1Eme Salomo e Israe jaŋere soŋaŋ micne, gurune gurune jaŋere femicnefâc â garikiŋ sâc jaŋere fekicnefâc Jerusalem haeo hetumaŋ‐jopawec, i Wofuŋte ʒâʒâfic katapa Dawidire hae, Zioŋ hâcne, irecnec miti ufuŋko bafeniŋte hefârec‐jopawec.
2Mosa 7, ʒâŋene Etanim ere dameŋ maickeme Israe ŋic sasawa jaŋe hombaŋ sâko ŋeniŋte ŋicwofuŋ Salomorao fisirâ tumaŋnembiŋ.
3Israe ŋic jaŋere soŋaŋ micne fisi‐fârepie tarame taha bapa jaŋe Wofuŋte ʒâʒâfic katapa bafaharerâ
4reŋkehuc bafembiŋ, erâ tutumaŋ qoruc boze â irec maŋnao wiac fowec i mâmâc rombiŋ. Taha bapa â Lewiŋic jaŋe reŋkembiŋ hâcne.
5Eme ŋicwofuŋ Salomo â Israe kikefuŋ erao tumaŋne‐fârembiŋ jaŋe sasawa ʒâʒâfic katapa bâniecnehuc lama â bulimakao bocjaha jâmbâŋ hezuc‐joparâ tahare biŋe râepie jaŋere ʒare wowosene me mamana‐fârene mi ewec.
6Eme taha bapa jaŋe Wofuŋte ʒâʒâfic katapa bafisirâ ficmaŋne ʒâŋene furu dindiŋ ira kerubim jahere fakec rurumaŋko ŋeŋe‐ticnao hepie ŋewec.
7Ehame kerubim jahe fafakec‐jekic ʒâʒâfic katapa ŋewec irec fainao qaratiepic. Ehuc ʒâʒâfic katapa â reŋwiac‐ticne i sâockepic hâcne.
8Reŋ jahec‐ticne ʒoricnere tofa‐jekic i ficmaŋne ʒâŋene furu dindiŋ irecnec fotâcnerâ ficmaŋne mamai ira ŋiczi hohonere sâc epic. Fic sahacnao hohonene i mi epic.
9Eme katapa irec maŋnao qorac tapa jajahec sawa fopic, wiac gâcne aricne. Jahe Mosezi Horebe tikio ira katapao râec‐jofawec. Israe ŋic jaŋe Aigita mâreŋ beherâ wahahapie Wofuŋzi jaŋehec ʒâʒâfic ewec irec qorac tapa hâcne. Eme jahe ira fopiczi fokopirec jaha.
10Eme taha bapa jaŋe furufickonec wahahapie karoraczi Wofuŋte ufuŋ fusucmawec.
11Irec taha bapa jaŋe karoracte gie‐jeŋic baniŋte quŋkembiŋ. Wofuŋte huriri qâreŋzi ufuŋ fusucmawec hâcne.
12Eme Salomozi ʒiŋuc muwec: “O Wofuŋ, go sambâŋko ʒoaŋ râemeŋ ŋekac, erâ gahac duŋdapâcko ŋeŋe juju ezore mukic.
13Irec go ʒira ŋeŋe juju ecmurâ ficsâko moc ʒâŋe biŋehec bagarepo, go irec maŋnao ŋeŋe juju erahuc juzemec sanaŋ.”
14Eme Israe kikefuŋ jaŋe woŋec doma‐fârehapie ŋicwofuŋzi fotikierâ jambuŋ‐jopawec.
15Jambuŋ‐jopahuc kecʒiŋuc muwec: “Wofuŋ, Israere Anutu, e mumbiaŋkezo. Eki hâcne mamac‐nane Dawidi dâŋ kecʒiŋuc âzâcnehuc fârine bâfuawec:
16‘No Israe ŋicfâc‐nane Aigita mâreŋkonec jowac‐jopape wahambiŋkonecteaŋ Israe gurune gurune jaŋerao ʒâŋe biŋe‐nane fuaocte fic moc baniŋte hae moc mi bâwosâepo. Aricne, no Dawidi e Israe ŋicfâc‐nane soŋaŋ‐jopaocte bâwosâepo.’
17Eme mamac‐nane Dawidi e Wofuŋ, Israere Anutu sâsehuc fic moc bacneocte maŋkehuc juwec.
18Wofuŋzi ine mamac‐nane Dawidi ʒiŋuc âzâcnewec: ‘Go ʒâŋe biŋe‐nanere fic moc bazo maŋkekic i honepe mamana biaŋne ekac.
19Erâ sifu go gahac mi bazemec. Aricne, ŋokâge moc fua‐gareocmu eki ʒâŋe biŋe‐nanere fic moc fuaocte bazejec.’
20Eme Wofuŋzi dâŋ muwec irec fârine bâfuawec wâc. No mamac‐nane Dawidi âkehockehuc Israere eri ŋeŋeo ŋekopac. I Wofuŋzi muwec irec sâc fuawec. Eme no Wofuŋ, Israere Anutu ere ʒâŋe biŋe fuaocte ufuŋ moc bapo hâcne.
21Eme Wofuŋzi mamacfâc‐nâŋec Aigita mâreŋkonec jowac‐jopa wahahuc jaŋehec ʒâʒâfic ewec ʒâʒâfic katapa irec ŋeŋe hae moc bâfuakopac hâcne.”
22Eme Salomo e Wofuŋte alata irec maŋfuŋko Israe kikefuŋ jaŋere maio domahuc meticne sambâŋkopec bafaharehuc qaratiewec.
23Ehuc ʒiŋuc muwec: “O Wofuŋ, Israere Anutu, sambâŋko me mâreŋko gore sâc Anutu moc mi jujâmbâŋkekac. Goki hâcne kiŋaŋŋicfâcge gore maio maŋ hâcbuc jueŋgopieŋ jaŋe maŋjauŋ fofo sanaŋ ejarehuc jaŋehec ʒâʒâfic emeŋ i mi hetâcneekic.
24Go kiŋaŋŋicge, mamac‐nane Dawidi hâcne, e findaŋdâŋ âzâcnemeŋ irec fârine bâfuameŋ. Go mârâc miczi dâŋ mumeŋ i miŋecgac megezi fârine bâfuakomec.
25O Wofuŋ Israere Anutu, go kiŋaŋŋicge mamac‐nane Dawidi findaŋdâŋ ʒiŋuc âzâcnemeŋ i mutec fârio qazejec: ‘Ŋokâfâcge jaŋe goki nore maio jumeŋ irec sâcko juhuc hata‐jeŋic aimuŋ jaha soŋaŋkehuc nore maio juniŋmuo ine noni mupe go ŋic moc Israere eri ŋeŋeo nore maio ŋeocte mi basacmu.’
26O Israere Anutu, go irec hâcne kiŋaŋŋicge, mamac‐nane Dawidi hâcne dâŋ âzâcnemeŋ i mutec sanaŋkezejec.
27“Jai, Anutu, go mâreŋko sâcne jucmu? Jâmbomac, sambâŋne sambâŋne jaŋe gore sâc mi ehapie go iŋucne sâkozi no fic ʒi bagarepo ira weniŋuc sâcne ŋeŋe juju ecmu?
28O Wofuŋ Anutu‐nane, go kiŋaŋŋicge no miŋecgac gore maio wira wâwâsic ekopac irec hazec râerâ nunumu‐nane manazemec.
29Go fic ʒirec ʒiŋuc mumeŋ: ‘I ʒâŋe‐nanere ŋeŋe hae ezejec’; irec go ŋafe ʒoaŋ sâc fic ʒira ʒâŋe fitec wahazejec â kiŋaŋŋicge no fic ʒira nunumu gie bahape mana‐narezemec.
30Kiŋaŋŋicge no me Israe ŋicfâcge nâŋe fic ʒira wâsicgupene goki faic sambâŋko ŋeŋe haegao juhuc nunumu‐nâŋec manarâ aki anonoc enârezemec.
31“Ŋic moczi âgo‐ticnerao bahac ŋemâcne bâfuame âgonezi mumupaŋ dâŋ muocte fânoc hecneme fic ʒira alatagere maŋfuŋko mumupaŋ dâŋ i muocte fisiocmuo
32ine goki faic sambâŋko juhuc dâŋjekic manarâ kiŋaŋŋic jahecge jahere mumutara gie bahuc ŋic hehesicne eebapa‐ticnere sâcko okacne râcnezemec â bahacmâc juwec e ine tiŋne juju‐ticnere sâcko akickezemec.
33“Israe ŋicfâcge jaŋe hehesic juhuc bugao bahapie go râsifâc‐jeŋic mana‐jaretec bawahac‐jopapie jaŋe maŋjeŋic bârisiehuc gorao risierâ ʒâŋege mutaniŋkehuc fic ʒira numu hefârec egareniŋmuo
34goki faic sambâŋko juhuc dâŋjeŋic manarâ sâqocne‐jeŋic mutâmire‐jarehuc kâcɋenefâc‐jeŋic mâreŋ jaremeŋ ira mocwâc râec‐jopazemec.
35“Jaŋe hehesic juhuc bugao bahapie goki sambâŋte motâc hetec hoe mi hehe mâc foocmu, eme goki bâtiŋ‐jopakomecte fic ʒira ʒâŋege mutaniŋkehuc sâqocne‐jeŋic beherâ nunumu gie baniŋmuo
36goki faic sambâŋko juhuc dâŋjeŋic manarâ kiŋaŋŋicge no â ŋicfâcge Israe nâŋere sâqocne mutâmirehuc mutec ŋicfâcge mâreŋ‐jeŋic biŋe qajaremeŋ ira hoe hezejec. Go iŋuc ehuc hata biaŋne âte raniŋte qazu‐jareekic hâcne.
37“Eme mâreŋ‐nâŋecko roroc me huc mimicne moc fuaocmu me nânâzi gieo hâmo qanʒaraŋ eocmu me hâpic me qokic guru sâko fisiniŋmu, me râsifâc‐nâŋec jaŋe fisirâ hae‐nâŋec moc somâ baniŋmu me wiac hâhâwicne me hucsâko moc fuaocmu
38me wiac hâhâwicnezi ru sâc buʒâic bâfua‐nâreme ŋic izi me izi me Israe ŋicfâcge sasawa nâŋe numu hefârec egarehuc fic ʒira menâŋec nunumuo sicne‐garenaŋmuo
39goki faic sambâŋko ŋeŋe haegao juhuc aki anonoc enârerâ ru sâc eebapa‐nâŋecte sâcko wiac enârezemec. Goki bucge mâreŋ ŋic sasawa maŋjeŋic hone taraekiczi maŋnâŋec honeekic wâc.
40Irec erâ nâŋe kâcɋenefâc‐nâŋec mâreŋ tahac‐jopameŋ ira jufenaŋmu sâc araŋ bagarehuc junʒepeneŋ.
41“Eme ŋic jaŋe ʒâŋe sâkoge â tâpiri ɋuŋɋasaŋgere biŋe mananiŋmu;
42ehame ŋic furune moc, Israe ŋicfâcge nâŋere guruo mi fuakicnezi mâreŋ ʒorickonec ʒâŋe biŋegere ehuc fisirâ fic ʒira nunumu gie baocmu
43ine goki faic sambâŋko ŋeŋe haegao juhuc dâŋticne manarâ wiac irec me irec numu‐gareme manacnezemec. Go iŋuc etec ŋic gurune gurune mâreŋ sâc juraŋgopieŋ jaŋe ʒâŋe biŋege manarâ Israe ŋicfâcge nâŋe araŋ bagareeŋgopeneŋ irec sâc jaha araŋ bagarehuc ʒiŋuc mananʒepieŋ: Fic bagarepo ʒira ʒâŋe biŋege fokac.
44“Eme go ŋicfâcge ira me ira sorec‐nâpotec râsifâc‐nâŋec jopanaŋte ʒikao rahuc hae sâko ʒi bâwosâemeŋ â ʒâŋe biŋege fuaocte fic bagarepo ʒirapec ʒâŋe fihuc gorao nunumu gie banaŋmuo
45goki faic sambâŋko juhuc numu hefârec dâŋnâŋec manarâ dopec‐nâpozemec.
46“Ŋic moczi hehesic tâmiric moc mi jukac, irec nâŋe hehesic moc bâfuarâ bugao banaŋmu ine goki aaric manahuc râsifâc‐nâŋec jaŋere meo râec‐nâpotec jaŋe mâreŋ‐jeŋic bembeŋko me ʒoricko fokac ira kâpâcwâruo bacnâpo raniŋmu.
47Eme nâŋe kâpâcwâruo râec‐nâpombiŋ mâreŋ ira maŋnâŋec bârisiehuc gorao risierâ numu hefârec egarehuc ʒiŋuc munaŋmu: ‘Nâŋe sâqorehuc sindaŋ â hehesic bâfuambeŋ.’
48Nâŋe iŋuc muhuc gorao risierâ râsifâc‐nâŋec kâpâcwâruo bacnâpo rambiŋ mâreŋ ira maŋ qâqâtâc‐nâŋec furu jaha gorao râehuc mâreŋ‐nâŋec kâcɋenefâc‐nâŋec tahac‐jopameŋ erâ hae sâko bâwosâemeŋ erâ ʒâŋe biŋege fuaocte fic bagarepo ʒirapec ʒâŋe fihuc nunumu gie gorao banaŋmuo
49goki faic sambâŋko ŋeŋe haegao juhuc numu hefârec dâŋnâŋec manarâ dopec‐nâpozemec.
50Erâ hehesic â qaqatara bâfuarâ bugao bambeŋ i mutâmire‐nâre‐fârerâ kâpâcwâru bacnâpombiŋ jaŋe ejaretec busâqoc mana‐nârenʒepieŋ.
51Wemocte, nâŋe gore ŋicfâc â biŋefâcge juŋgopeneŋ irec. Go Aigita mâreŋko aeŋ ʒocbâruŋ irec sâc ʒâic serereŋ maŋnao jumbeŋkonec bawefuc‐nâpomeŋ;
52irec kiŋaŋŋicge â ŋicfâcge nâŋe numu hefârec egarepene sâc nâŋerao ʒâŋe fihuc mana‐nârezemec.
53O Wofuŋ Anutu, goki hâcne ŋic gurune gurune mâreŋ sâc juraŋgopieŋ jaŋeraonec bâtâc bacnâporâ biŋefâcge bacnâpomeŋ; go kâcɋenefâc‐nâŋec Aigita mâreŋkonec bawefuc‐jopahuc kiŋaŋŋicge Mosere micko dâŋ râemeŋ irec sâcko wiac efâremeŋ hâcne.”
54Eme Salomo e Wofuŋte alata irec maŋfuŋko dieŋzi herâ meticne sambâŋkopec bâfeŋnehuc Wofuŋ numu hefârec ecnekume tarame faharewec.
Ŋicwofuŋ I 8
Ŋicwofuŋ I 8:1-54