تَرُشُي 5:11-41

¹¹فَاشُي شُنفبٍ نَشَ دَنشَنِيَتْي حَمَ بِرِن سُشُ، عَ نُن نَشٍيٍ بِرِن يِ قٍ مّ.

¹²كَابَنَكٌ وُيَشِ نُن تْنشُمَيٍ نُ رَبَمَ حَمَ تَفِ شّيرَيٍ سَابُي رَ. تٌفٌندِيَتْي بِرِن نُ عٍ مَلَنمَ سُلٍمَنِ شَ بُنتُنيِ رَ.

¹³مِشِ فبّتّ يٌ مُ نُ سُو سَمَ سُنبُدٍ عٍ رَ، كْنْ مِشِيٍ نُ عٍ بِنيَمَ عَ قَنيِ رَ.

¹⁴نَشٍيٍ نُ دَنشَنِيَشِ مَرِفِ مَ، شّمّيٍ نُن فِنّيٍ، عٍ كْنتِ شُن نُ مَسَمَ تّمُي بِرِن.

¹⁵نَ قٍيٍ مَ، مِشِيٍ نُ قَمَ نّ قُرٍ مَيٍ رَ سَدٍ نُن دَفِيٍ مَ كِرَ شْن، عَلَكٌ ثِيّرِ نّ دَنفِمَ تّمُي نَشّ، عَ نِينِ شَ تِ عٍ مَ.

¹⁶حَمَ نُ كٍلِمَ دَرِ سَلَمُ رَبِلِنيِ، عٍ نُ قَ قُرٍ مَيٍ رَ نُن حِننّ قُرٍ كَنيِيٍ. عٍ بِرِن نَشَ يَلَن.

¹⁷نَ تّمُي سّرّشّدُبّ كُنتِفِ، عَ نُن نَشٍيٍ نُ نَ عَ قْشْ رَ، نَشٍيٍ قِندِشِ سَدُ سٍنِيٍ رَ، عٍ نَشَ نَتّ تٌنفٌ تْونّ مَ.

¹⁸عٍ نَشَ شّيرَيٍ سُشُ، عٍ عٍ وٌلِ فٍيلِ.

¹⁹كْنْ مَرِفِ شَ مَلٍكّ نَشَ قَ كْي رَ، عَ نَشَ فٍيلِ نَادّ رَبِ، عَ قَ عٍ رَ مِنِ. عَ نَشَ عَ قَلَ عٍ بّ،

²⁰«وٌ سِفَ، وٌ سَ تِ هْرْ مْبَنشِ كُي، وٌ عَلَ شَ كِرَ نّينّ شَ قٍ بِرِن تَفِ رَبَ حَمَ بّ.»

²¹عٍ تٌ نَ مّ، عٍ نَشَ سٌ هْرْ مْبَنشِ كُي سُبَشّ مَ، عٍ كَوَندِ تِ قْلْ. سّرّشّدُبّ كُنتِفِ نُن نَشٍيٍ نُ نَ عَ قْشْ رَ، عٍ تٌ قَ، عٍ نَشَ يُوِقِ كِيتِسَيٍ نُن عِسِرَيِلَ قٌرِ بِرِن مَلَن. عٍ نَشَ مِشِيٍ رَ سِفَ شّيرَيٍ تٌنفٌدٍ فٍيلِ كُي.

²²سْرِيٍ تٌ سِفَ، عٍ مُ عٍ لِ فٍيلِ كُي. عٍ نَشَ فبِلٍن، عٍ سَ دّنتّفّ سَ.

²³عٍ نَشّ، «مُشُ بَرَ فٍيلِ لِ عَ بَلَنشِ عَ قَنيِ رَ، فٍيلِ كَنتَمَيٍ تِشِ نَادّ رَ، كْنْ مُشُ تٌ عَ رَبِ، مُشُ مُ مِشِ يٌ لِشِ عَ كُي.»

²⁴هْرْ مْبَنشِ سْورِيٍ شَ مَنفّ نُن سّرّشّدُبّ كُنتِفِيٍ تٌ نَ قٍ مّ، عٍ دّ نَشَ عِشَرَ. عٍ نُ قَ عٍ بٌرٍ مَشْرِن، «مُنقٍ يِ رَ؟»

²⁵مِشِ ندٍ نَشَ قَ عَ قَلَ عٍ بّ، «وٌ قَ عَ مَتٌ، وٌ شّمّ نَشٍيٍ سَ فٍيلِ، عٍ نَ هْرْ مْبَنشِ كُي عٍ مِشِيٍ شَرَنقٍ.»

²⁶عَوَ، سْورِ شُنمَتِ نُن عَ شَ سْورِيٍ نَشَ سِفَ، عٍ سَ قَ شّيرَيٍ رَ. كْنْ عٍ مُ عٍ سّنبّ رَ مِنِ عٍ مَ، بَرِ مَ عٍ نُ فَاشُشِ حَمَ قَ عٍ مَفْنْقٍ فّمّ رَ.

²⁷عٍ تٌ بَرَ عٍ شَنِن يُوِقِ كِيتِسَيٍ يِرٍ، سّرّشّدُبّ كُنتِفِ نَشَ عٍ مَشْرِن،

²⁸«مُشُ بَرَ وٌ رَتْن عَ شْرْشْي رَ، وٌ نَشَ شَرَنيِ رَبَ يِ شّمّ شِلِ رَ، كْنْ وٌ بَرَ وٌ شَ شَرَنيِ رَلَنتَن دَرِ سَلَمُ بِرِن نَ. وٌ وَ مَ عَ شَ قَشّ سَقٍ مُشُ تَن نَن شُن!»

²⁹ثِيّرِ نُن شّيرَيٍ نَشَ عٍ يَابِ، «عَ لَنمَ مُشُ شَ عَلَ شُي نَن نَبَتُ دَنفِقٍ مِشِيٍ شُي رَ.

³⁰وٌن بَبَيٍ مَرِفِ عَلَ بَرَ عِسَ رَكٍلِ، وٌ نَشَن قَشَ، وٌ نَشَن بَنبَن وُرِ مَ.

³¹عَلَ بَرَ عَ رَتٍ عَ يِرٍقَنيِ مَ عَ شَ قِندِ مَنفّ نُن مَرَكِسِمَ رَ، عَلَكٌ عِسِرَيِلَ شَ نْ تُوبِدٍ، عٍ شَ يُنُبِ شَ شَقَرِ.

³²مُشُ نُن عَلَ شَشِلِ سّنِيّنشِ نَ يِ قٍ سٍيدٍيٍ رَ. عَلَ شَشِلِ سّنِيّنشِ قِمَ مِشِ نَن مَ، نَشَن نَ عَ شُي رَبَتُ.»

³³عٍ تٌ يِ مَسٍنيِ مّ، عٍ نَشَ شْنْ هَن عٍ نَشَ وَ شّيرَيٍ قَشَقٍ.

³⁴كْنْ قَرِ سّنِ ندٍ نَشَن شِلِ فَمَلِيّلِ، سّرِيّ كَرَ مْشْ كُنتِفِ نَشَن نُ رَقَن حَمَ بِرِن مَ، نَ نَشَ كٍلِ يُوِقِ كِيتِسَيٍ تَفِ. عَ نَشَ يَامَرِ قِ عٍ شَ شّيرَيٍ رَ مِنِ سِندٍن.

³⁵عَوَ، عَ نَشَ عَ قَلَ كِيتِسَيٍ بّ، «عِسِرَيِلَكَيٍ، وٌ مّينِ قٍ مَ وٌ نَشَن نَبَمَ يِ مِشِيٍ رَ.

³⁶وَشَتِ دَنفِشِ شّمّ ندٍ نَشَن شِلِ تُدَ سِ نَشَ عَ يّتّ عِفبٌ. مِشِ كّمّ نَانِ نَن نُ بِرَشِ عَ قْشْ رَ، كْنْ عَ تٌ قَشَ عٍ بِرِن نَشَ يٍنسٍن يّ. عَ شَ قٍ مُ قِندِ قٍقٍ رَ.»

³⁷«نَ تٌ دَنفِ، يُدَ سِ فَلِلٍكَ نَشَ مِنِ شِلِ سّبّ تّمُي. عَ نَشَ مِشِ وُيَشِ بّندُن عَ مَ، كْنْ عَ قَن نَشَ قَشَ، عَ قْشِرَبِرّيٍ بِرِن نَشَ يٍنسٍن يّ.

³⁸يَكْسِ ﭑ عَ قَلَمَ وٌ بّ، وٌ نَشَ قٍقٍ رَبَ يِ مِشِيٍ رَ. وٌ فبِلٍن عٍ قْشْ رَ. شَ يِ قٍ بِرِن قَتَنشِ مِشِيٍ نَن نَ، عَ مُ سْونّيَمَ.

³⁹كْنْ، شَ عَ قَتَنشِ عَلَ نَن نَ، وٌ مُ نْمَ عَ شُن نَكَنَدٍ. وٌ وٌ حّرّ كِ مَتٌ عَ قَنيِ رَ، وٌ نُن عَلَ نَشَ قَ فٍرٍ.»

⁴⁰عٍ تٌ لَن قٍ كٍرٍن مَ، عٍ نَشَ شّيرَيٍ شِلِ، عٍ عٍ بْنبْ. عٍ نَشَ عٍ رَتْن وْيّنقٍ رَ عِسَ شِلِ رَ، عٍ قَ عٍ رَبّحِن.

⁴¹شّيرَيٍ تٌ مِنِ يُوِقِ كِيتِسَيٍ تَفِ، عٍ نَشَ حّلّشِن بَرِ مَ عَلَ عٍ تَن نَن سُفَندِشِ، عٍ شَ تْورْ عِسَ شِلِ شَ قٍ رَ.