Ɩsɑyii 10:1-34

¹Yǝlɑɑ mpɑ mɛ ɩ́ sɩɩkɩ nti tǝ tɑ siɣisi, nɑ ɩ́ tʋɣɩ kiiŋ nɑ pǝ́ wɑkǝlǝɣɩ lɛlɑɑ tɔ, mǝ tɔm wɛ wɑɩyo kɛ́.

²Ɩ́ pɛŋ mɑ yǝlɑɑ kʋnyɔntʋnɑɑ nɑ ɑcɑmɑɑ kɛ tɑmpɑnɑ. Ɩ́ lɛɛkǝɣɩ ɑlɑɑ leelɑɑ nɑ suluwɑɑ kɛ pɑ nyǝm.

³Ɩsǝnɑɣɑ ɩ́ kɑ́ lɑ kʋyɑkʋ kʋnɑɑsʋɣʋ wule? Wɑɑtʋ wei wɑkǝlʋɣʋ kɑ kɔɔ-mɛ nɑ pooluŋ tɔ, Leɣe ɩ́ kɑ́ se nɑ ɩ́ ŋmɛlɩ? Leɣe ɩ́ kɑ́ sɩɩ mǝ wɛnɑʋ?

⁴Pǝ tɑ kɑɑsɩ kʋlɑpʋɣʋ, pǝ wɛɛ sɩ tǝlɑsɩ tǝmɑ ɩ́ kɔlǝsɩ-mɛɣɛ sɑlǝkɑtʋnɑɑ tɑɑ kɛ́. Yɑɑ ɩ́ hoti nɑ ɩ́ sɩ́. Pɑɑ nɑ mpʋ tɔ, Tɑcɑɑ pɑ́ɑ́nɑ́ tɑ hɛɛ. Ɩ tɔŋnɑ ɩ ŋkumle teɣetuɣu kɛ́.

⁵Ḿpʋ́ɣʋ́ Tɑcɑɑ yɔɣɔtɑɑ sɩ: Kɑɩ, Asilii, nyɑ́ kɛnɑ mɑ pɑ́ɑ́nɑ́ tǝpite. Nyɑɣɑlɛ mɑ pɑ́ɑ́nɑ́ ɑkɑlʋɣʋ. N kɛ́ mɑ pɑ́ɑ́nɑ́ sɔsɔɔnɑ wontuɣu kɛ́.

⁶Nyɑɣɑ mɑ kʋsɑɑ nɑ ń hɔ mɑ yǝlɑɑ ŋkpɑŋʋɣʋ kɛ timpi pɑ kpɑɑsɑ mɑ pɑ́ɑ́nɑ́ tɔ. Mɑ́ yelinɑ nɑ ń kuu pɑ wontu nɑ ń ŋmɩɩlɩ-tɩ, nɑ ń fɛlɩ-wɛɣɛ nɔɔhɛɛ ɩsɩɩ ɑfǝlɑ.

⁷Amɑ Asilii nyǝ́mɑ nɑɑ hʋʋkɩ mpʋ. Piitimnɑɑ pɑɣɑlɛ wɑkǝlʋɣʋ, nɑ pɑ kʋɣʋ tike lǝmɑɣɑsɛɛ wɛnnɑ pɑ tɑɑ.

⁸Nɑ pɑ́ tɔŋ sɩ: Tɑ́ yooŋ nyɔɔŋ nyǝ́mɑ kɛ́ ɑwulɑɑ kɛ́.

⁹Mpʋ tɔtɔɣɔ pǝ lɑpɑ Kɑlǝne nɑ Kɑɑkemisi nɑ Hɑmɑtɩ nɑ Alǝpɑtɩ nɑ Sɑmɑlii, nɑ Tɑmɑsɩ pɑ ɑcɑlɛɛ.

¹⁰Mɑ toŋ kɛ mɑ tʋnɑ niŋ kɛ kɑwulɑsɩ nsi sɩ tɩɩŋ kǝlɑ Yosɑlɛm nɑ Sɑmɑlii pǝ nyǝŋ kɛ pɑɣɑlɛ tɔ.

¹¹Ɩsǝnɑ mɑ kpiisɑ Sɑmɑlii nɑ ɩ tɩɩŋ tɔ, mpʋ tɔtɔɣɔ mɑ pǝsǝɣɩ mɑ́ kpiisi Yosɑlɛm nɑ ɩ tɩɩŋ. Mɑ wɛnɑ pǝ toŋ.

¹²Wɑɑtʋ wei Tɑcɑɑ kɑ́ tɛ Siyɔŋ pʋɣʋ nɑ Yosɑlɛm pɑ ŋkpɑŋʋɣʋ kɛ hɔm tɔ, ɩ kɑ́ pɑɑsǝnɑ Asilii wulɑʋ kɑlɑmpɑɑnɩ tʋ ɩnɩ. Nɑ ɩsǝnɑ ɩ nyǝnǝɣɩ lɛlɑɑ kɛ yem tɔ.

¹³Hɑlǝnɑ ɩ́ tɔŋ sɩ: Mɑ mɑɣɑmɑɣɑ mɑ toŋ nɑ mɑ lɑɣɑtʋ kɛ mɑ tuusinɑ piitimnɑɑ tɛtʋ toosi nɑ mɑ́ kuu pɑ wɛnɑʋ. Nɑ mɑ́ tɔɣɔnɩ ɑwulɑɑ kɛ pɑ kumlee tɔɔ ɩsɩɩ ɑkɑ.

¹⁴Ɩsɩɩ sumɑɣɑ seekuɣu nɑ kɑ́ yele tɑntɛ nɑ yɑlɑ nɑ pɑ́ kuu tɔ, ḿpʋ́ɣʋ́ mɑ kuu piitimnɑɑ wɛnɑʋ nɑ pɑ tɛtʋ. Nɔɣɔlʋ tɑ ciɣiti keluɣu, yɑɑ ɩ́ kuli nɔɣɔ nɑ ɩ́ wii pɩɩʋ mɑɣɑmɑɣɑ.

¹⁵Lɑɑlɛ kɑ́ pǝsɩ nɑ tǝ́ sɑ tǝ tǝɣɩ tǝ tɔkʋlʋ niŋ tɑɑ? Yɑɑ kɑɑfǝntɑ sǝyɑɣɑ kɑ lɑnɑ kɑlɑmpɑɑnɩ kɛ kɑɑfǝntɑ niŋ tɑɑ? Pǝ wɛ ɩsɩɩ kpɑ́tʋ́ɣʋ́ teɣetiɣinɑ ntɛɣɛ kʋ tɔkʋlʋ, nɑ ɑkɑlʋɣʋ nɑ́ɑ́ fiɣitiɣi kʋ lɔɣɔlʋ.

¹⁶Pǝ tɔɔ kɛ́ Ɩsɔ Pǝ tǝnɑ pǝ tʋ kɑ yele, nɑ Asilii yoolɑɑ kʋyɑsǝlɑɑ tɛ tɑɑsɩ. Ɩlɛnɑ kɔkɔ kʋlɩ pɑ teeli ɩnɩ ɩ tɑɑ nɑ kɑ́ mʋ.

¹⁷Mpi tɔ, Ɩsɛɣɛlɩ nyǝ́mɑ nyɑɑlǝm kɑ́ wɛɛ ɩsɩɩ kɔkɔ. Ɩsɛɣɛlɩ nyǝ́mɑ Nɑŋŋ tʋ kɑ́ wɛɛ ɩsɩɩ kɔkɔ kʋmʋmʋkɑ. Kɑɑ nyɑɣɑ sɔwɑ kɛ kʋyɑkʋ kʋlʋmʋɣʋ.

¹⁸Nɑ pǝ́ wɑkǝlɩ hɔtʋ sɔsɔɔntʋ nɑ tɩɩŋ tɑwɑ tǝkpɑtɑɑ. Ɩlɛnɑ Silii nyǝ́mɑ pǝsɩ ɩsɩɩ mpɑ kʋtɔŋ pɛɛnɑɑ tɔ.

¹⁹Tʋɣʋ kʋlʋmʋɣʋ kʋlʋmʋɣʋ kɑ́ kɑɑsǝnɑ Asilii hɔtʋɣʋ tɑɑ. Pɑɑ pǝyɑɣɑ sǝkpelɑɣɑ kɑ pǝsǝɣɩ nɑ kɑ́ kɑlɑ-ɩ.

²⁰Kʋyɑkʋ wɛɛ ŋku kʋ tɑɑ Ɩsɛɣɛlɩ yǝlɑɑ kɑkɑɑsɑɣɑ, mpɑ mɛ ɩ́ kɛ́ Yɑkɔpʋ lʋlʋɣʋ nyǝ́mɑ tɔ. Ɩ́ kɑɑ tɑsɑ Asilii nyǝ́mɑ mpɑ pɑ ŋmɑkǝlɑɣɑ-mɛ tɔɣɔ nɑɑni tʋɣʋ. Amɑ mǝ Ɩsɔ Tɑcɑɑ wei ɩ kɛ́ Ɩsɛɣɛlɩ Nɑŋŋ tʋ tɔɣɔ ɩ́ kɑ́ tʋ nɑɑni.

²¹Mǝ yǝlɑɑ kɑkɑɑsɑɣɑ kɑ́ mǝlɩ. Yɑkɔpʋ nyǝ́mɑ mɛ mǝ kɑkɑɑsɑɣɑ kɑ́ mǝlɩ mǝ Ɩsɔ toŋ tʋ tɔɔ.

²²Ɩsɛɣɛlɩ nyǝ́mɑ mɛ, pɑɑ mǝ yǝlɑɑ sɑmɑɑ wɛ ɩsɩɩ teŋku nɔɣɔ kɑnyǝŋɑ tɔ, mǝ tɑɑ kɑkɑɑsɑɣɑ tike kɑ́ mǝlǝnɑ Tɑcɑɑ tɔɔ. Pɑ tɛmɑ mǝ wɑkǝlʋɣʋ tɔm kɛ sɩɩʋ, nɑ pǝ tɩɩ mʋnɑ-mɛɣɛ.

²³Tɑcɑɑ Pǝ tǝnɑ pǝ tʋ Ɩsɔ kɑ wɑkǝlɩ tɛtʋ tǝnɑɣɑ ɩsɩɩ ɩ sɩɩʋ tɔ.

²⁴Ḿpʋ́ɣʋ́ Pǝ tǝnɑ pǝ tʋ Tɑcɑɑ Ɩsɔ tɔmɑ ɩ yǝlɑɑ mpɑ pɑ wɛ Siyɔŋ pʋɣʋ tɑɑ tɔ sɩ: Ɩ́ tɑɑ nyɑnɑ Asilii nyǝ́mɑ mpɑ pɑ mɑkɩ-mɛɣɛ kpɑtǝŋ tɔ. Pɑ teɣetiɣi ɑkɑŋ kɛ mǝ tɔɔ ɩsɩɩ Icipiti nyǝ́mɑ lɑkɑɣɑ-mɛɣɛ hɑtoo lɔŋ tɑɑ tɔ.

²⁵Mpi tɔ, pǝciiu tike kɛ pǝ kɑɑsɑɑ, nɑ mɑ pɑ́ɑ́nɑ́ hɛɛ tǝkpɑtɑɑ. Ɩlɛnɑ ɑ́ huunɑ Asilii nyǝ́mɑ nɑ ɑ́ wɑkǝlɩ-wɛ.

²⁶Pǝ tǝnɑ pǝ tʋ Tɑcɑɑ kɑ́ kpɑɑsɩ ɩ hikɑ nɑ ɩsɔtɑɑ, nɑ Ɩ́ cɑsɑ-kɛɣɛ Asilii nyǝ́mɑ ɩsɩɩ ɩ kɑ lɑpʋ Mɑtiyɑŋ nyǝ́mɑ kɛ Olɛpɩ kʋkpɑmʋɣʋ tɔɔ tɔ. Ɩ kɑ́ kpɑɑsɩ ɩ kpɑ́tʋ́ɣʋ́ nɑ ɩsɔ kɛ́ teŋku tɔɔ. Ɩsɩɩ ɩ kɑ lɑpʋ Icipiti nyǝ́mɑ tɔ.

²⁷Kʋyɑkʋ ŋkʋɣʋ ɩ kɑ kɔɔlɩ mǝ nyʋɣʋ tɑɑ kɛ́ sǝɣǝlɑ wenɑ Asilii nyǝ́mɑ kɑ sʋkɑ-mɛ nɑ ɑ́ nɩɩ-mɛ tɔ. Nɑ ɩ́ fiti ŋmɑkǝlʋɣʋ mpi pɑ ŋmɑkǝlɑɣɑ-mɛ tɔ.

²⁸Ḿpʋ́ɣʋ́ Asilii nyǝ́mɑ lɛɛkɑ Ayɑtɩ ɩcɑtɛ nɑ pɑ́ fɑɣɑnɑ Mikǝlɔŋ nyǝntɛ tɑɑ nɑ pɑ́ yele pɑ wontu kɛ Mikimɑsɩ.

²⁹Ɩlɛnɑ pɑ́ fɑɣɑnɑ kʋkpɑmǝŋ nɑɑlɛ hɛkʋ nɑ pɑ́ tɔ sɩ: Tǝ siki Kipeyɑ. Sɔɣɔntʋ pɩɩ Lɑmɑ ɩcɑtɛ nyǝ́mɑ nɑ pɑ́ seliɣi nɑ Sɑyuli ɩcɑtɛ Kipeyɑ nyǝ́mɑ seeki.

³⁰Kɑlim nyǝ́mɑ mɛ, ɩ́ mɑ kɑpusi nɑ Lɑyisɑ nyǝ́mɑ nɑ́ɑ́ tʋ ŋkpɑŋŋ. Ɩlɛnɑ Anɑtɔtɩ nyǝ́mɑ nɑ́ɑ́ cɔ, pɑ tɔm wɛ kʋnyɔŋ.

³¹Mɑtǝmenɑ nyǝ́mɑ seeki. Kepim nyǝ́mɑ pɛɛkǝɣɩ tǝcɔɔsǝlɛ.

³²Kolontunɑɑ kɑ́ tɑsɑ Nopɩ ɩcɑtɛ kɛ sǝŋʋɣʋ kɛ kʋyɑkʋ ŋkʋ, nɑ pɑ́ teɣeti Yosɑlɛm pulɑɣɑ Siyɔŋ kɛ ŋkumle.

³³Tɑcɑɑ pǝ tǝnɑ pǝ tʋ kɑ cɑɑtɩ piliŋɑsɩ nɑ tomɑ. Ɩ kɑ sɛtɩ tɩɩŋ wei ɩ kǝlɑ kʋlʋɣʋ tɔ nɑ ɩ́ pɛtɩ ɑtɛ, nɑ ɩ́ tisi wei ɩ tɛɛ lɛlǝŋ tɔ.

³⁴Pɑɑ sɛtɩ hɔtʋ sɔsɔɔntʋ nɑ lɑɑlɛ. Lipɑŋ hɔtʋɣʋ tɑɑ tɩɩŋ sɔsɔɔŋ kɑ hoti ɑtɛ.