تَرُشُي 19:21-27

²¹يِ قٍيٍ تٌ دَنفِ، ثْلُ نَشَ نَتّ تٌنفٌ عَ شَ سِفَ دَرِ سَلَمُ. نَ بِيَاسِ كُي قٌ عَ شَ مَسٍدٌن نُن عَكَيِ بْشِ عِبٌلٌن. عَ نَشَ عَ قَلَ، «ﭑ نَ سِفَ دَرِ سَلَمُ، قٌ ﭑ شَ رْ مَ قَن لِ.»

²²عَ نَشَ عَ مَلِمَ قِرِن شّي مَسٍدٌن، تِمٌتٍ نُن عٍرَ سِتٌ، كْنْ عَ تَن نَشَ لُ عَسِ سِندٍن.

²³نَ تّمُي سْنشْي شُنفبٍ نَشَ رَبَ نَا مَرِفِ شَ كِرَ شَ قٍ مَ.

²⁴شَبُي ندٍ، نَشَن شِلِ دٍ مٍتِرِ، عَ نُ عَلَ عَرِتٍمِ شَ سَلِدٍ مِسَالِ لَنمَدِ يَءِلَنمَ فبٍتِ رَ. نَ شَبُي مْولِيٍ نُ كْبِرِ فبٍفبٍ سْتْمَ نَ وَلِ كُي.

²⁵عَ نَشَ عَ وَلِبٌورٍيٍ مَلَن، عَ عَ قَلَ عٍ بّ، «وٌ عَ كٌلٌن، وٌن بَلٌشِ يِ وَلِ نَن كُي.

²⁶وٌ بَرَ عَ تٌ، وٌ بَرَ عَ مّ، يِ ثْلُ بَرَ مِشِ فبٍفبٍ مَدَشُ عَسِ بْشِ بِرِن مَ، عٍقّسّ فبَنسَن شَ مُ عَ رَ. عَ نَشّ عَ عَلَيٍ نَشٍيٍ رَقَلَشِ مِشِيٍ بّلّشّ رَ، عَ عَلَ مُ عٍ رَ.

²⁷نَ كُي وٌن مَ وَلِ قَمَ نّ شِلِ حَاشِ سْتْدٍ. وٌن مَ عَلَ عَرِتٍمِ شَ سَلِدٍ قَن شُن نَكَنَمَ نّ. ندٍ بَمَ نّ عَرِتٍمِ شَ بِنيّ رَ عَسِ بْشِ نُن دُنِحَ مَ.»