تَالِيٍ 13:6-24

⁶تِنشِنيِ تِنشِنتْي مَكَنتَمَ نّ، قٍ حَاشِ يُنُبِتْي تَن نَهَلَكِمَ نّ.

⁷مِشِ ندٍ عَ يّتّ قِندِ مَ بَننَ نَن نَ، كْنْ سٍسٍ مُ عَ يِ رَ. بٌورٍ تَن عَ يّتّ قِندِ مَ سٍتَرٍ نَن نَ، كْنْ هَرِفٍ فبٍفبٍ نَ عَ يِ رَ.

⁸بَننَ شَ كْبِرِ عَ شُن سَرَ مَ مِشِ كٌبِيٍ مَ، كْنْ مِشِ كٌبِيٍ مُ سٍسٍ قٍنمَ سٍتَرٍ رَ.

⁹تِنشِنتْي لُشِ نّ عَلْ لَنثُي دّشّشِ، مِشِ حَاشِ تَن شَ لَنثُي شُبٍنمَ نّ.

¹⁰يّتّ عِفبٌحَ فٍرٍ نَن نَبُلَمَ، كْنْ مَرَ سِ رَ مّقٍ قِندِ مَ لْننِ نَن نَ.

¹¹هَرِفٍ نَشَن سْتْمَ تِنشِنتَرٍيَ كُي، عَ سِفَمَ شُرُن نَ نّ، كْنْ هَرِفٍ نَشَن سْتْمَ دْيِ دْيِ تِنشِنيِ كُي، نَ سِفَمَ فبٌ رَ نّ.

¹²شَ مِشِ مُ عَ وَشْنقٍ سْتْمَ، عَ تْورْ مَ نّ، كْنْ شَ عَ سْتْ، عَ سّيوَ مَ نّ دُنِحّءِفِرِ كُي.

¹³مِشِ نَشَن يٌمَ مَرَ سِ مَ، عَ نَ سَرٍ سْتْمَ نّ، نَشَن تَن مَرَ سِ بِنيَمَ، نَ قَمَ نّ سَرٍ قَنيِ سْتْدٍ.

¹⁴شَشِلِمَ شَ مَرَ سِ قِندِ مَ سِمَيَ نَن نَ، عَ مِشِ رَتَنفَمَ فَنتَنيِ حَاشِ مَ.

¹⁵قَهَامُي قِندِ مَ هِننّ نَن نَ مِشِ بّ، كْنْ مِشِ حَاشِ تَن شَ كِرَ شْرْشْ.

¹⁶شَشِلِمَ عَ شَ لْننِ رَوَلِمَ، كْنْ شَشِلِتَرٍ دَشُحَ نَن تُن قُنقُنمَ.

¹⁷شّيرَ تِنشِنتَرٍ قِندِ مَ تْورّ نَن سَابُي رَ، شّيرَ تِنشِنشِ تَن قَمَ يَلَنيِ نَن نَ.

¹⁸مِشِ نَشَن تٌندِ مَ مَرَ سِ رَ، عَ سٍتَرٍحَ نُن يَافِ سْتْمَ نّ، كْنْ نَشَن مَرَ سِ رَ مّمَ، عَ بِنيّ نَن سْتْمَ.

¹⁹عَ حْشُن، مِشِ وَشْنقٍ نَ رَبَ عَ بّ، كْنْ شَشِلِتَرٍ مُ تِنمَ فبِلٍندٍ عَ وَشْنقٍ حَاشِ قْشْ رَ.

²⁰مِشِ نَ لُ شَشِلِمَ قْشْ رَ، عَ قَن شَشِلِ سْتْمَ نّ، كْنْ لْننِتَرٍيٍ شَ مَلَن بٌورٍحَ، قِندِ مَ تْورّ نَن تُن نَ.

²¹يُنُبِتْي سَرٍ قِندِ مَ قٍ حَاشِ نَن نَ، تِنشِنتْي تَن سَرٍ قِندِ مَ هّيرِ نَن نَ.

²²مِشِ قَنيِ كّ لُمَ عَ شَ مَمَدِيٍ نَن بّ، يُنُبِتْي تَن كّ لُمَ تِنشِنتْييٍ نَن بّ.

²³بَلٌي فبٍفبٍ مِنِمَ نّ سٍتَرٍ شَ شّ مَ، كْنْ تِنشِنتَرٍيَ لُمَ نّ كَسَرَ رَ.

²⁴بَبّ نَشَن مُ عَ شَ دِ شُرُ مَ لُشُسِنيِ رَ، نَ دِ مُ رَقَن عَ مَ. بَبّ نَشَن عَ شَ دِ شُرُ مَ، نَ دِ رَقَن عَ مَ.