تَرُشُي 16:26-40

²⁶بْشِ نَشَ سّرّن كٍرٍن نَ، فٍيلِ سَنبُنيِ نَشَ عَ رَ مَشَ. نَ تّمُي كٍرٍنيِ كُي، نَادّ بِرِن نَشَ رَبِ. فٍيلِمَنِيٍ بِرِن شَ يْلْنشْنيِيٍ نَشَ مَبٌلٌن.

²⁷كْسِبِلِ نَشَ شُنُ. عَ تٌ فٍيلِ نَادّيٍ تٌ عٍ رَبِشِ، عَ نَشَ عَ شَ سَنتِدّفّمَ بّندُن عَ تّي عَ شَ عَ يّتّ قَشَ، عَ حْشْ عَ مَ عَ فٍيلِمَنِيٍ نُ بَرَ عٍ فِ.

²⁸كْنْ ثْلُ نَشَ سْنشْ عَ شُي عِتٍشِ رَ، «عِ نَشَ قٍ شْنّ نِيَ عِ يّتّ رَ، مُشُ بِرِن نَ بٍ.»

²⁹عَوَ، كْسِبِلِ تٌ تّ مَشِلِ، عَ نَشَ سٌ مَقُرٍن. عَ نَشَ عَ شِنبِ سِن ثْلُ نُن سِلَسِ بُن مَ، عَ سّرّنمَ.

³⁰عَ نَشَ عٍ رَ مِنِ، عَ عٍ مَشْرِن، «مَرِفِيٍ، عَ لَنمَ ﭑ شَ مُنسٍ رَبَ عَلَكٌ ﭑ شَ كِسِ؟»

³¹ثْلُ نُن سِلَسِ نَشَ عَ يَابِ، «عِ شَ دَنشَنِيَ مَرِفِ عِسَ مَ. نَ نَن عَ تٌمَ عِ كِسِمَ، عِ تَن نُن عِ شَ دٍنبَيَ.»

³²عٍ نَشَ مَرِفِ شَ وْيّنيِ مَسٍن عَ بّ عَ نُن عَ شَ مِشِيٍ.

³³عَ نَشَ عٍ شَنِن عَ شُن مَ كٍرٍن نَ كْي كُي، عَ نَشَ عٍ شَ قِيٍ يَيٍ شَ. نَ وَشَتِ يَتِ عَ نَشَ شُنشَ يٍ شْورَ، عَ تَن نُن عَ شَ مِشِ بِرِن.

³⁴عَ نَشَ عٍ يِفِيَ عَ شَ بَنشِ كُي، عَ مَن قَ دٌنسٍ قِ عٍ مَ. عَ نَشَ حّلّشِن عَ قَنيِ رَ، عَ نُن عَ شَ دٍنبَيَ بِرِن بَرِ مَ عٍ بَرَ دَنشَنِيَ عَلَ مَ.

³⁵كُيٍ تٌ عِبَ، كِيتِسَيٍ نَشَ سْورِيٍ شّي عٍ شَ سَ عَ قَلَ كْسِبِلِ بّ عَ شَ نَ مِشِيٍ رَبٌلٌ.

³⁶كْسِبِلِ نَشَ عَ قَلَ ثْلُ بّ، «كِيتِسَيٍ بَرَ شّيرَ تِ عَ وٌ شَ رَبّحِن. عَوَ، يَكْسِ وٌ مِنِ، وٌ شَ سِفَ بْحّسَ كُي.»

³⁷كْنْ ثْلُ نَشَ عَ قَلَ سْورِيٍ بّ، «مُشُ تَن نَشٍيٍ قِندِشِ رْ مَكَيٍ رَ، عٍ بَرَ مُشُ سَ فٍيلِ عٍ مُ مُشُ مَكِيتِ. عٍ نَشَ مُشُ سَ فٍيلِ، يَكْسِ عٍ وَ مَ مُشُ رَ مِنِقٍ فُندٌ رَ؟ نَ مُ لَنمَ قٍوٌ! عٍ يّتّ يَتِ نَن قَمَ مُشُ رَبٌلٌدٍ.»

³⁸سْورِيٍ نَشَ يِ وْيّنيِيٍ رَفبِلٍن كِيتِسَيٍ مَ. عٍ تٌ عَ مّ عَ رْ مَكَيٍ نَن عٍ رَ، عٍ نَشَ فَاشُ.

³⁹عٍ نَشَ قَ عٍ مَيَندِ، عٍ عٍ رَبٌلٌ. عٍ قَن نَشَ عٍ مَشَندِ عَ عٍ شَ كٍلِ نَ تَا.

⁴⁰عٍ تٌ مِنِ فٍيلِ كُي، عٍ نَشَ سٌ لِدِ شْنيِ. عٍ تٌ بَرَ فّ عٍ نفَشَكٍرٍنيِيٍ رَلِمَنِيَدٍ، عٍ نَشَ سِفَ.