تَالِيٍ 21:5-29

⁵وَكِلِلَ هَرِفٍ شُن مَسَمَ نّ، كْنْ فبَتَ فبٍفبٍ قِندِ مَ تْورّ نَن نَ.

⁶هَرِفٍ نَشَن سْتْشِ وُلٍ رَ، عَ مُ بُمَ، عَ مِشِ شَنِنمَ نّ عَلِفِيَمَ.

⁷مِشِ حَاشِيٍ شُن نَكَنَمَ نّ، بَرِ مَ عٍ مُ تِنشِنيِ رَبَتُمَ.

⁸مِشِ كٌبِ مُ تِنشِن، كْنْ مِشِ قَنيِ عَ حّرّ مَ كِرَ تِنشِنشِ شْن مَ.

⁹لُقٍ رَ بَنشِ قَرِ مَ، عَ قِسَ لُقٍ رَ فِنّ فٍرٍ سٌي سّيتِ مَ بَنشِ كُي.

¹⁰مِشِ حَاشِ وَ مَ قٍ حَاشِ نَن تُن شْن مَ. عَ مُ كِنِكِنِمَ مِشِ يٌ مَ، هَلِ دْشْبٌورٍ.

¹¹شَشِلِتَرٍ نَ عَ تٌ عٍ مِشِ مَيٍلٍ حَشَنكَتَمَ، عَ شَشِلِ دِ سْتْمَ نّ، كْنْ شَشِلِمَ تَن قَهَامُي سْتْمَ لْننِ نَن كُي.

¹²عَلَ نَشَن تِنشِن، عَ مِشِ حَاشِ مَتٌمَ نّ، عَ عٍ شُن نَكَنَ.

¹³مِشِ نَشَن تٌندِ مَ عَ تُلِ مَتِدٍ سٍتَرٍ وَ شُي رَ، عَ قَن قَمَ نّ وَدٍ، مِشِ مُ عَ تُلِ مَتِمَ عَ رَ.

¹⁴بْحّتٍ كِقٍ فُندٌ رَ، عَ بْحّ رَفٌرٌ مَ نّ. مِشِ كِقٍ سُتُرّ رَ، عَ شَ شْنّ مَفٌرٌ مَ نّ.

¹⁵حّرّقٍ تِنشِنيِ كُي، نَ قِندِشِ سّيوّ نَن نَ تِنشِنتْي بّ، كْنْ نَ حّرّ كِ مْولِ مُ رَقَن مِشِ حَاشِ مَ.

¹⁶مِشِ نَشَن فبِلٍنمَ كِرَ قَنيِ قْشْ رَ، نَ قَمَ نّ لُدٍ مِشِ قَشَشِيٍ يَ مَ.

¹⁷مِشِ نَشَن بِرَ مَ عَ وَشْنقٍ فبَنسَن قْشْ رَ، نَ لُمَ نّ سٍتَرٍحَ كُي. مِشِ نَشَن وّنِ نُن دٌنسٍ قَنيِ تُن قٍنمَ، نَ مُ بَننَمَ.

¹⁸مِشِ حَاشِ قِندِ مَ تِنشِنتْي شُنسَرٍ نَن نَ، يَنقَنتٍ قِندِ مِشِ قَنيِ شُنسَرٍ رَ.

¹⁹لُقٍ رَ فبٍنفبٍرٍنيِ مَ، عَ قِسَ لُقٍ رَ فِنّ قِتِنّتْي سّيتِ مَ.

²⁰هَرِفٍ قَنيِ نُن تُرٍ فبٍفبٍ نَ لْننِلَ شْنيِ، كْنْ لْننِتَرٍ بَرَ عَ فبٍ بِرِن دٌن.

²¹مِشِ نَشَن بِرَ مَ تِنشِنيِ نُن هِننّ قْشْ رَ، عَ سِمَيَ، كِيتِ قَنيِ، نُن بِنيّ سْتْمَ نّ.

²²لْننِلَ نْمَ نّ نْدٍ تَا مَكَنتَشِ رَ، عَ عٍ شَ تّتّ رَبِرَ عٍ شَشِلِ نُ تِشِ نَشَن نَ.

²³مِشِ نَشَن قَتَ عَ دّ سُشُدٍ، نَ مُ تْورْ مَ.

²⁴يّتّ عِفبٌي يٌمَ نّ مِشِيٍ مَ، عَ قٍ بِرِن سُشُمَ نَ شَشِلِ نَن نَ.

²⁵مِشِ تُننَشْنْشِ وَشْنقٍ عَ قَشَمَ نّ، بَرِ مَ عَ مُ تِنمَ وَلِدٍ.

²⁶لْشْي بِرِن مِشِ تُننَشْنْشِ مِلَمَ نّ عَ وَشْنسٍ مَ. تِنشِنتْي تَن مِشِ كِمَ عَ فبٍ سٍ بِرِن نَن نَ.

²⁷مِشِ حَاشِ شَ سّرّشّ مُ رَقَن عَلَ مَ. شَ عَ سَ عَ بَ مَحْشُنيِ كٌبِ رَ، عَلَتَلَ شَ شْنّ شُن مَسَمَ نّ.

²⁸سٍيدٍ وُلٍ قَلّ هَلَكِمَ نّ، كْنْ سٍيدٍ نْندِ قَلّ شَ سِمَيَ نَن بُمَ.

²⁹مِشِ حَاشِ عَ يَتَفِ عِقْورْ مَ، كْنْ تِنشِنتْي قٍ تِنشِنشِ نَن نَبَمَ.