Än Salomon Fos 8:2-31

²A ütä won ewe leni tekia lükün ewe al, a ütä ia ekewe al ra chufengen me ie.

³A leüömong le kökkö me lükün asamalapen tittin ewe telinimw lon ewe lenien tolong,

⁴“Üa kökkö ngeni ämi mwän, üa leüömongetä ngeni aramas meinisin won fanüfan.

⁵Ämi chon miritimang, oupwe kaiö mirit, ämi chon tiparoch, oupwe kaiö tipachem.

⁶Oupwe aüseling, pun üpwe fos won mettoch mi aüchea, üpwe aiti ngenikemi mine a pwüng.

⁷Üpwe apasa mine a let, pun üa fokun oput kapas chofana.

⁸Ai kewe kapas meinisin ra pwüng, esap wor rikirik ika pwor lor.

⁹Ai kapas ra wenechar me ren chokewe mi wewe ren, ra pwal pwüng me ren chokewe mi silelap.

¹⁰Oupwe angei ai kewe kapasen öüröür, nge ousap angei silifer, oupwe pwal aücheani silelap, lap seni kolt mi mürina.

¹¹Pun ngang tipachem üa mürina seni fau aüchea, nge meinisin mine oua efich esap nönnö ngeniei.

¹²Ngang tipachem, mi wor rei mirit, üa silelap le eäni kapasen öüröür mi pwüng.

¹³Eman mi niuokusiti ewe Samol mi Lapalap a oput mine a ngau. Üa oput lamalamtekia me sikesik, pwal föför mi ngau me kapasen atuputup.

¹⁴Üa eäni ewe tufichin öüröür me alefila met mi pwüng, a wor ai sile, a pwal wor ai pöchökül.

¹⁵Üa alisi ekewe king lon ar nemenem, üa pwal alisi ekewe sounemenem pwe ra föri allük fän pwüng.

¹⁶Üa alisi ekewe samol lon ar nemenem, pwal ekewe aramas tekia lon ar nemeni fanüfan.

¹⁷Üa echeni chokewe mi echeniei, nge chokewe mi achocho le küttaei repwe künaei.

¹⁸Pisekisek me iteüöch ra nom rei, pwal wöü mi chök nonomola me feiöch.

¹⁹Uai a mürina seni kolt, fokun seni kolt mi mürina, mine oua angei seniei a mürina seni silifer mi fokun mürina.

²⁰Üa fetal won ewe al mi pwüng, üa pwerela won ewe lenien fetal mi wenechar,

²¹üa atoto wöü won chokewe mi echeniei o aurala ar lenien iseis.

²²Iwe, lepoputän an angang ewe Samol mi Lapalap a föriei, a akom le föriei me lomlom mwen mettoch meinisin.

²³A anomuei seni me lomlom, üa akom mwen fanüfan esamwo wor.

²⁴Üa uputiu lupwen esamwo wor matau, lupwen esamwo wor ekewe puächen koluk mi puächemong.

²⁵Üa uputiu mwen ekewe chukutekia me ekewe chutekison resamwo nom lon lenier,

²⁶mwen än Kot föri fanüfan me ekewe tanipin won, ika mwen an föri pwül moromor.

²⁷Üa fen nom, lupwen Kot a anomu ekewe läng lon lenier, lupwen a föri lefilen matau me aropen ilen,

²⁸lupwen a anomu ekewe kuchun fän läng, lupwen a anüküchara ekewe puächen koluk lon ekewe lenien alolol,

²⁹lupwen a föri kiännin matau, pwe ekewe sät resap tolong won fanü. Üa fen nom, lupwen a föri longolongun fanüfan.

³⁰Üa nom ren Kot usun eman sousile angang, ngang popun an pwapwa iteiten rän. Üa meseik me fän mesan fansoun meinisin,

³¹üa meseikeiti unusen an we fanüfan, üa pwapwa ren ekewe aramasen fanüfan.