Ʒare Biri 24:1-25

¹Eme Bileam e Israe ŋic jambuŋ‐jopaocte Wofuŋzi maname sâckekac, iŋuc mana tarahuc sowi wiac moc hone manac eocte mi rahuc mâc mâreŋ burocnaopec ʒâŋe fime rawec.

²Ehuc Israe ŋic gurune gurune teuŋ âterâ fopie honec‐jopawec. Erâ Anuture Mârozi erao waharâ neŋgoc ŋecnehame

³jambuŋdâŋ ʒuhuckerâ kecʒiŋuc muwec: “Bileam no Beorore ŋokâ, no ʒâŋe‐nane bâtâcnekicne.

⁴No Anuture dâŋ manahuc tâpiri rune ere mu bararuŋ dâŋ hone manac ekopac; no mâreŋko fodapehape maŋʒâŋe‐nane tâcnewec noni hâcne ʒiŋuc mukopac:

⁵O Jakobo, boze wiacge i biaŋne jâmbâŋ! O Israe, ŋeŋe tomage i aŋac ʒizine!

⁶I wâneŋ qaratiekicne fokac iŋucne, â jufu gie opâ heririŋnao fokac irec sac, i ʒineaŋ saŋkarac âsu biaŋ Wofuŋzi sarawec iŋucne, â jâmâzâc jâc opâo domakac irec sâc.

⁷Jambuŋ‐ticnezi ine opâ pake fusucmarâ qâmbâriŋkeekac irec sâc, â guec mâriri‐ticnezi opâ moc mi basaocmu. Ŋicwofuŋ‐ticne e ŋicwofuŋ Agagere sâc sirickeocmu â uucmaŋ‐ticnezi ferâ foocmu.

⁸Aigita mâreŋkonec jowa wefuwec Anutu eki hâcne kâte bulimakaore ʒuŋe iŋucne tâpiri‐ticne erâ jukac. E ŋic gurune gurune râsifâc‐ticne imac‐jopa‐fârewec, ehuc siec wiac‐jeŋic henʒaŋ qanʒaŋne‐fârerâ tepe motec‐ticnezi muruc‐jopa‐fârewec.

⁹E laioŋ ŋicne iŋucne wahawec fokac, erâ laioŋ ŋokacne irec sâc; mo ŋiczi sâcne suruckeocmu? Moc e go jambuŋguocmu e jambuŋkezo, â moc e go sâwecguocmu e wâc sâweckezo.”

¹⁰Eme Balake e dâŋ i manarâ bune qâoriŋkeme Bileam me pocpoc qacnerâ ʒiŋuc âzâcnewec: “No râsifâc‐nane sâwec‐jopacte hefârecgupo, goki ine ware jambuŋ‐jopatec mi arec jahec â moc ezejec i!

¹¹Irec ʒi mâreŋgao wiserâ rac me! No ʒiŋuc hâcne gazapo: ‘No sâsecguhuc furine garepemu,’ ʒi ine Wofuŋzi mu hezuc egarekacte foocmu.”

¹²Iŋuc mume Bileamzi ʒiŋuc âzâcnewec: “Kiŋaŋŋicfâcge sorec‐jopatec fâmbiŋ jaŋe ʒiŋuc jazapo i:

¹³‘Balake e ficticnao siliwa â gol fusucmarâ fokac i nare tahac eocmuo ine no sifu Wofuŋte dâŋ huckerâ nahacne maŋte wiac biaŋne me sâqocne moc mi epemu. Wofuŋzi dâŋ nazaocmu i sawa mupemu.’

¹⁴No ʒi ŋicfâc‐nane jaŋerao risiepemu, irec ŋicguru ʒi jaŋe juku ʒâhec ŋicfâcge weniŋuc ejareniŋmu irec dâŋ gazape manac.”

¹⁵Eme Bileam e jambuŋdâŋ‐ticne ʒuhuckerâ kecʒiŋuc muwec: “Bileam no Beorore ŋokâ, no ʒâŋe‐nane bâtâcnekicne.

¹⁶No Anuture dâŋ manahuc, Fekicne sâkore mamana biri kâuc mi baekopac. No tâpiri rune ere mu bararuŋ dâŋ hone manac ekopac, no mâreŋko fodapehape maŋʒâŋe‐nane tâcnewec noni hâcne ʒiŋuc mukopac:

¹⁷Jakoboraonec bâpiŋ moc fuazokac, â Israe kikefuŋkonec ŋicwofuŋ moc fisizokac. E hâcne honezo ekopac, erâ ʒiŋuczia mâcne, e ʒoricko juhame erao ʒâŋe fipe rakac. E fuarâ Moabi ŋic qa imac ejareocmu, â Sefere ɋâricfâc jopa qâtâtiec ejareocmu.

¹⁸E Edomŋic jaŋere mâreŋ ro rauc eocmu, â Seiri râsifâc‐ticne jaŋe wâc jowac roocmu. Israe ŋic jaŋe ine sanaŋkerâ juniŋmu.

¹⁹Ŋicwofuŋ e Jakoboraonec fuarâ hae sâkoo soŋkerâ juraniŋmu jaŋe imac‐jopaocmu.”

²⁰Bileam e iŋuc murâ Amaleke ŋic honec‐joparâ dâŋticne ʒuhuckerâ kecʒiŋuc muwec: “Amaleke ŋiczi, ŋic gurune gurune jaŋere micne erâ jumbiŋ, jaŋe hâcne imac‐jopapie omaenʒoŋgopieŋ.”

²¹Iŋuc murâ Keniŋic honec‐joparâ dâŋticne ʒuhuckerâ kecʒiŋuc muwec: “Fic hae‐ŋeŋic sanaŋne ŋerakac, â sareŋ‐ŋeŋic i qânâ faio râe rakicne.

²²Ehame Kaiŋte qâjâpecfâc ŋoŋe sifu omae‐fâreniŋmu. Manaŋgopieŋ, dameŋ mi ʒoraha Asihuru ŋic jaŋe kâpâcwâru bacŋopa raniŋmu.”

²³Iŋuc murâ dâŋticne ʒuhuckerâ ʒiŋuc muwec: “Jei, Anutuzi wiac i mume fuaha mozi sâcne juocmu?

²⁴Kitim mâreŋkonec ine woke wiac fisirâ Asihuru â Ebere ŋic imac‐jopaniŋmu wâc.”

²⁵Bileam e iŋuc muhuc faharerâ mâreŋ‐ticnao risiewec; ehame Balake e wâc iŋuc jaha hae‐ticnao risierâ rawec.