Ŋicwofuŋ I 18:4-29

⁴Irec Isebezi Wofuŋte porofetefâc qâhâmoc‐jopame Obadia e porofete 100 rocjoparâ bâfâuc‐jopame 50 guru jajahec epie qânâ hawecko soŋjoparâ nânâ opâ gumec‐jopahuc juwec.

⁵Eme Ahabazi Obadia ʒiŋuc âzâcnewec: “Nâhâc mâreŋ sasawa opâ ʒâŋe â opâwâc forakac i âte‐fârezeperec. Ehuc kecɋaŋ wiac moc bâfuanacmuo ine becâsic â doŋgifâc‐nâhec jaŋe sipirickenʒipiŋte bafic‐jopazeperec.”

⁶Iŋuc murâ mâreŋ âtenicte bâfâuckepic, ehuc Ahaba e ŋifec raha Obadiazi ŋifec rawec.

⁷Eme Obadia e hatao rahame Eliazi bâfuawec. Bâfuame Obadiazi hone tarahuc ʒâŋe maine mâreŋko hetutuckerâ muwec, “Bomboŋ‐nane Elia, i go gahac me?”

⁸Wiocneme muwec, “I no nahac hâcne. Irec go rarâ bomboŋge ʒiŋuc âzâcnec: ‘Manakic, Elia e fisijec.’”

⁹Iŋuc mume Obadiazi muwec, “Kiŋaŋ qaqage no wemo hehesic bâfuapo irec Ahabazi nuocte ere meo râecnukomec?

¹⁰Wofuŋ Anutuge e jujâmbâŋkekac, irec bomboŋ‐nanezi go basacguniŋte ŋicguru me uucmaŋ ira me ira kiŋaŋ sorec‐jopawec. Sorec‐jopame jaŋe wio‐jarepie mumbiŋ, ‘E ʒira mi jukac.’ Iŋuc mupie ine ŋicwofuŋzi uucmaŋ me ŋicguru i jaŋe ejareme mi bâfuacgumbiŋ i mupaŋkembiŋ.

¹¹Eme go ine nore mukomec, ‘Go rarâ bomboŋge ʒiŋuc âzâcnec: “Elia e fisijec.” ’

¹²Eme no rahape izia Wofuŋte Mârozi ira me ira wiac moc bacgu raocmu. Ehame no rarâ Ahaba âzâcnepe ware basacgu‐bipierâ no nuocmu. No ine ɋie‐naneonecteaŋ Wofuŋ araŋ bacne warehuc juekopac.

¹³Erâ Isebezi Wofuŋte porofetefâc qâhâmoc‐jopame noni ŋic 100 rocjoparâ bâfâuc‐jopape 50 guru jajahec epie soŋjoparâ nânâ opâ gumec‐jopahuc jupo i bomboŋ‐nane go mi manameŋ me?

¹⁴Ehuc mukomec, ‘Go rarâ bomboŋge ʒiŋuc âzâcnec: “Elia e fisijec.” ’ Iŋuc âzâcnepe e nuocmu!”

¹⁵Iŋuc mume Eliazi muwec, “No kiŋaŋ qacnehuc juekopac Anutu Tâpiri Ɋuŋɋasaŋ Wofuŋ e jujâmbâŋkekacte miŋecgac no nahac jâmbâŋ Ahaba fuacnepemu.”

¹⁶Iŋuc mume Obadiazi ra Ahaba bâfuarâ âzâcnewec. Âzâcneme Ahabazi Elia bâfuaocte rawec.

¹⁷Rarâ bâfuarâ ʒiŋuc muhuc âzâcnewec: “Israe ŋic maŋ bâsifuc ejareekic go hâcne me?”

¹⁸Iŋuc mume dâŋ ʒiŋuc bâtikiecnewec: “No Israe ŋic maŋ bâsifuc mi ejareekopac. Go â kikefuŋfâcge ŋoŋe hâcne Wofuŋte sâcmutâc dâŋ qâsuahuc Baali nemu kiŋaŋ qajarehuc Israe ŋic maŋ bâsifuc ejareeŋgopieŋ.

¹⁹Irec go dâŋ râetec rame Israe ŋic sasawa jaŋe Karamele tikio tumaŋnenʒepieŋ. Erâ Baali nemure porofetefâc 460 jaŋe mecne â Asera nemure porofetefâc 400, Isebere teboo nânâ nâeŋgopieŋ jaŋe mâmâc fisinʒepieŋ.”

²⁰Iŋuc âzâcneme Ahabazi Israe ŋic sasawa jaŋerao dâŋ râeme rawec. Ehuc Karamele tikio porofete hetumaŋ‐jopawec.

²¹Eme Elia e ŋic ŋokac sasawa maŋfuŋ‐jeŋicko rarâ jaza muwec, “Ŋoŋe ra qohota ware qohota eku wezimucko beheniŋmu? Wofuŋ e Anutu fârine jukacko e bâjâpeniŋ, me Baali e nemu fârine jukacko ine e bâjâpeniŋ.” Mume ŋic ŋokac jaŋe dâŋ moc mi bâtikiecnembiŋ.

²²Eme Eliazi ŋic ŋokac ʒiŋuc jazawec: “Wofuŋte porofete no mocjaha jâmbâŋ hetirine jukopac, Baali porofetefâc‐ticne juŋgopieŋ ine 450.

²³Ŋoŋe mupie bulimakao ŋicne jajahec nârec‐jofaniŋ. Eme jaŋe jaŋac moc rowosâerâ hezurâ dâkâne dâkâne ʒocfikio râenʒepieŋ, ehuc ʒoc ine qazepie mi ʒazejec. Ehame no ine bulimakao moc i hezurâ ʒocfikio wâc râepemu, ehuc ʒoc wâc qazepe mi ʒaocmu.

²⁴Ehame ŋoŋe nemu‐ŋeŋicte ʒâŋe wiranʒepieŋ â noni Anutu‐nanere ʒâŋe wirapemu. Eme wenizi manarâ ʒoc bâtikieme wahaocmu, ere Anutu me nemu fârine jukac muzo.” Iŋuc mume ŋic ŋokac mâmâc sasawa mumbiŋ, “Dâŋ i biaŋne.”

²⁵Eme Eliazi Baali porofetefâcne jazawec, “Ŋoŋe ŋic bocjaha, irec ŋoŋe bânierâ bulimakao bâwosâerâ baʒaweniŋ. Erâ nemu‐ŋeŋic ʒâŋe‐ticne wira wâwâsic ecnenʒepieŋ, â ʒoc ine mi qazenʒepieŋ.”

²⁶Mume jaŋe bulimakao jarekicne i rorâ hezu bâmoc embiŋ, erâ Baali ʒâŋe‐ticne wâsickehuc mumbiŋ, “O Baali micnâŋecko roc.” I furicte fuŋkembiŋzi wirahuc juhapie guŋpitic ewec. Eme dâŋmarac moc mi fuawec, â moczi moc micjeŋicko mi rowec. Jaŋe ine alata bakicne i teriŋ qahuc râreckehuc domambiŋ.

²⁷Eme guŋpitic maickeme Elia e mu âkebic ejarehuc muwec, “Samarierâ wiraniŋ me, wiac e nemu i! E mamanasu gie bahuc ŋekac mecne, me hata pitic rajec, me hae mocko rajec jukac, me guŋ fokacte wiwickezo.”

²⁸Mume jaŋe owa ruruckembiŋ, erâ mâsi‐jeŋic moc embiŋ ine ʒika sâqe â sânduzi sahac‐jeŋic hetâcnepie socjeŋic rucnewec.

²⁹Guŋ pitic dameŋ jâurume maŋsifuc hawari ehuc domahapie owâ giere taha bapa dameŋ bembeŋkewec. Eme sifu dâŋmarac moc mi fuawec, moczi micjeŋicko mi rowec, moczi dâŋjeŋic mi reŋkewec.