Ʒare Biri 11:3-27

³Wofuŋzi mume ŋondeŋ‐jeŋicko ʒoc fuarâ ʒawecte hae mâreŋ irec ʒâŋe Tabera mumbiŋ.

⁴Eme Israe ŋic jaŋere ŋondeŋko ŋic repicne gâcne jumbiŋ jaŋe nânâ wiac biaŋnere andac ehapie Israe ŋic jaŋe wâc kiohuc kecʒiŋuc mumbiŋ: “Qowi moc fua‐nâreme nanʒapeŋ me!

⁵Nâŋe Aigita mâreŋko opâ qowi me qahac me bomboŋ herimuŋ me raki wiac fuŋne fuŋne furi tâmiric nâjumbeneŋ irec manasuhuc juŋgopeneŋ.

⁶Ʒi ine nânâre hâmohuc tâpiri‐nâŋec omaeme mana sawa honeŋgopeneŋ.”

⁷Mana ine hândâŋ piic piic, padi tinac fuarâ ŋerawec.

⁸Eme ŋic ŋokac jaŋe nuserâ toŋtoŋko âkenʒaŋnerâ kuʒio rikepie dockeme poroŋ bajumbieŋ; erâ nâpie aŋac‐ticne poroŋ uucne wokemaŋ opâhec rikekicne iŋucne tinac ewec.

⁹Mana i ŋafeo teuŋko titikuc wahame mâmâc waha jujec.

¹⁰Eme ŋic jaŋe guru sâc qoruc boze‐jeŋicko domahuc kiohapie Mosezi manawec. Ehame Wofuŋzi aaricke sâqoreme Mosezi mana gâpârewec.

¹¹Ehuc Wofuŋ kecʒiŋuc âzâcnewec: “Go kiŋaŋ qaqage no weniŋucte wiac ʒâʒâicne iŋucne enaremeŋ? No wemo wiac sâqocne moc egarepo irec ŋic ʒi jaŋere ŋemâc i nore faio râekomec?

¹²Noni neŋgoc‐jeŋic jukopac me? Me noni bâfuac‐joparâ mâreŋko râec‐jopapo irec go ʒiŋuc nazakomec: ‘Go ŋokac moczi kogoc‐ticne hâpo heâroŋ ecneekac irec sâc ŋic ʒi jaŋe ejarehuc mamacfâc‐jeŋic mâreŋ biŋe qajarepo ira jowac‐jopa razemec?’

¹³No qowi wenirec bâfuarâ ŋic gumec‐jopape sâcjopa‐fâreocmu? Jaŋe nore maio kiohuc ʒiŋuc hâcne mueŋgopieŋ: ‘Go qowi moc bâfua‐nâretec nânʒepeneŋ.’

¹⁴Ŋic ʒi jaŋere ŋemâc i nore sâc sirickekac, no bucnane sâcne mi âsickepemu.

¹⁵No iŋuc epemurâ manasukicko ine ʒiŋuczia qâhâmocnuzemec, me nore manatec sâckeme ine wiac ŋemâcne ʒi bârârietec omaezejec.”

¹⁶Eme Wofuŋzi Mose kecʒiŋuc âzâcnewec: “Go Israe ŋic soŋaŋ micnefâc‐jeŋic weni jaŋe jupie manac‐jopaekic guru i jaŋeraonec ŋic 70 rowosâec‐joparâ tutumaŋ qoruc bozere motâcko biric‐jopatec gohec mâmâc domanʒepieŋ.

¹⁷Ehame no hufâpe gohec dâŋ muc manac enacmu, ehuc go maŋɋârâŋhec jukic maŋɋârâŋ iŋucnea jaŋe wâc tahac‐jopape ŋic jaŋere ŋemâc i go buc mâcne, jaŋe gohec mâmâc âsickenʒepieŋ.

¹⁸Erâ ŋic ŋokac ʒiŋuc jazac: ‘Ŋoŋe tomâckore ʒawiehuc juhapie hae fureme qowi fua‐ŋareme nânʒepieŋ. Ŋoŋe Wofuŋ kecʒiŋuc muhuc kio wâwâsic ecnembiŋ irec: “Nâŋe Aigita mâreŋko sâcne mac jumbeŋ, ʒi ine mozi qowi nâreme nanaŋmu?” Iŋuc mumbiŋte Wofuŋzi qowi ŋareme nânʒepieŋ.

¹⁹Ŋoŋe qowi nâniŋmu i ʒoaŋ gie bapa 1 me 2 me 5 me 10 me 20 ira sawa mâcne,

²⁰nâhuc juhapie mosa moc tarame qowire takic‐ŋopame mamakâc‐ŋopaocmu. Ŋoŋe Wofuŋ ŋondeŋ‐ŋeŋicko jukac e hâcne râpeckerâ ʒiŋuc muhuc kio wâwâsic ecnembiŋte iŋuc fua‐ŋareocmu: “Nâŋe wemocte Aigita mâreŋ beherâ warembeŋ?” ’”

²¹Mosezi ine ʒiŋuc muwec: “Ŋic nohec hata wareŋgopieŋ jaŋere ʒare i 600 tauseŋ, eme go sifu mukomec: ‘No qowi bâfua‐jarepe nâhuc juhapie mosa moc tarazejec.’

²²Jaŋere erâ lama bulimakaofâc‐nâŋec qa hezuc epene sâcjopaocmu me? Me hâwec qowi rocjopa‐fârerâ gumec‐jopapene sâcjopaocmu me?”

²³Mose e iŋuc mume Wofuŋzi ʒiŋuc âzâcnewec: “Go Wofuŋ nore tâpirire manatec wawahane ekac me? Dâŋnane burec me jâmbomac irec fârine miŋecgac jaha taniŋkeme honezemec.”

²⁴Eme Mose e ŋic ŋokac jaŋerao rarâ Wofuŋte dâŋ jazawec, ehuc soŋaŋ micne jaŋeraonec ŋic 70 rocjoparâ qoruc boze râreckehuc râec‐jopa rawec.

²⁵Eme Wofuŋzi karorac maŋko waharâ Mose dâŋ âzâcnewec. Ehuc Mosezi maŋɋârâŋhec juwec irec sâc jaha ŋic 70 jaŋe maŋɋârâŋ tahac‐jopame findaŋdâŋ mumbiŋ. Mâc ʒâhec ine findaŋdâŋ mocwâc mi mumbiŋ.

²⁶Ŋic jajahec ʒâŋe‐jekic Elida â Meda, jahe ŋic gâcne rowosâec‐jopakicne jaŋere guruonec jaha, erâ sifu teuŋko ʒuhuckerâ ŋehuc maŋɋârâŋhec erâ findaŋdâŋ mupic.

²⁷Eme ŋicmotec moczi manarâ gasacke rarâ Mose ʒiŋuc âzâcnewec: “Elida â Meda jahe teuŋkoa ŋehuc findaŋdâŋ mukopirec.”