Än Salomon Fos 30:2-26

²Ellet, ngang eman mi fokun tiparoch lap seni aramas meinisin, esap wor rei än eman aramas mirit.

³Üsap kaiö tipachem, esap pwal wor ai silei usun Ewe mi Unusen Pin.

⁴Iö a feitä läng o liwinsefälitiu? Iö a tongeni kumwuchufengeni asepwäl? Iö a tongeni üfätä ekewe koluk lon echö üf? Iö a förätä kiännin fanüfan meinisin? Ifa itan? Nge ifa iten nöün we mwän? Kopwe üreniei are ka silei!

⁵Än Kot kewe kapas meinisin ra let. I a usun chök eu tittin maun fän iten chokewe mi op ren.

⁶Kosap apacha och ngeni an kewe kapas, pwe esap apwünguk, nge epwe pwä pwe en eman chon chofana.

⁷Ai Kot, ruu mettoch üa tüngor senuk, kosap amwöchüür seniei mwen ai üpwe mäla:

⁸Kopwe alisiei pwe üsap eäni kapas atuputup me kapas chofana. Kosap mwüt ngeniei ai üpwe wöüngau ika wöümong, nge kopwe chök ngeniei enei mongö iteiten rän.

⁹Pun are üpwe fokun mötüla, üpwe tongeni amamäsinuk o apasa, “Iö na ewe Samol mi Lapalap?” Nge ika üpwe wöüngau, üpwe solä o atoto itengau won iten ai Kot.

¹⁰Kosap aturumwäli eman chon angang ngeni an samol, pun epwe ottekiik, nge en kopwe angei liwinin om we föför.

¹¹Mi wor aramas ra otteki semer, resap pwal kilisou ngeni iner.

¹²Mi wor aramas ra ekieki pwe ra püsin limöch, nge ra fokun limengau.

¹³Mi wor aramas ra chök fetaläsengeseng, won meser a pwä pwe ra lamalamtekia.

¹⁴Mi wor aramas ra chök ariaföüü ekewe chon wöüngau me chon mwelele lein ekewe aramas, pwe repwe pisekisekila ren. Ei lapalap ra föri pwe repwe manau seni.

¹⁵Och sokun pweechar mi ünümi cha a wor ruoman nöün föpwül. Ir me ruoman ra kökkö, “Ngeniei, ngeniei.” Mi wor rüanü mettoch resap fokun tongeni menemenöch:

¹⁶Ewe lenien sotup, eman fefin mi rit, fanü esap menemenöch ren püngün üt, pwal ekkei esap tongeni ükütiu le küri mettoch.

¹⁷Eman mi urumwotei saman o aleasolap ngeni inan, ekewe ängä repwe alusawu föün mesan, nge ekewe machang iter wolcher repwe ochei fitukan.

¹⁸Rüanü mettoch ra kon amwarar ngeniei, pwe üsap tongeni weweitiir:

¹⁹Usun än eman ikel äkkäs fän läng, usun än eman serepenit tö won eu achau, usun än efoch sip sai won mataulap, pwal usun lapalapen än eman alüal tongei eman föpwül.

²⁰Iei usun föförün eman fefin mi kirikiringau ngeni pwülüan: A lisowu ngeni pwal eman, a tütü o apasa, “Üsap föri och mi ngau.”

²¹Mi wor rüanü mettoch fanüfan esap pwäk ngeni:

²²Eman amanau mi tolong lon wisen king, eman chon tiparoch a wor anan mongö pwe a tongeni möt,

²³eman fefin esap wor eman a tongei, nge a pwüpwülü, pwal eman chon angang fefin mi siwili an samol fefin lon wisan.

²⁴Mi wor rüanü mwichen man won fanüfan ra men kükün, nge ra fokun tipachem:

²⁵Ekewe molus, ir eu mwich mi apwangapwang, nge ra amolätä ener mongö lon fansoun räs.

²⁶Ekewe man iter pächer, ir eu mwich esap pöchökül, nge ra föri lenier lon ekewe achau.