Ŋicwofuŋ I 17:2-14

²Ehame Wofuŋte dâŋzi Eliarao ʒiŋuc fuawec:

³“Mâreŋ ʒi beherâ ʒoaŋ wewefuopec rac, erâ opâ pitic moc ʒâŋene Keriti, ʒoaŋ wewefunaonec ware Jordaŋko hukac, ira soŋkezemec.

⁴Opâ i fia nâc ehuc juzemec, eme nânâ ine kâec kâec jaŋe bafisi garehuc juniŋte mupaŋke‐jarepac.”

⁵Eme e rahuc Wofuŋzi mutâcnecnewec irec sâcko ewec: Ra opâ pitic Keriti ʒoaŋ wewefunaonec ware Jordaŋko hukac, ira ŋec juc ewec.

⁶Eme kâec kâec jaŋe furicte poroŋ â qowi bafisi râcnehuc jumbiŋ â opâ ine fia nâc ehuc juwec.

⁷Eme hae mâreŋ sâc hoe moc mi hewecte opâ i piticne fofeku ʒickewec.

⁸Eme Wofuŋte dâŋ moc ra bâfuawec ine ʒiŋuc:

⁹“Ajoc, fahare Zarefati haeo rac, i Sidoŋ irec hae pitic moc, erâ ira ŋec juc ezemec. Manakic, no hae irec ŋokac hozec moc nânâ gumecguocte mupaŋkecnepac.”

¹⁰Iŋuc âzâcneme faharerâ Zarefati haeo rawec; rarâ haesac motâcko fisirâ honewec: Ŋokac hozec moc jâc haharine nusehuc juwec. Eme wiracnerâ muwec, “Opâ moc râqâcko fiarâ baware narec nâpe.”

¹¹Raha rahame mocwâc wirarâ muwec, “Poroŋ dâkâne mac moc mâmâc bawarezemec.”

¹²Eme dâŋ ʒiŋuc bâtikiecnewec: “Wofuŋ Anutugere maio mukopac, wiac ʒakicne moc mi fonarekac, poroŋ uucne kuʒio ŋenarekac ine me mocjahazi roronere sâc, erâ kiruŋko wokemaŋ kasaŋne mac ŋekac, iŋuc sawa. Ʒine hâcne ʒoc haharine nusekopac i ficko bararâ ruqepe ʒame motec‐nanehec nâhere poroŋ rikepemu. Eme i sawa nârâ ŋeku hâmonacmu.”

¹³Eme Eliazi âzâcnewec, “Mi hâwicguoc, ficgao rarâ mukomec iŋuc ezemec. Qanaŋ ine nore poroŋ piticne mac moc rikerâ baware naretec nâzepac, ehame ʒâhec motecgehec ŋahacne rike bâmoc ezemec.

¹⁴Wofuŋ, Israe ere Anutu, e ʒiŋuc mukac: Poroŋ kuʒio ŋekac i mi qosackeocmu, â wokemaŋ kiruŋko ŋekac i mi ʒickeocmu, tiwâne ŋehuc jaha juhame Wofuŋzi mume mâreŋko hoe hezokac.”