Än Salomon Fos 3:14-30

¹⁴pun ewe feiöch a angei seni tipachem a mürina seni ewe feiöch a angei seni silifer, nge ewe win tipachem a atoto a aüchea seni kolt.

¹⁵Tipachem a aüchea seni fau aüchea, nge esap wor och ka fokun efich epwe tongeni nönnö ngeni.

¹⁶Tipachem a tongeni fang ngonuk manauatam, pisekisek me iteüöch.

¹⁷Tipachem a tongeni awora pwapwa lon manauom o emweni ngonuk kinamwe.

¹⁸Tipachem epwe aworato manau ngeni chokewe mi kamwöch won, nge chokewe mi fitipacheiti ra pwapwa.

¹⁹Ewe Samol mi Lapalap a föri fanüfan ren an tipachem, a anomu ekewe läng lon lenier ren an silelap.

²⁰Lon an tipachem a föri pwe ekewe lenien puächen koluk ra puächetä, nge ekewe kuchu ra apüngätiu üt.

²¹Nei, kopwe kamwöch won tipachem me mirit, nge kosap mwüt ngeniir repwe sü senuk.

²²Repwe awora manau ngonuk, repwe usun chök epa mwärämwär me fän üom.

²³Mürin, kopwe fetal won om al fän kinamwe, nge pecheöm esap chepetek.

²⁴Ika kopwe konola, kosap niuokus, ika kopwe möür, kopwe möür fän kinamwe.

²⁵Kosap niueiti och riaföü mi amairü epwe müttirituk, ika och feiengau epwe tori ekewe aramasangau.

²⁶Pun ewe Samol mi Lapalap epwe om apilükülük, epwe tümwünü pecheöm pwe esap tup lon eu sär.

²⁷Kopwe eäni kirikiröch ngeni aramas mi osupwang, lupwen ka tufich ngeni.

²⁸Kosap üreni chon arum, “Kopwe feila o liwinsefälito lesor, mürin üpwe ngonuk mine ka tüngor,” nge a fen nom reöm ewe mettoch.

²⁹Kosap ekiekietä föför mi ngau ngeni chon arum mi nom ünükum, nge i a fokun lükülükuk.

³⁰Kosap anini ngeni eman aramas nge esap wor popun, are esap föri och mi ngau ngonuk.