1Eme Salomo e Aigita ŋicwofuŋ Farao ehec kikimo ehuc otâ‐ticne rowec. Erâ Dawidire haeo jowa fisirâ e jahacne fic erâ Wofuŋte ufuŋ â qânâsac hae râreckehuc baku batarawec.
2Jowa fisiwec dameŋ ira Wofuŋte ʒâŋere fic biac mi bambiŋte ŋic ŋokac jaŋe furu mâreŋko taha bâzi rike jumbieŋ.
3Salomore maŋzi Wofuŋtao domaha mamac‐ticne Dawidizi dâŋ mutâcnecnewec sâc wiac ebac ewec; mâc furu mâreŋko taha bâzi â hosâc âsu biaŋ ririke i ʒuhuckerâ ewec wâc.
4Eme ŋicwofuŋzi taha bâzi rikeocte Gibeoŋ haeo rarâ qowi bâzi 1 tauseŋ rikewec. Ira bâzi ririkere furu mâreŋ kâcɋene sâko fowec hâcne.
5Eme Wofuŋzi Gibeoŋ haeo Salomo guŋko fuacnehuc ʒiŋuc âzâcnewec: “No wemo wiac tahacgupemurâ egarekac i nazatec manape!”
6Eme Salomozi dâŋ ʒiŋuc âzâcnewec: “Go kiŋaŋŋicge mamac‐nane Dawidi maŋjauŋ sâko ecnehuc juhaŋtec gorao qohotahuc tiŋne â pectâc juhuc wiac ebac ewec. Iŋuc eme ʒuhuckerâ maŋjauŋ sâko jaha ecnehuc ŋokâ moc tahackemeŋ eki dameŋ ʒi eri ŋeŋe‐ticnao ŋehuc jukac.
7O Wofuŋ Anutu‐nane, ʒi ine kiŋaŋŋicge no enaretec mamac‐nane Dawidire tuc qarâ ŋicwofuŋ jukopac. Erâ no motec ɋâri juhuc ŋicwofuŋ giere fuŋne biac mi mana tarakopac.
8Erâ kiŋaŋŋicge no mac ʒi ŋicfâcge bâwosâec‐jopameŋ jaŋere ŋondeŋko domakopac. Jaŋe ŋic ŋokac guru sâko ʒare‐jeŋic fejâmbâŋkekacte ŋic moczi sâcne mi wosec‐jopaocmu.
9Irec go kiŋaŋŋicge nore maŋ mamanasu bâsokatec biaŋne â sâqocnere fuŋne hone tarahuc ŋicfâcge jaŋere dâŋ sâcne mutarazepac. Ŋicfâcge jaŋe guru sâko irec mozi dâŋjeŋic mutarame sâckeocmu?”
10Salomozi wiac iŋucnere Wofuŋ numucneme maname biaŋkewec.
11Irec dâŋ ʒiŋuc bâtikiecnewec: “Go mamana biaŋ rohuc mumutara gie fârine bacmurâ numu‐narehuc juju ʒoricne jufecmurâ me moneŋ mafa sâko rauckecmurâ me râsifâcge jaŋe hâmo sipiric eniŋmurâ mi numu‐naremec.
12Manakic, irec erâ nunumugere sâcko egarehuc maŋɋârâŋ â mamana sâko bâfua‐garepe izi ŋic mârâc jumbiŋ â ʒâhec jufeniŋmu jaŋere mamana sirickecmu.
13Eme wiac gâcnere mi numu‐naremec i wâc ʒuhuckerâ garepemu, moneŋ mafa sâko mecne erâ ʒâŋe biŋe sâko mâmâc. Irec gore dameŋko ŋicwofuŋ gâcne juniŋmu jaŋe gore sâc mi bâfuanʒepieŋ.
14Go nore hatao juhuc dâŋsanaŋ â sâcmutâc dâŋnane mamacge Dawidizi ewec irec sâc ehuc reŋkecmuo ine raŋɋa raŋɋa jambuŋguhuc jupemu.”
15Eme Salomozi ɋârerâ ʒiŋuc mana tarawec: Â, ʒi guŋ manakopac. Iŋuc muhuc Jerusalem haeo ferâ Wofuŋte ʒâʒâfic katapa irec maŋfuŋko domahuc qowi bâzi â wama bâzi wiac rikerâ fekicnefâc‐ticne tiwa bâzi ejarewec.
16Eme dameŋ ira sasec ŋokac jajahec jahe ŋicwofuŋ dâŋ âzâcnenicte erao rapic.
17Erâ ŋokac moczi ʒiŋuc âzâcnewec: “O bomboŋ‐nane, go dâŋ gazape manac: No â ŋokac kecʒi nâhe fic mocjahao ŋec foc eekoperec. Eme nâhe ira ŋehuc no motec moc ropo.
18Ehame ʒoaŋ gie bapa 3 tarame ŋokac kecʒi e motec moc rowec wâc. Nâhe fic ira bucjâmbâŋ‐nâhec jupec, ŋic me ŋokac moczi nâhehec moc mi jujâmbâŋkembiŋ.
19Eme ŋokac kecʒi e ŋafeo guŋ fohuc motec‐ticne fohâmowec.
20Erâ ŋafe ʒâŋiŋko faharerâ kiŋaŋ naruge no guŋ fohape nore motec nowac rorâ bumaŋ‐ticnao râewec â e jahacne motec hâmocne ine norao râewec.
21Eme hae fureme motec‐nane moŋ gumezore faharehuc honepe motec e hâmocne fowec. Ehame hae fure taniŋkeme hone‐hâmorâ ʒiŋuc mana tarapo: Motec keci e moc e noni mi ropo.”
22Iŋuc mume ŋokac âgo‐ticnezi muwec: “I burec, motec ɋâricne jukac e nore, gore motec ine hâmojec.” Mume âgonezi muwec: “Burec, nore motec e ɋâricne, â gore ine hâmojec.” Iŋuc muhuc ŋicwofuŋte maio mu qaqatarac epic.
23Iŋuc epire ŋicwofuŋzi dâŋ ʒiŋuc muhuc jasawec: “Moczi ʒiŋuc mukac: ‘Motec ɋâricne ʒi nore, â hâmocne i gore,’ â moczi ʒiŋuc mukac: ‘Aricne, hâmocne i gore, â ɋâricne i nore.’”
24Erâ ŋicwofuŋzi ʒuhuckerâ muwec: “Ajoc, sâqe sâko moc baware‐nareniŋ!” Eme sâqe moc râcnembiŋ.
25Eme ŋicwofuŋzi muwec: “Ajoc, ŋoŋe motec ɋâricne e ʒâʒâŋiŋ jaha qâfâuckerâ dâkâne ŋifec i ŋokac moc râcnehuc dâkâne ŋifec i âgo‐ticne râcneniŋ.”
26Iŋuc mume motec ɋâricnere neŋgoc e motec‐ticnere busâqoc fekicne manahuc ŋicwofuŋ ʒiŋuc âzâcnewec: “Bomboŋ‐nane iŋuc misac, sifu motec ɋâricne e râcneniŋ, qapie mi hâmooc!” Eme âgonezi ine ʒiŋuc muwec: “Eki me noni mi rauckezeperec irec qâfâuckeniŋ!”
27Eme ŋicwofuŋzi muwec: “Motec ɋâricne mi qâhâmoniŋ, ŋokac bâbâni dâŋ mujec e râcneniŋ, eki hâcne neŋgoc roro‐ticne ekac.”
28Eme Israe kikefuŋ jaŋe ŋicwofuŋzi dâŋ weniŋuc erâ mutarawec irec biŋe manarâ ere hâwic‐jopawec. Jaŋe ʒiŋuc honembiŋ: Anutuzi maŋɋârâŋ tahackewecte mumutara gie sâcne baocmu.
Ŋicwofuŋ I 3
Ŋicwofuŋ I 3:1-28