Ɩsɑyii 11:8-16

⁸Pǝyɑɣɑ ɑhʋlʋm kɑ liɣili tʋm pʋ́ʋ́ɣʋ́ tɔɔ. Pǝyɑɣɑ sǝkpelɑɣɑ nɑ́ɑ́ sʋsɩ kɑ niŋ kɛ ɑkɑlɑ pʋ́ʋ́ɣʋ́ tɑɑ.

⁹Tɑcɑɑ pʋɣʋ nɑŋŋ nyǝŋkʋ tɔɔ tʋ nɔɣɔlʋ kɑɑ lɑ ɩ tɔɣɔntǝlɛ kɛ ɩsɑɣɑtʋ. Pǝ tɑɣɑ pʋlʋ, yǝlɑɑ kɑ́ nyɩ Ɩsɔ kɛ́ nɑ pǝ́ su tɛtʋ ɩsɩɩ lʋm wɑɑsʋɣʋ teŋku lumɑŋ tɔɔ tɔ.

¹⁰Kʋyɑkʋ ŋkʋ Sesee lʋlʋɣʋ tʋ kɑ sǝŋnɑ ɩsɩɩ ɑntulinyɑ yǝlɑɑ tuutɑ. Piitimnɑɑ kɑ kɔɔ sɩ ɩ́ tɑsɑ-wɛɣɛ lɑɣɑtʋ, nɑ Ɩsɔ teeli nɑ timpi tɑɑ ɩ wɛɛ tɔ.

¹¹Kʋyɑkʋ ŋkʋ tɔtɔɣɔ Tɑcɑɑ n kɑ́ hʋlɩ nyɑ́ toŋ. N kɑ́ lǝsɩ nyɑ́ yǝlɑɑ, nɑ ń kɔnɑ nyɑ́ nyǝ́mɑ kɑkɑɑsɑɣɑ. Mpɑ pɑɑ wɛ Asilii tɛtʋ, nɑ Icipiti ntɔɣɔŋ tɛtʋ, nɑ Icipiti mpǝtǝŋ tɛtʋ, nɑ Ɩtiyopii tɛtʋ, nɑ Ilɑm tɛtʋ, nɑ Pɑpiloni tɛtʋ, nɑ Silii tɛtʋ ɩcɑtɛ Hɑmɑtɩ, nɑ tɛtʋ nti lʋm cɔɔnɑɑ tɔ.

¹²N kɑ́ kpɑɑsɩ piitimnɑɑ kɛ tuutɑ. N kɑ́ kpeɣeli Yutɑ nyǝ́mɑ nɑ Ɩsɛɣɛlɩ nyǝ́mɑ mpɑ pǝ kuuwɑ nɑ pǝ́ yɑsɩ tɛtʋ tǝnɑ tɑɑ tɔ.

¹³Wɑɑtʋ ɩnɩ Ɩfǝlɑyim nyǝ́mɑ ɩsɛsɛɛmlɛ kɑ́ sɑɑlɩ. Pɩɩ kpiisi Yutɑ nyǝ́mɑ kolontunɑɑ. Yutɑ nyǝ́mɑ kɑɑ lɩɩ Ɩfǝlɑyim nyǝ́mɑ kɛ pɑtɩɩlɛ.

¹⁴Pɑɑ kpɛntɩ nɑ pɑ́ kpɑ Filiisi nyǝ́mɑ tɔɔ kɛ́ ilim tǝtʋlɛ pɔɔŋ tɑɑ. Pɑɑ mǝŋnɑ ilim tǝlɩɩlɛ tɔɔ, nɑ pɑ́ kuu wʋlɑɣɑ tɛtʋ tɑɑ nyǝ́mɑ wontu. Pɑɑ tɔɣɔ Ɩtɔm nɑ Mowɑpʋ pǝ tɛtʋ nɑ pɑ́ ŋmɑkǝlɩ Amoni nyǝ́mɑ nyǝntʋ.

¹⁵Tɑcɑɑ n kɑ́ yele nɑ Icipiti ilim tǝlɩɩlɛ tɔɔ teŋku ŋkpɑlɑɣɑ lʋm nyɔɔ. N kɑ teɣeti kɑtɑŋɑ kɛ Ɩfǝlɑtɩ pɔɣɔ, nɑ ń fɑɣɑ-kɛɣɛ lɔisi nɑɑtosompɔɣɔlɑɣɑ, nɑ nyɑ́ nɔɣɔ heelim kɔkɔ nyǝm. Hɑlǝnɑ yǝlɑɑ tɔŋ nɑ pɑ́ tɛsǝɣɩ nɔɔhɛɛ.

¹⁶Ɩlɛnɑ pǝ kɑɑsɩ hɑpǝlɛ kɛ yǝlɑɑ kɑkɑɑsɑɣɑ ŋkɑ kɑ wɛ Asilii tɔ. Ɩsɩɩ pɩɩ kɑɑsʋɣʋ Ɩsɛɣɛlɩ nyǝ́mɑ kɛ pɑ nyǝntɛ kɛ hɑtoo lɔŋ tɑɑ tɔ. Wɑɑtʋ ɩnǝɣɩ pɑ lɩɩkɑɣɑ Icipiti.