Ŋicwofuŋ II 15:1-30

¹Jeroboam e Israe ŋicwofuŋ jume jara 27 eha Juda ŋicwofuŋ Amazia ŋokâ‐ticne Uʒijazi fuŋkerâ ŋicwofuŋ ewec.

²E jara 16 bazurâ ŋicwofuŋ erâ Jerusalem haeo juhame jara 52 tarawec. Neŋgoc‐ticne ʒâŋene Jekolia, e Jerusalem haeonec.

³Eme Uʒija e mamac‐ticne Amaziazi ewec irec sâc jaha ehuc Wofuŋte ʒâŋe faio wiac ebac eme sâcke‐fârewec.

⁴Mocjaha, furu mâreŋ i ine mi bârârie‐fârewec. Irec ŋic ŋokac jaŋe furu mâreŋko taha bâzi â hosâc âsu rikehuc jumbiŋ jaha.

⁵Eme Wofuŋzi ŋicwofuŋ qame wicsanaŋhec jufekuhame hâmoc dameŋ‐ticne maickewec. Eme e irec erâ bâtâcko ŋeŋe juju ewec. Ehame ŋokâ‐ticne Jotamzi garikiŋfâcne jaŋere micne juhuc ŋic ŋokac qaŋeŋ‐jopawec.

⁶Uʒija e wiac sasawa ebac ewec i Juda ŋicwofuŋ jaŋere Binaŋ Qâhâc papia qizecko qâreŋke‐fârekicne.

⁷Juku Uʒija e apa ŋosafâcne jaŋerao ʒuhuckehuc hâmome jaŋe fombiŋkoa Dawidire hae qizecko duckembiŋ. Ehame ŋokâ‐ticne Jotamzi tucticne qarâ ŋicwofuŋ juwec.

⁸Uʒijazi Juda ŋicwofuŋ jume jara 38 eha Jeroboamte ŋokâ Ʒekariazi Israe ŋicwofuŋ ehuc mosa 6 Samaria haeo juwec.

⁹Erâ e mamacfâc‐ticne jaŋe ejumbieŋ irec sâc jaha ehuc Wofuŋte ʒâŋe faio wiac mamakâcne ewec. Ehuc Nebate ŋokâ‐ticne Jeroboamzi Israe ŋic ejareme hehesic bâfuambiŋ i mi râpeckewec.

¹⁰Ehame Jabesi ŋokâ‐ticne Salumzi râsi ecnehuc Ibeleam haeo qame hâmome tucticne qarâ ŋicwofuŋ juwec.

¹¹Eme Ʒekariazi wiac ebac ewec sasawa i Israe ŋicwofuŋ jaŋere Binaŋ Qâhâc papia qizecko qâreŋke‐fârekicne.

¹²Wofuŋ e dâŋ ʒiŋuc muhuc Jehu mupaŋkecnewec i deŋke‐fârewec: “Ɋâricfâcge fua fepie arecne 4 eocmu jaŋe Israere eri ŋeŋeo ŋenʒoŋgopieŋ.”

¹³Uʒija e Juda ŋicwofuŋ jume jara 39 eha Jabesi ŋokâ‐ticne Salumzi fuŋkerâ ŋicwofuŋ ehuc Samaria haeo mosa mocjaha juwec.

¹⁴Ehame Gadi ŋokâ‐ticne Menahemzi Tiriza haeonec Samaria haeo fisirâ Jabesi ŋokâ‐ticne Salum qâhâmohuc tucticne qarâ ŋicwofuŋ ewec.

¹⁵Eme Salumzi wiac ebac ewec â râsi fisiwec i sasawa Israe ŋicwofuŋ jaŋere Binaŋ Qâhâc papia qizecko qâreŋke‐fârekicne.

¹⁶Eme Menahemzi Tapua hae â maŋnao wiac sasawa fowec i mecne erâ rârec rârec mâreŋ forawec i mâmâc imacke‐fârewec. Jaŋe haesac motâc mi rocnembiŋte iŋuc hâcne ewec. Erâ ŋokac kiwechec jaŋe sâqezi bujeŋic âke ropiewec.

¹⁷Uʒija e Juda ŋicwofuŋ jume jara 39 eha Gadi ŋokâ‐ticne Menahemzi fuŋkerâ ŋicwofuŋ ehuc jara 10 Samaria haeo Israe ŋic jaŋere ŋicwofuŋ ewec.

¹⁸Ehuc Wofuŋte ʒâŋe faio wiac mamakâcne ewec. Erâ e juwec sâc Nebatere ŋokâ Jeroboamzi Israe ŋic ejareme hehesic bâfuambiŋ i mi râpeckewec.

¹⁹Ehame Asiria ŋicwofuŋ Pulizi Israe mâreŋko râsi fisiwec. Fisime Menahemzi ʒiŋuc manasuhuc siliwa moneŋ ŋemâc‐ticne 1 tauseŋ râcnewec: Eki baficnume Israe ŋicwofuŋ jusanaŋkezepac.

²⁰Erâ Menahem e moneŋ i sasawa Asiria ŋicwofuŋ râcneocte Israe ŋic moneŋ mafa sâkohec jaŋeraonec ŋic buc buc siliwa moneŋ ŋemâc‐ticne 50 sasawa jowac rowec. Irec Siria ŋicwofuŋ e mâreŋ ira mi juhuc risierâ rawec.

²¹Eme Menahemzi wiac sasawa ebac ewec i Israe ŋicwofuŋ jaŋere Binaŋ Qâhâc papia qizecko qâreŋke‐fârekicne.

²²Juku Menahem e apa ŋosafâc‐ticne jaŋerao ʒuhuckerâ hâmome ŋokâ‐ticne Pekajazi tucticne qarâ ŋicwofuŋ juwec.

²³Uʒija e Juda ŋicwofuŋ jume jara 50 eha Menahemte ŋokâ Pekajazi fuŋkerâ Israe ŋicwofuŋ ehuc Samaria haeo jara jajahec juwec.

²⁴Ehuc Wofuŋte ʒâŋe faio wiac mamakâcne ewec. Erâ Nebate ŋokâ‐ticne Jeroboamzi Israe ŋic ejareme hehesic bâfuambiŋ, i mi râpeckewec.

²⁵Ehame momorifâcne jaŋere micne Peka, Remaliare ŋokâ hâcne, e Gileade ŋic 50 jaŋe bafickepie Samaria haeoa ŋicwofuŋ fic sacsanaŋ‐ticnehec ira Pekaja qâhâmorâ ekizia moc tucticne qarâ ŋicwofuŋ ewec.

²⁶Eme Pekajazi wiac sasawa ebac ewec i Israe ŋicwofuŋ jaŋere Binaŋ Qâhâc papia qizecko qâreŋke‐fârekicne.

²⁷Uʒija Juda ŋicwofuŋ jume jara 52 eha Remaliare ŋokâ Pekazi fuŋkerâ Samaria haeo Israe ŋicwofuŋ juhame jara 20 tarawec.

²⁸Ehuc Wofuŋte ʒâŋe faio wiac mamakâcne ewec. Erâ Nebatere ŋokâ Jeroboamzi Israe ŋic ejareme hehesic bâfuambiŋ i mi râpeckewec.

²⁹Ehame Israe ŋicwofuŋ Pekare dameŋko Asiria ŋicwofuŋ Tigela‐Pilesezi fisirâ ljoŋ â Abe‐Bete‐Maka â Janoa â Kedesi â Hazoro â Gileade hae â Galilaia mâreŋ, erâ Naftali mâreŋ sasawa i raucke‐fârewec. Ehuc ŋic ŋokac rocjoparâ Siria mâreŋko kâpâcwâru bacjopa rawec.

³⁰Ehame Uʒijare ŋokâ Jotam e ŋicwofuŋ jume jara 20 eha Ela ŋokâ‐ticne Hoseazi Remaliare ŋokâ Peka râsi ecnehuc qâhâmorâ tucticne qarâ ŋicwofuŋ ewec.