Ʒare Biri 10:6-28

⁶Eme qeŋ bâsokahuc qapie arec jajahec eme ine juwic mâreŋkopec ŋec foc eeŋgopieŋ jaŋe hatackenʒepieŋ.

⁷Kikefuŋ hetumaŋ‐jopaniŋte qeŋ bâsokahuc mâcne, bâpitiwahuc qanʒepieŋ.

⁸Qeŋte dâŋ mukopac izi ŋoŋerao mimiŋzi ɋâric dâŋsanaŋ erâ forahuc juzejec.

⁹Râsifâc‐ŋeŋic fific bacŋopaeŋgopieŋ jaŋe jopaniŋte ʒikao rahuc qeŋ bâsokahuc qapie Wofuŋ Anutu‐ŋeŋiczi ŋoŋere manasuhuc râsifâc‐ŋeŋic jaŋere meonec batarac‐ŋopazejec.

¹⁰Ʒeri hombaŋ‐ŋeŋicko me hombaŋ muŋarekicnao, me mosa fufuŋkenao ira qowi bâzi me wama bâzi rikehuc qeŋ qanʒepieŋ wâc; qeŋ jahe ŋoŋere erâ Anutu‐ŋeŋicte maio dâŋepire Anutuzi manasuc‐ŋopazejec. Noni hâcne Wofuŋ Anutu‐ŋeŋic jukopac.”

¹¹Jara 2 irec mosa 2‐re ʒoaŋ gie bapa 20 ira karoraczi sâcmutâc dâŋte tiri bozeonec fahare fewec.

¹²Eme Israe ŋic jaŋe biri‐jeŋic sâc Sinai mâreŋ burocnaonec fahare rahapie karoraczi Paraŋ mâreŋ burocnaonec waha herâ ŋewec.

¹³Jaŋe Wofuŋzi Mose dâŋ âzâcne mutâc ewec i bâjâpehuc hata fuŋkerâ rambiŋ hâcne.

¹⁴Judare gurufâc jaŋe maqâreŋ‐jeŋiczi bânie‐jareha birine birine fuŋkerâ rambiŋ, i Aminadare ŋokâ Nasoŋ eki micne bajareha iŋuc embiŋ.

¹⁵Isasare gurufâc jaŋere micne i Zuarare ŋokâ Netanelezi juwec.

¹⁶Â Sebuloŋte gurufâc jaŋere micne ine Heloŋte ŋokâ Eliabazi juwec.

¹⁷Tiri boze batac qatara‐fârerâ qâzuckepie Geresoŋ â Merari jahere ɋâricfâc jaŋe tiri boze reŋkerâ jujumbieŋ jaŋe hâcne hata fuŋkembiŋ.

¹⁸Erâ Rubeŋte gurufâc jaŋe maqâreŋ‐jeŋiczi bânie‐jareha birine birine rambiŋ, i Elizuru, Sedeure ŋokâ hâcne, eki micne bajareha iŋuc embiŋ.

¹⁹Simeoŋte gurufâc jaŋere micne Zurisadaire ŋokâ Selumiezi juwec.

²⁰Â Gadere gurufâc jaŋere micne ine Reguelere ŋokâ Elisafazi juwec.

²¹Eme jaŋere râpeo Kohatire ɋâricfâc jaŋe wiac tirine reŋkerâ rambiŋ. Rahapie bânierâ rambiŋ jaŋe tiri boze mocwâc bambiŋ.

²²Izi ine Eferaimte gurufâc jaŋe maqâreŋ‐jeŋiczi bânie‐jareha birine birine rambiŋ, i Elisama, Amihudure ŋokâ hâcne, eki micne bajareha iŋuc embiŋ.

²³Manasere gurufâc jaŋere micne Pedazure ŋokâ Gamaliezi juwec.

²⁴Â Benjamiŋte gurufâc jaŋere micne ine Gideonire ŋokâ Abidaŋzi juwec.

²⁵Eme ʒâhec jâmbâŋ Daŋte gurufâc jaŋe maqâreŋ‐jeŋiczi bânie‐jareha birine birine rakupie tarawec. Jaŋe Ahieʒe, Amisadaire ŋokâ hâcne, eki micne bajareha iŋuc embiŋ.

²⁶Asere gurufâc jaŋere micne i Okoraŋte ŋokâ Pagielezi juwec.

²⁷Â Naftalire gurufâc jaŋere micne ine Enaŋte ŋokâ Ahirazi juwec.

²⁸Israe ŋic guru sâc jaŋe faharerâ birine birine bâbâjâpec iŋuc hâcne rambiŋ.