Ʒare Biri 10:12-36

¹²Eme Israe ŋic jaŋe biri‐jeŋic sâc Sinai mâreŋ burocnaonec fahare rahapie karoraczi Paraŋ mâreŋ burocnaonec waha herâ ŋewec.

¹³Jaŋe Wofuŋzi Mose dâŋ âzâcne mutâc ewec i bâjâpehuc hata fuŋkerâ rambiŋ hâcne.

¹⁴Judare gurufâc jaŋe maqâreŋ‐jeŋiczi bânie‐jareha birine birine fuŋkerâ rambiŋ, i Aminadare ŋokâ Nasoŋ eki micne bajareha iŋuc embiŋ.

¹⁵Isasare gurufâc jaŋere micne i Zuarare ŋokâ Netanelezi juwec.

¹⁶Â Sebuloŋte gurufâc jaŋere micne ine Heloŋte ŋokâ Eliabazi juwec.

¹⁷Tiri boze batac qatara‐fârerâ qâzuckepie Geresoŋ â Merari jahere ɋâricfâc jaŋe tiri boze reŋkerâ jujumbieŋ jaŋe hâcne hata fuŋkembiŋ.

¹⁸Erâ Rubeŋte gurufâc jaŋe maqâreŋ‐jeŋiczi bânie‐jareha birine birine rambiŋ, i Elizuru, Sedeure ŋokâ hâcne, eki micne bajareha iŋuc embiŋ.

¹⁹Simeoŋte gurufâc jaŋere micne Zurisadaire ŋokâ Selumiezi juwec.

²⁰Â Gadere gurufâc jaŋere micne ine Reguelere ŋokâ Elisafazi juwec.

²¹Eme jaŋere râpeo Kohatire ɋâricfâc jaŋe wiac tirine reŋkerâ rambiŋ. Rahapie bânierâ rambiŋ jaŋe tiri boze mocwâc bambiŋ.

²²Izi ine Eferaimte gurufâc jaŋe maqâreŋ‐jeŋiczi bânie‐jareha birine birine rambiŋ, i Elisama, Amihudure ŋokâ hâcne, eki micne bajareha iŋuc embiŋ.

²³Manasere gurufâc jaŋere micne Pedazure ŋokâ Gamaliezi juwec.

²⁴Â Benjamiŋte gurufâc jaŋere micne ine Gideonire ŋokâ Abidaŋzi juwec.

²⁵Eme ʒâhec jâmbâŋ Daŋte gurufâc jaŋe maqâreŋ‐jeŋiczi bânie‐jareha birine birine rakupie tarawec. Jaŋe Ahieʒe, Amisadaire ŋokâ hâcne, eki micne bajareha iŋuc embiŋ.

²⁶Asere gurufâc jaŋere micne i Okoraŋte ŋokâ Pagielezi juwec.

²⁷Â Naftalire gurufâc jaŋere micne ine Enaŋte ŋokâ Ahirazi juwec.

²⁸Israe ŋic guru sâc jaŋe faharerâ birine birine bâbâjâpec iŋuc hâcne rambiŋ.

²⁹Eme Mose e kimo‐ticne Reguele, Midiaŋ ŋic hâcne, ere ŋokâ Hobabi ʒiŋuc âzâcnewec: “Nâŋe Wofuŋzi ‘mâreŋ i ŋoŋere biŋe qakopac’ iŋuc muhuc mâreŋ nârewec ira razo eŋgopeneŋ. Wofuŋ e Israe ŋic nâŋe ehâmo‐nâreocte mupaŋkewecte go nâŋehec ratecne nâŋe wâc ehâmo‐garenaŋmu.”

³⁰Eki ine dâŋ ʒiŋuc bâtikiecnewec: “No ŋoŋehec mi rahuc no nahacne mâreŋko â wiacfâc‐nane jaŋerao risiepemu.”

³¹Iŋuc mume Mosezi dâŋ ʒiŋuc bâtikiecnewec: “Go mi behec‐nâpocmurâ numu‐garekopac. Goki hâcne mâreŋ burocnao ju fofo eere fuŋne manakicte jowac‐nâpozemec.

³²Go nâŋehec racmuo ine Wofuŋzi nâŋe ehâmo‐nâreocmu sâc ijaha nâŋe go egarenaŋmu.”

³³Eme jaŋe Wofuŋte tiki beherâ rahuc juhapie ʒoaŋ gie bapa jahec â moc tarawec. Ehame Wofuŋte ʒâʒâfic katapazi ʒoaŋ jahec â moc jaha bânie‐jarehuc ŋec foc eniŋte hae mâreŋ hone tâcnewec.

³⁴Jaŋe teuŋ‐jeŋic behembiŋ sâc Wofuŋte karoraci ʒoaŋko bânie‐jarehuc juwec.

³⁵Eme katapa e hata rawec sâc Mosezi ʒiŋuc muhuc numuwec: “O Wofuŋ, go faharerâ râsifâcge batâtiec‐jopac, ehame qaisocgueŋgopieŋ jaŋe gore maionec wisenʒepieŋ.”

³⁶Me katapa e niniŋkerâ ŋewec sâc Mosezi ʒiŋuc muhuc numuwec: “O Wofuŋ, go Israe ŋic tauseŋ gurune gurune jaŋehec juzemec.”