Än Salomon Köl 7:1-11

¹En nöün king föpwül, a fokun öch pecheöm lon ipwom sus. Sengesengen wänükum a usun chök chipwechipwen fau aüchea, förien eman mi silelap.

²Iwe, pwuom a wewe ngeni eu kap mi ur ren wain mi anö, nge lukom a wewe ngeni eu chukun föün wiich, kiop ra nom pwelin ünükün.

³Oupwum kewe ra usun chök apanen chia lippwe.

⁴Iwe, üom a usun chök eu imw tekia a för seni ngiin äläfan, nge mesom ra usun chök ekewe nomun Hespon arun ewe asamalapen Pat Rappim. Pwötum a wewe ngeni ewe imw tekia won Lepanon mi nom awenewenen Tamaskus.

⁵Mökürom a wenetä usun chök ewe chuk Karmel, meten mökürom a sapwilitiu, nge anüan a usun chök parachol. Iwe, ewe king a fif ren meten mökürom.

⁶En mi wor tongom me rei, en ka fokun liöch, a fokun mürina amwararen om tong.

⁷Iwe, ka üwenewenetä usun chök efoch nü, nge oupwum ra wewe ngeni uan.

⁸Iwe, üpwe tötä won ewe irä palm o kini uan. Oupwum a usun chök umwun föün wain me rei, nge pwonnen ngasangasom a usun chök pwonnen apel.

⁹Awom a usun chök wain mi mürina a mitimit le oromala, lupwen a achöchönü tinawei me ngii.

¹⁰Aüküki me ren ätewe mi wor tongan me rei ngang nöün, nge i a chök positiei.

¹¹Kopwe etto, en mi wor tongom me rei, pwe sipwe feila lemäl o pwinipwin lon ekewe sop.