Ŋicwofuŋ I 2:13-27

¹³Eme Hagitire ŋokâ Adonia e Salomore neŋgoc Batisebarao fisime ʒiŋuc wiocnewec: “Go wamao warekic me?” Eme muwec: “Ine hâcne, no wamao fâkopac.”

¹⁴Erâ ʒuhuckerâ muwec: “No dâŋ piticne gazazo manasukopac.” Mume muwec: “Sâcne, mutec manape.”

¹⁵Eme muwec: “Israe kikefuŋ jaŋe ʒeŋgoma norao ʒâŋe fihuc no ŋicwofuŋ‐jeŋic jupemurâ muhapie uucmaŋ i nore biŋe ewec, i gahac manakomec; eme sifu Wofuŋzi maname fowecte ŋicwofuŋ gie nowac rohuc ɋananere meo râekicne.

¹⁶Eme ʒi nunumu mocjaha mac numu‐garepe dâŋnane mi qikiŋnezemec.” Iŋuc mume ʒiŋuc âzâcnewec: “Dâŋge mutec manape.”

¹⁷Eme muwec: “Go ŋicwofuŋ Salomo âzâcnetec eki Sunami ŋokac ʒâŋene Abisaga nareme ŋonâŋ‐nane ezac. Salomozi gore dâŋ mi qikiŋneocmu.”

¹⁸Eme Batisebazi dâŋ ʒiŋuc bâtikiecnewec: “Sâcne, no gore dâŋ i ŋicwofuŋ âzâcnepemu.”

¹⁹Eme Batiseba e Adonaire dâŋ i ŋicwofuŋ Salomo mufuacneocte ere ficko fewec. Feme ŋicwofuŋ e fahare ere maŋfuŋko rahuc fodapecnerâ risie eri ŋeŋe‐ticnao mocwâc waha ŋewec. Eme ŋicwofuŋ neŋgoc‐ticnere ŋeŋe moc bâfuarâ mefârenaopec hecnepie waha ŋewec.

²⁰Ehuc ʒiŋuc muwec: “No wiac piticnere mocjaha mac numu‐garepe dâŋnane mi qikiŋnezemec.” Eme ŋicwofuŋzi dâŋ ʒiŋuc bâtikiecnewec: “Neŋgoc‐nane, go dâŋge mutec manape, erâ wemocko qikiŋnepemu.”

²¹Iŋuc mume muwec: “Sunami ŋokac ʒâŋene Abisaga e hahacge Adoniare ŋonâŋ eocte sâcne râcnezo me mâcne?”

²²Eme ŋicwofuŋ Salomo e neŋgoc‐ticne dâŋ ʒiŋuc bâtikiecnewec: “Go Sunami ŋokac Abisagazi Adoniare biŋe eocte numu‐narekic, iŋuc jaha ŋicwofuŋ gie i erea eocte numu‐narenʒaŋ me! E hâcne hahac‐nane jukac, erâ taha bapa Abiata â Zerujare ŋokâ Joabe jahe wâc erao qohotakopirec.”

²³Ŋicwofuŋ Salomo e dâŋ iŋuc murâ Wofuŋte maio mupaŋkehuc kecʒiŋuc muwec: “Anutuzi baficnuhame Adoniazi dâŋ muwec irec okacne qape hâmozejec.

²⁴Anutuzi basanaŋnuhuc mamac‐nane Dawidire eri ŋeŋeo râecnurâ mupaŋkewec irec sâc uucmaŋ moc bâfua‐narewec ere maio musanaŋkekopac hâcne: Adonia e miŋecgac jaha hâmozejec.”

²⁵Iŋuc murâ ŋicwofuŋ Salomozi Jojadare ŋokâ Benaja soreme eki rarâ Adonia qâhâmowec.

²⁶Eme ŋicwofuŋ e taha bapa Abiata ʒiŋuc âzâcnewec: “Ajoc, go Anatoti hae mâreŋko giegaŋge fokac ira rac. Manakic, go hâmocte biŋe enʒaŋ. Eme sifu miŋecgac mi qâhâmocgupemu. Go mârâc jaha mamac‐nane Dawidire maio Wofuŋ Anuture katapa reŋkemeŋ, erâ ʒârâ hâriŋ faio juhame ehec mâmâc jumeŋ irec erâ akicgukopac.”

²⁷Salomozi iŋuc muhuc Abiata jâpeme Wofuŋte taha bapa ŋic mocwâc mi juwec. Ehame Wofuŋzi mârâc Silo haeo Elire kikefuŋfâc jaŋere findaŋdâŋ muwec i deŋkewec hâcne.