Ʒare Biri 15:22-41

²²“Ŋoŋe Wofuŋzi Mose sâcmutâc dâŋ râcne‐fârewec i mi mana tarahuc âte sifuckeniŋmuo

²³ine Wofuŋzi qanaŋ fuŋkerâ sâcmutâc dâŋ Mosere micko râehuc mimiŋzi ɋâric mutâcne‐ŋare warehuc juwec,

²⁴i kikefuŋ jaŋe mi mana tarahuc âte sifuckembiŋko ine jaŋe sasawa bulimakao ŋicnezi motecne moc qowi bâzire biŋe rikepie Wofuŋte maio âsu biaŋ fuazejec, ehame taha bâzire wiac â waiŋzi taha bâzi i mumutâc dâŋte sâcko mâmâc râenʒepieŋ, ehuc sâqocne tâtâmire tahare biŋe noniŋ ŋicne moc râenʒepieŋ wâc.

²⁵Eme jaŋe mi mana tarahuc bâbâsifuc bâfuambiŋ erâ bâbâsifuc‐jeŋic irec erâ taha bâzi‐jeŋic râehuc Wofuŋ bâzi rikecnembiŋte taha bapazi kikefuŋ sasawa kiwiric‐jeŋic rome sâqocne‐jeŋic tâmirezejec.

²⁶Israe kikefuŋ jaŋe mecne erâ ŋondeŋ‐ŋeŋicko ŋic jabane jueŋgopieŋ jaŋe mecne mâmâc sasawa bâbâsifuc bâfuambiŋte iŋuc hâcne fua‐jarezejec.

²⁷“Ŋic moc e mi mana tarahuc bahac moc bâfuaocmu e sâqocne tâtâmire tahare biŋe noniŋ ŋokacne moc jara‐ticne wâŋ ekicne râezejec.

²⁸Iŋuc eme taha bapazi Wofuŋte maio kiwiric‐ticne rome sâqocne‐ticne tâmirezejec.

²⁹Mi mana tarahuc bahac bâfuaniŋmu, Israe ŋic me ŋondeŋ‐jeŋicko ŋic jabane jueŋgopieŋ, jaŋere sâcmutâc dâŋ mocjaha fuarâ fozejec.

³⁰Israe ŋic me ŋic jabane moczi bahac mana afeckerâ bâfuahuc Wofuŋ bunao baocmu e ine ŋic âgofâcne jaŋere ŋondeŋkonec bâsirowezo.

³¹E Wofuŋte dâŋ qâsuahuc sâcmutâc dâŋticne qatarawecte bâsirowe‐jâmbâŋkezo hâcne, e kiŋticnere okacne buc rozejec.”

³²Israe ŋic jaŋe mâreŋ burocnao juhuc ŋic moc sabata hombaŋko ʒoc rohuc juhame bâfumbiŋ.

³³Bâfuarâ Mose â Aroŋ erâ kikefuŋ sasawa jaŋerao jowa rambiŋ.

³⁴Eme ŋic iŋucne weniŋuc ecnezo irec mumutâc dâŋ moc mi fowecte mâc kâpâcwâru bapie ŋewec.

³⁵Ehame Wofuŋzi Mose ʒiŋuc âzâcnewec: “Ŋic e hâmocte biŋe ezejec, kikefuŋ sasawa jaŋe teuŋ râpenao qânâzi hehâmonʒepieŋ.”

³⁶Iŋuc mume kikefuŋ jaŋe teuŋ râpenao jowa hurâ, Wofuŋzi Mose dâŋ mutâcnecnewec irec sâc qânâzi hehâmombiŋ.

³⁷Eme Wofuŋzi Mose kecʒiŋuc âzâcnewec:

³⁸“Go Israe ŋic dâŋ ʒiŋuc jazac: Ŋoŋe mimiŋzi ɋâric ŋaqi‐ŋeŋic qaŋeŋnao eri wiac ʒariŋ hândâŋ hawari tinac biricke ranʒepieŋ. Ehuc hândâŋ ira muc keŋkeŋnezi ɋâtâ ranʒepieŋ.

³⁹Erâ hândâŋko muc râekicne i honeniŋmu sâc ine Wofuŋte sâcmutâc dâŋ sasawa i manasuhuc reŋke‐fârenʒepieŋ. Ehuc eeatucko qâsorienʒipiŋte maŋŋeŋicte hata kosa mi âtenʒepieŋ â ʒâŋe kosa mi finʒepieŋ.

⁴⁰Iŋuc ehuc sâcmutâc dâŋnane sasawa manasuhuc reŋke‐fârerâ Wofuŋte maio tirine junʒepieŋ.

⁴¹No Wofuŋ ŋoŋere Anutu, noni hâcne Anutu‐ŋeŋic jupemurâ Aigita mâreŋkonec jowac‐ŋopa warepo. No Wofuŋ ŋoŋere Anutu jukopac hâcne.”