Text copied!
CopyCompare
תנ ך עברי מודרני - תְהִלִּים - תְהִלִּים 119

תְהִלִּים 119:126-160

Help us?
Click on verse(s) to share them!
126עת לעשות ליהוה הפרו תורתך׃
127על כן אהבתי מצותיך מזהב ומפז׃
128על כן כל פקודי כל ישרתי כל ארח שקר שנאתי׃
129פלאות עדותיך על כן נצרתם נפשי׃
130פתח דבריך יאיר מבין פתיים׃
131פי פערתי ואשאפה כי למצותיך יאבתי׃
132פנה אלי וחנני כמשפט לאהבי שמך׃
133פעמי הכן באמרתך ואל תשלט בי כל און׃
134פדני מעשק אדם ואשמרה פקודיך׃
135פניך האר בעבדך ולמדני את חקיך׃
136פלגי מים ירדו עיני על לא שמרו תורתך׃
137צדיק אתה יהוה וישר משפטיך׃
138צוית צדק עדתיך ואמונה מאד׃
139צמתתני קנאתי כי שכחו דבריך צרי׃
140צרופה אמרתך מאד ועבדך אהבה׃
141צעיר אנכי ונבזה פקדיך לא שכחתי׃
142צדקתך צדק לעולם ותורתך אמת׃
143צר ומצוק מצאוני מצותיך שעשעי׃
144צדק עדותיך לעולם הבינני ואחיה׃
145קראתי בכל לב ענני יהוה חקיך אצרה׃
146קראתיך הושיעני ואשמרה עדתיך׃
147קדמתי בנשף ואשועה לדבריך יחלתי׃
148קדמו עיני אשמרות לשיח באמרתך׃
149קולי שמעה כחסדך יהוה כמשפטך חיני׃
150קרבו רדפי זמה מתורתך רחקו׃
151קרוב אתה יהוה וכל מצותיך אמת׃
152קדם ידעתי מעדתיך כי לעולם יסדתם׃
153ראה עניי וחלצני כי תורתך לא שכחתי׃
154ריבה ריבי וגאלני לאמרתך חיני׃
155רחוק מרשעים ישועה כי חקיך לא דרשו׃
156רחמיך רבים יהוה כמשפטיך חיני׃
157רבים רדפי וצרי מעדותיך לא נטיתי׃
158ראיתי בגדים ואתקוטטה אשר אמרתך לא שמרו׃
159ראה כי פקודיך אהבתי יהוה כחסדך חיני׃
160ראש דברך אמת ולעולם כל משפט צדקך׃

Read תְהִלִּים 119תְהִלִּים 119
Compare תְהִלִּים 119:126-160תְהִלִּים 119:126-160