Ʒare Biri 22:10-39

¹⁰Eme Bileamzi Anutu dâŋ ʒiŋuc bâtikiecnewec: “Ziporore ŋokâ Balake, Moabi ŋicwofuŋ hâcne, e norao dâŋ ʒiŋuc muhuc râeme warejec:

¹¹‘Manakic, Aigita mâreŋkonec ŋicguru moc jaŋe warerâ mâreŋ sâcke‐fâreŋgopieŋ. Irec goki ware nore erâ sâwec‐jopatec rokawepie sâcne mecne jopa jâpec ejarepene behec‐nâponiŋmu.’”

¹²Anutuzi ine Bileam kecʒiŋuc âzâcnewec: “Go jaŋehec mi razemec, erâ ŋicguru keci jaŋe jambuŋ‐jopakicnere mi sâwec‐jopazemec.”

¹³Iŋuc mume Bileam e furicte faharerâ Balake ŋicfâcne ʒiŋuc jazawec: “Wofuŋzi ŋoŋehec mi rapere qatara‐narejecte ŋoŋe mâreŋ‐ŋeŋicko risieniŋ.”

¹⁴Iŋuc mume Moabi ŋic micne jaŋe fahare Balakerao risie rarâ ʒiŋuc âzâcnembiŋ: “Bileam e nâŋehec wareocte mi ecnekac.”

¹⁵Eme Balake e harierâ ŋic fekicne bocjaha ʒâŋe biŋe sâkohec sorec‐jopame rambiŋ.

¹⁶Rahuc juku Bileamtao fisirâ ʒiŋuc âzâcnembiŋ: “Ziporore ŋokâ Balake e ʒiŋuc mukac: ‘Go norao warezo etec wiac moczi aka moc mi hegarezejec.

¹⁷No sâsecgu‐jâmbâŋkehuc wiac irec me irec numu‐naretec sâcne epemu, irec go ware nore erâ ŋicguru keci jaŋe sâwec‐jopazemec.’”

¹⁸Bileam eki ine Balake kiŋaŋŋicfâcne dâŋ ʒiŋuc muhuc bâtikie‐jarewec: “Balake e ficticnao siliwa â gol fusucmarâ fokac i nare tahac eocmuo ine no sifu wiac piticne me kâcɋenere erâ Wofuŋ Anutu‐nanere dâŋ sâcne mi qatarapemu.

¹⁹Erâ ŋoŋe sifu ʒira foniŋ, eme no Wofuŋzi dâŋ weniŋuc ʒuhuckerâ nazaocmu i manazepac.”

²⁰Eme Anutuzi ŋafeo Bileam fuacnerâ ʒiŋuc âzâcnewec: “Ŋic jaŋe jowacguzo warembieŋko ine faharerâ jaŋehec rac; mâc noni dâŋ gazapemu i sawa ezemec.”

²¹Eme Bileam e hae fureme faharerâ doŋgi‐ticnao sate râerâ Moabi ŋic fekicne jaŋehec rawec.

²²Rame Anutuzi aarickewec. Ehame Wofuŋte aŋelo aka hecnehuc hata âte bâzickecnewec. Bileam e ine kiŋaŋŋic jahec‐ticne bâjâpehapire doŋgi faio rawec.

²³Eme doŋgi e Wofuŋte aŋelozi ʒika barâ hatao domaha honewec; honehuc hata kizurâ giegaŋko raʒiwec. Eme doŋgi e mocwâc hatao risieocte Bileamzi qawec.

²⁴Eme aŋelozi ra waiŋ gie ŋoŋondeŋko hata gâŋgâŋnao domawec, ŋifec â ŋifec ira ine saczi orâŋke‐fârekicne.

²⁵Ehame doŋgi e Wofuŋte aŋelo honerâ sac jâŋâhuc rame saczi Bileam kikene najacnewec. Iŋuc eme Bileamzi doŋgi mocwâc qawec.

²⁶Eha Wofuŋte aŋelozi ʒuhuckerâ bânie ra hata gâŋgâŋne fowec ira domawec. Ŋondeŋ ira domahuc qanaopec me fâreopec foc fotikic sâcne mi eene.

²⁷Ira hâcne doŋgizi Wofuŋte aŋelo honerâ hata razo eipierâ mâreŋko waha fowec. Bileamzi iŋuc honerâ boc aarickeme ɋaruc‐ticnezi doŋgi mocwâc qawec.

²⁸Iŋuc eme Wofuŋzi doŋgi micne baafeckeme Bileam dâŋ ʒiŋuc âzâcnewec: “No wemo wiac moc egarepe honehuc nutecne arec jahec â moc ekac?”

²⁹Iŋuc mume Bileamzi doŋgi ʒiŋuc âzâcnewec: “Go âke sisic boc enarehuc jukomec. Manakic, no sâqe bajurâ muzac ʒine hâcne âke‐hâmocguzapo.”

³⁰Eme doŋgizi Bileam ʒiŋuc âzâcnewec: “No gore doŋgi mocwâc mi ekopac, â nore faio rac warec ehuc jumeŋzi miŋecgac wâc mi jukomec me? No gore mic reŋkehuc wamane moc mi jupo me?” Iŋuc mume Bileamzi muwec: “Misac!”

³¹Iŋuc muhame Wofuŋzi Bileam ʒâŋe‐ticne bâtâcneme Wofuŋte aŋelozi ʒika barâ hatao domaha honehuc fodapecnerâ mâreŋko hetutuckewec.

³²Iŋuc eme Wofuŋte aŋelozi kecʒiŋuc âzâcnewec: “Go wemocte doŋgige qatec arec jahec â moc ejec? Manakic, go hata hehesicne rakomecte no aka hegarezore fua‐garepac.

³³Eme doŋgizi honecnurâ hata kizuhuc rame arec jahec â moc ejec. E hata mi kizume muzac no ʒi e akickehuc go qâhâmocguzapo.”

³⁴Iŋuc mume Bileamzi Wofuŋte aŋelo ʒiŋuc âzâcnewec: “Go râsi enarehuc hatao domamec i mi hone tarahuc wiac epe sâqorejec. Irec wiac epac i manatec sâqorekacko risiezepac.”

³⁵Eme Wofuŋte aŋelozi Bileam dâŋ ʒiŋuc bâtikiecnewec: “Go ŋic jaŋehec rac, mâc noni dâŋ gaza mutâc epemu i sawa muzemec.” Iŋuc âzâcneme Bileam e Balakere ŋic fekicne jaŋehec rawec.

³⁶Eme Balake e Bileamzi warehuc jukac, biŋe iŋuc manarâ Ari‐Moabi haeo bâfuaocte rawec. Hae izi ine mâreŋ qaŋeŋnao jâmbâŋ Aronoŋ opâzi mâreŋ ma ekac ira ŋewec.

³⁷Eme Balakezi Bileam bâfuarâ kecʒiŋuc âzâcnewec: “No hefârecguhuc ŋic sorec‐jopape fâpie wemocte mi waremeŋ? Me manatec sâsecguhuc furine sâcne mi garepemu me?”

³⁸Iŋuc mume Bileamzi dâŋ ʒiŋuc bâtikiecnewec: “No gorao warepac i mi honekic me? Erâ ʒi no nahacne maŋte wiac irec me irec dâŋ moc mupemurâ tâpiri fonarekac me? Aricne, Wofuŋzi mutâcne‐nareme sâc sawa mupemu.”

³⁹Iŋuc murâ Balakehec raku Kiriati‐Huzo haeo fisipic.