رْ مَ 7:1-11

¹ﭑ نفَشَكٍرٍنيِيٍ، وٌ تٌ سّرِيّ كٌلٌن، وٌ مُ عَ كٌلٌن عَ سّرِيّ شَ نْي نَ مِشِ قَرِ هَن عَ شَ سِمَيَ دَندٍ فبَنسَن نّ؟

²نَ كُي، فِنّ نَشَن شَ قُتِ بَرَ شِرِ، عَ نَ قُتِ سّرِيّ بُن مَ هَن عَ شَ مْرِ شَ سِمَيَ دَن تّمُي نّ. كْنْ شَ عَ شَ مْرِ شَ سِمَيَ دَن، نَ قُتِ سّرِيّ قَن بَرَ دَن.

³شَ عَ سَ لِ عَ شَ مْرِ نَ دُنِحَ مَ، عَ تَن قَ دْشْ شّمّ فبّتّ شْن، عَ بَرَ قِندِ يّنّلَ رَ. كْنْ شَ عَ شَ مْرِ قَشَ، عَ قَن بَرَ قُلُن نَ قُتِ سّرِيّ مَ. هَلِ عَ دْشْ شّمّ فبّتّ شْن مَ كْرّ، يّنّلَ مُ عَ رَ.

⁴ﭑ نفَشَكٍرٍنيِيٍ، عَ نَ نَ كِ نّ وٌ قَن بّ. وٌ قَن بَرَ لُ عَلْ قَشَمِشِيٍ سّرِيّ تَن مَبِرِ، عَلَ شَ مِشِ سُفَندِشِ شَ قَشّ سَابُي رَ. وٌ قَ قِندِشِ فبّتّ نَن فبٍ رَ، عَ تَن نَشَن كٍلِشِ قَشَمِشِيٍ تَفِ، عَلَكٌ وٌن شَ وَلِ قَنيِ رَبَ عَلَ بّ.

⁵بَرِ مَ، وٌن تٌ نُ حّرّ مَ وٌن يّتّ وَشْنقٍ كٌبِيٍ مَ، سّرِيّ نُ وٌن بْحّ رَتٍمَ يُنُبِ رَبَقٍ مَ. وٌن تٌ نُ بِرَشِ نَ وَشْنقٍ كٌبِيٍ قْشْ رَ، نٍيٍ نُ وٌن شُن تِشِ قَشّ نَن نَ.

⁶كْنْ يَكْسِ قَ، وٌن بَرَ شْرّيَ سْتْ سّرِيّ شَ كٌنيِيَ مَ، وٌن لُ عَلْ قَشَمِشِيٍ سّرِيّ تَن مَبِرِ. نَ كُي، وٌن مُ قَ وَلِمَ عَلَ بّ عَ كّحَ قٌرِ شَ مَ سْنْن، عَلْ وٌن تٌ نُ نَ سّرِيّ سّبّشِ شَ نْي بُن مَ تّمُي نَشّ. وٌن قَ وَلِمَ عَلَ بّ عَ كّحَ نّينّ نَن نَ، عَلَ شَشِلِ سّنِيّنشِ سَابُي رَ.

⁷وٌن قَ نَ مَ دِ؟ سّرِيّ قِندِشِ يُنُبِ نَن نَ؟ عَستْقُلَهِ! سّرِيّ نَن عَ نِيَ ﭑ شَ يُنُبِ كٌلٌن، بَرِ مَ ﭑ مُ مِلَنتٍيَ كٌلٌنمَ نُ شَ سّرِيّ شَ مُ عَ قَلَ ﭑ بّ نُ، «عِ نَشَ مِلَ.»

⁸كْنْ يُنُبِ نَشَ قّيرّ سْتْ يَامَرِ رَ، عَ مِلَنتٍيَ مْولِ بِرِن نَسٌ ﭑ بْحّ مَ، بَرِ مَ سّرِيّ مُ نَ دّننَشّ، يُنُبِ قَن مُ لُمَ نَا.

⁹سِنفٍ رَ ﭑ نُ بَلٌشِ سّرِيّتَرٍيَ نَن كُي، كْنْ سّرِيّ تٌ قَ، يُنُبِ نَشَ بَلٌ ﭑ بْحّ كُي قَ، عَ ﭑ قِندِ قَشَمِشِ رَ.

¹⁰يَامَرِ نَشَن نُ لَن عَ شَ قِندِ كِسِ رَ، نَ نَشَ قِندِ ﭑ بّ قَشّ رَ،

¹¹بَرِ مَ يُنُبِ تٌ قّيرّ سْتْ يَامَرِ رَ، عَ نَشَ ﭑ مَيٍندٍن، عَ ﭑ قَشَ يَامَرِ سَابُي رَ.