Ŋicwofuŋ I 17:10-24

¹⁰Iŋuc âzâcneme faharerâ Zarefati haeo rawec; rarâ haesac motâcko fisirâ honewec: Ŋokac hozec moc jâc haharine nusehuc juwec. Eme wiracnerâ muwec, “Opâ moc râqâcko fiarâ baware narec nâpe.”

¹¹Raha rahame mocwâc wirarâ muwec, “Poroŋ dâkâne mac moc mâmâc bawarezemec.”

¹²Eme dâŋ ʒiŋuc bâtikiecnewec: “Wofuŋ Anutugere maio mukopac, wiac ʒakicne moc mi fonarekac, poroŋ uucne kuʒio ŋenarekac ine me mocjahazi roronere sâc, erâ kiruŋko wokemaŋ kasaŋne mac ŋekac, iŋuc sawa. Ʒine hâcne ʒoc haharine nusekopac i ficko bararâ ruqepe ʒame motec‐nanehec nâhere poroŋ rikepemu. Eme i sawa nârâ ŋeku hâmonacmu.”

¹³Eme Eliazi âzâcnewec, “Mi hâwicguoc, ficgao rarâ mukomec iŋuc ezemec. Qanaŋ ine nore poroŋ piticne mac moc rikerâ baware naretec nâzepac, ehame ʒâhec motecgehec ŋahacne rike bâmoc ezemec.

¹⁴Wofuŋ, Israe ere Anutu, e ʒiŋuc mukac: Poroŋ kuʒio ŋekac i mi qosackeocmu, â wokemaŋ kiruŋko ŋekac i mi ʒickeocmu, tiwâne ŋehuc jaha juhame Wofuŋzi mume mâreŋko hoe hezokac.”

¹⁵Eme e rarâ Eliazi muwec sâc ewec. Eme Elia mecne, ŋokac mecne â wiacfâcne mecne, dameŋ ʒora nânâ mi basambiŋ.

¹⁶Kuʒio poroŋ mi qosackewec â kiruŋko wokemaŋ mi ʒickewec, Wofuŋte dâŋ Eliare mickonec wahawec i sanaŋkewec hâcne.

¹⁷Eme irec faicnao ŋokac fic rune ere ŋokâ e huc bawec. Erâ huc boc ŋemâckecneme jujunere sâc mi ewec.

¹⁸Eme ŋokac e Elia ʒiŋuc muhuc âzâcnewec: “O Anuture ŋic, go wemocte râsi enarekomec? Go kiŋ bahac‐nane manasupemurâ â ŋokâ‐nane ecnetec hâmoocte fisimec hâcne!”

¹⁹Iŋuc mume Eliazi âzâcnewec, “Ŋokâge narec.” Iŋuc murâ neŋgoc‐ticnere qickonec rorâ ficmaŋ faic e jahac fohuc juwec ira baferâ e jahacne fofoo râeme fowec.

²⁰Fohame Wofuŋ ʒiŋuc muhuc wâsickewec: “O Wofuŋ Anutu‐nane, no ʒira ŋokac hozec ehec jaba juhape go jâmbomac ŋokâ‐ticne qahuc wiac qeŋ bipinehec ʒi bâfuakomec.”

²¹Iŋuc murâ motecte faio arec jahec â moc waha foc fahac erâ ʒiŋuc muhuc Wofuŋ wâsickewec: “O Wofuŋ Anutu‐nane, go motec ʒirec qâqâtâc mocwâc bârisiec.”

²²Iŋuc numume Wofuŋzi Eliare dâŋ manawec. Ehame motecte qâqâtâczi mocwâc risieme ɋârewec.

²³Eme Eliazi motec rorâ ficmaŋ faic irecnec bawaharâ neŋgoc‐ticne râcnehuc muwec, “Honekic, ŋokâge jukac.”

²⁴Eme ŋokaczi Elia âzâcnehuc muwec, “Go Anuture ŋic â micgao dâŋ fokac i Wofuŋte dâŋ fârine i miŋecgac mana tarakopac.”