Ʒare Biri 14:25-39

²⁵Ʒi ine Amaleke ŋic â Kanaaŋ ŋic jaŋe wâneŋko juŋgopieŋte ŋoŋe tomâcko risierâ mâreŋ burocne Hâwec Bâbâroŋkopec fokac irapec ranʒepieŋ.”

²⁶Eme Wofuŋ e Mose â Aroŋ dâŋ kecʒiŋuc jasawec:

²⁷“Kikefuŋ râŋgeŋ qaŋqaŋne ʒi jaŋe mu kâroŋ enareeŋgopieŋ i mo dameŋko moc beheniŋmu? Israe ŋic jaŋe mu kâroŋ enarepie boc manaekopac.

²⁸Irec ʒiŋuc jazanic: Wofuŋ e kecʒiŋuc mukac: ‘No jujâmbâŋkekopac, irec ŋoŋe dâŋ muwarepie manaekopac irec sâcko wiac eŋarepemu.

²⁹Irec qâŋɋâŋfâc‐ŋeŋic jaŋe mâreŋ burocnao ʒira hâcne foraniŋmu. Wose qâreŋ ejarekicne â jara‐jeŋic 20‐o domarâ fekac erâ mu kâroŋ enarembiŋ ŋoŋe hâcne

³⁰mâreŋ juniŋte biŋe qaŋarepo ira moc mi raʒi‐jâmbâŋkeniŋmu. Mocjaha, Jefunere ŋokâ Kalebe â Nuŋte ŋokâ Josua jahe sawa raʒinicmu.

³¹Erâ naru motecfâc‐ŋeŋic jaŋere manabâc ehuc râsi jaŋere meo feniŋmu mumbiŋ jaŋe wâc raʒiniŋmu. Ehuc ŋoŋe mâreŋ surembiŋ i hâcne ro rauc ehuc juhâc qâhâmonʒepieŋ.

³²Ŋoŋe ine mâreŋ burocnao hâmo‐fârenʒepieŋ:

³³Ehame naru motecfâc‐ŋeŋic jaŋe mâreŋ burocnao lama bulimakao soŋaŋ juhuc qaqatara‐ŋeŋicte okacne âsickehuc juhapie kâcɋene ŋoŋe ira hâmo‐fârenʒepieŋ.

³⁴Ŋoŋe ŋafe ʒoaŋ 40 mâreŋ hone tâcnehuc jumbiŋ iŋuc jaha jara 40 kiŋŋeŋic âsickehuc ʒiŋuc mana taranʒepieŋ: Wofuŋzi behec‐nâpokac.’

³⁵Wofuŋ no, kikefuŋ râŋgeŋ qaŋqaŋne ʒi râsi enarehuc juŋgopieŋ jaŋe wiac iŋuc hâcne ejarepemurâ mupaŋkekopac; jaŋe mâreŋ burocnao hâmo miziec efârenʒepieŋ.”

³⁶Eme Mosezi ŋic mâreŋ hone tâcneniŋte sorec‐jopame rambiŋ jaŋe risierâ kikefuŋ sasawa mâreŋ irec binaŋ bipic tataranehec bajarepie jaŋe manarâ Mose mu kâroŋ ecnembiŋ.

³⁷Iŋuc epie binaŋ bipic tataranehec bambiŋ jaŋe Wofuŋte maio ututuŋ hâmo‐fârembiŋ.

³⁸Ehame mâreŋ hone tâcneniŋte rambiŋ jaŋeraonec Nuŋte ŋokâ Josua â Jefunere ŋokâ Kalebe jahe sawa jupic.

³⁹Eme Mose e Wofuŋte uŋdâŋ i Israe kikefuŋ sasawa jaza‐fâreme jaŋe manarâ ki busâqoc kâcɋene embiŋ.