3I mumupaŋte erâ me buafec faio taha rârâe irec erâ me hombaŋ dameŋ‐ŋeŋicte erâ Wofuŋte maio âsu biaŋ fuaocte bulimakao me lama moc qowi bâzire biŋe rikeniŋmu hâcne.
4Ŋoŋe iŋuc ehuc taha bâzire wiac kecʒiŋuc ʒuhuckerâ râenʒepieŋ: Oto moc irecnec poroŋ uucne teŋkonec wâŋ wokemaŋ opâhec bâsifuckekicne.
5Erâ lama taha bâzire biŋe râeniŋmu sâc ine waiŋzi taha bâzi i fifia râqâc irecnec teŋkonec 4 irec sâc mâmâc râenʒepieŋ.
6Me lama ŋicne moc râeniŋmuo ine oto moc irec poroŋ uucne teŋkocne 2 wokemaŋ opâhec bâsifuckekicne i mâmâc râenʒepieŋ.
7Erâ waiŋzi taha bâzi ine fifia râqâc irecnec teŋkonec 3 râenʒepieŋ. Ŋoŋe iŋuc râepie Wofuŋte maio âsu biaŋ fuaocmu.
8Me bulimakao ŋicne moc qowi bâzire biŋe, me mumupaŋ‐ŋeŋiczi fârinehec eocte irec biŋe, me wama bâzire biŋe Wofuŋ rikecnezo murâ,
9ine oto moc irecnec poroŋ uucne teŋkonec 3 wokemaŋ opâhec bâsifuckekicne i mâmâc râenʒepieŋ.
10Erâ waiŋzi taha bâzi ine waiŋ fifia râqâc irecnec teŋkonec 5 râenʒepieŋ wâc. Wiac i sasawa rike râec epie Wofuŋte maio âsu biaŋ fuaocmu.
11“Ŋoŋe bulimakao me lama ŋicne me lama â noniŋ motecne taha bâzire biŋe rikekuc iŋuc hâcne enʒepieŋ.
12Erâ qowi rike râec eniŋmu sâc ijaha wiac gâcne râenʒepieŋ.
13Mâreŋ rune ŋoŋe Wofuŋte maio âsu biaŋ fuaocte taha bâzi iŋuc hâcne rikenʒepieŋ.
14Me ŋic jabane moczi ŋondeŋ‐ŋeŋicko juocmu, me ŋic moczi ŋoŋehec raŋqa juwefuhuc Wofuŋte maio âsu biaŋ fuaocte taha bâzi rikezo murâ ine ŋoŋe eeŋgopieŋ ijaha ehuc rikezejec.
15Ŋic jabane ŋoŋehec jueŋgopieŋ â mâreŋ rune ŋoŋere dâŋsanaŋ i mocjaha erâ mimiŋzi ɋâric foŋare rahuc juzejec. Ŋoŋe mâmâc Wofuŋte maio sâc mocjaha erâ junʒepieŋ.
16Ŋic jabane ŋondeŋ‐ŋeŋicko jueŋgopieŋ â mâreŋ rune, ŋoŋere sâcmutâc â mumutâc dâŋ mocjaha foŋarezejec.”
17Eme Wofuŋzi ʒuhuckerâ Mose kecʒiŋuc âzâcnewec:
18“Go Israe ŋic ʒiŋuc jazac: No mâreŋ jowac‐ŋopa rapemu ira fisirâ
19mâreŋ irec mazu mâriri nâ bac ehuc ine Wofuŋ taha bâzi râcnenʒepieŋ wâc.
20Nânâ bâbâni nâniŋmu irec poroŋ moc barâ tahare biŋe râenʒepieŋ; gie ɋârionec nânâ wiac gâcne tahare biŋe râeniŋmu irec sâc râenʒepieŋ.
21Ŋoŋe mimiŋzi ɋâric iŋuc erâ Wofuŋ taha bacne rahuc junʒepieŋ.
22“Ŋoŋe Wofuŋzi Mose sâcmutâc dâŋ râcne‐fârewec i mi mana tarahuc âte sifuckeniŋmuo
23ine Wofuŋzi qanaŋ fuŋkerâ sâcmutâc dâŋ Mosere micko râehuc mimiŋzi ɋâric mutâcne‐ŋare warehuc juwec,
24i kikefuŋ jaŋe mi mana tarahuc âte sifuckembiŋko ine jaŋe sasawa bulimakao ŋicnezi motecne moc qowi bâzire biŋe rikepie Wofuŋte maio âsu biaŋ fuazejec, ehame taha bâzire wiac â waiŋzi taha bâzi i mumutâc dâŋte sâcko mâmâc râenʒepieŋ, ehuc sâqocne tâtâmire tahare biŋe noniŋ ŋicne moc râenʒepieŋ wâc.
25Eme jaŋe mi mana tarahuc bâbâsifuc bâfuambiŋ erâ bâbâsifuc‐jeŋic irec erâ taha bâzi‐jeŋic râehuc Wofuŋ bâzi rikecnembiŋte taha bapazi kikefuŋ sasawa kiwiric‐jeŋic rome sâqocne‐jeŋic tâmirezejec.
26Israe kikefuŋ jaŋe mecne erâ ŋondeŋ‐ŋeŋicko ŋic jabane jueŋgopieŋ jaŋe mecne mâmâc sasawa bâbâsifuc bâfuambiŋte iŋuc hâcne fua‐jarezejec.
27“Ŋic moc e mi mana tarahuc bahac moc bâfuaocmu e sâqocne tâtâmire tahare biŋe noniŋ ŋokacne moc jara‐ticne wâŋ ekicne râezejec.
28Iŋuc eme taha bapazi Wofuŋte maio kiwiric‐ticne rome sâqocne‐ticne tâmirezejec.
29Mi mana tarahuc bahac bâfuaniŋmu, Israe ŋic me ŋondeŋ‐jeŋicko ŋic jabane jueŋgopieŋ, jaŋere sâcmutâc dâŋ mocjaha fuarâ fozejec.
30Israe ŋic me ŋic jabane moczi bahac mana afeckerâ bâfuahuc Wofuŋ bunao baocmu e ine ŋic âgofâcne jaŋere ŋondeŋkonec bâsirowezo.
31E Wofuŋte dâŋ qâsuahuc sâcmutâc dâŋticne qatarawecte bâsirowe‐jâmbâŋkezo hâcne, e kiŋticnere okacne buc rozejec.”
32Israe ŋic jaŋe mâreŋ burocnao juhuc ŋic moc sabata hombaŋko ʒoc rohuc juhame bâfumbiŋ.
33Bâfuarâ Mose â Aroŋ erâ kikefuŋ sasawa jaŋerao jowa rambiŋ.
34Eme ŋic iŋucne weniŋuc ecnezo irec mumutâc dâŋ moc mi fowecte mâc kâpâcwâru bapie ŋewec.
Ʒare Biri 15
Ʒare Biri 15:3-34