فٍيَ قَرِ، عَ قَ عَ قٍلٍن بْشِ مَ، عَ يَتَفِ قَ لُ عَ سَنيِيٍ تَفِ.