Ʒare Biri 13:13-30

¹³Asere guruonec Mikaere ŋokâ Seturu.

¹⁴Naftalire guruonec Wofisire ŋokâ Nabi.

¹⁵Gadere guruonec Makire ŋokâ Geuele.

¹⁶Mosezi ŋic mâreŋ hone tâcneniŋte sorec‐jopawec jaŋere ʒâŋe ine hâcne. Ehuc Mose e Hoseare ŋokâ Nuŋ ere ʒâŋe Josua muwec.

¹⁷Eme Mose e ŋic i jaŋe Kanaaŋ mâreŋ hone tâcneniŋte dâŋ kecʒiŋuc jazahuc sorec‐jopawec: “Ŋoŋe Negebe mâreŋ râpenao tiki mâreŋ fokac ira feranʒepieŋ.

¹⁸Ehuc mâreŋ irec fuŋne hone tâcnehuc ŋic ira juŋgopieŋ jaŋe sanaŋne me dodocne, bocjaha me afecne i mâmâc hone manac efârenʒepieŋ.

¹⁹Erâ mâreŋ juŋgopieŋ i biaŋne me sâqocne, â hae‐jeŋic i jaba sawa me basanaŋ‐jopahuc bakicne,

²⁰erâ mâreŋ i guec sâkohec me mâreŋ kereŋne, erâ jâckâte‐ticne fokac me mâcne, i wâc mâmâc hone‐fârenʒepieŋ. Ŋoŋe hâbi hârohec eniŋ, ehuc mâreŋ irec fâri wiac gâcne bawarenʒepieŋ.” Rambiŋ i waiŋ fâri fufua dameŋko hâcne.

²¹Eme jaŋe ferâ, Ziŋ mâreŋ burocnaonec raku Rehoboo, Hamati hae mendâŋko ira forakac mâreŋ i hone tâcnembiŋ.

²²Ehame Anakare ɋâricfâc Ahimaŋ, Sesai â Talamai jaŋe hâcne ira jumbiŋ. (Heboroŋ hae bambiŋ irec faicnao jara 7 tarame Aigita mâreŋko Zoaŋ hae bakicne.)

²³Eme jaŋe Esikola wâneŋko fisirâ waiŋ qaŋeŋne moc makenehec bâtâcnerâ ŋic jajaheczi reŋkepire risie warembiŋ. Ehuc wâc nemuja â jâchândâŋ gâcne i mâmâc bawarembiŋ.

²⁴Eme ŋic jaŋe waiŋ qaŋeŋne makenehec ira bâtâcnembiŋte hae mâreŋ irec ʒâŋe Esikola wâneŋ mumbiŋ.

²⁵Eme mâreŋ hone tâcneniŋte rambiŋ jaŋe juhapie ʒoaŋ gie bapa 40 tarame risie warembiŋ.

²⁶Ehuc Mose â Aroŋ erâ Israe kikefuŋ sasawa Paraŋ mâreŋ burocnao Kadesi haeo jumbiŋ jaŋerao risie warembiŋ. Erâ dâŋ binaŋ ejarehuc mâreŋ hone tâcnembiŋ irec jâchândâŋ wiac jowatumbiŋ.

²⁷Ehuc Mose ʒiŋuc âzâcnembiŋ: “Sorec‐nâpomeŋ nâŋe mâreŋ ira sâcne ra fisimbeŋ. Mâreŋ i susu â baŋaczi fusucmarâ qâmbâriŋkehuc foekac irec hândâŋ fâri‐ticne ʒi hâcne.

²⁸Ŋic ira juŋgopieŋ jaŋe ŋic sanaŋne, â hae‐jeŋic i kâcɋene erâ basanaŋkehuc bakicne. Ira Anakare ɋâricfâc jupie honec‐jopambeŋ wâc.

²⁹Amaleke ŋic jaŋe Negebe mâreŋko juŋgopieŋ, â Hitiŋic â Jebusi ŋic erâ Amoŋŋic jaŋe tiki mâreŋko juŋgopieŋ; Kanaaŋ ŋic jaŋe ine hâwecmecko â Jordaŋ opâ heririŋnao ŋec juc eraŋgopieŋ.”

³⁰Kalebezi ine Mosere maio ŋic ŋokac mu bâmiriŋ ejarehuc kecʒiŋuc muwec: “Nâŋâc ʒiŋuczia ferâ mâreŋ i ro rauc enʒepeneŋ, nâŋâc sâcne sanaŋkerâ ro rauc enaŋmu.”