Än Salomon Fos 29:6-25

⁶Eman aramas mi ngau a fif lon püsin an tipis, nge eman aramas mi pwüng a köl o mwänek.

⁷Eman chon pwüng a ekieki met ekewe chon mwelele repwe eäni pwüng ren, nge eman aramasangau esap ekieki usun ei.

⁸Chon turunufas ra afitikokoi chon eu telinimw, nge aramas mi tipachem ra akinamwela song.

⁹Are eman aramas mi tipachem a anini ngeni eman mi tiparoch, ewe mi tiparoch a chök song ika takir, nge esap wor kinamwe.

¹⁰Aramas mi mochen niela aramas ra oput eman esap wor an tipis o kütta met repwe niela ekewe chon pwüng ren.

¹¹Eman aramas mi tiparoch a fokun songokai, nge eman aramas mi tipachem a engila fän mosonoson.

¹²Are eman sounemenem a aüseling ngeni pworaus mi mwäl, nöün kewe nöüwis meinisin repwe aramasangau.

¹³Eman aramas mi wöüngau me eman mi ariaföüü aramas ra wewefengen lon ei lapalap: Ewe Samol mi Lapalap a aneneloi meser me ruoman pwe repwe küna mwer.

¹⁴Are eman king a eäni kapwüng ngeni ekewe chon wöüngau fän wenechar, an nemenem epwe nüküchar fansoun meinisin.

¹⁵Efoch wok me kapasen fön ra atoto tipachem, nge eman semirit, esap wor eman a apwüngü, epwe atoto säw won inan.

¹⁶Lupwen ekewe aramasangau ra nemenem, tipis a lapalapala, nge ekewe chon pwüng repwe nenengeni usun ar turutiu.

¹⁷Kopwe apwüngü noum, pwe i epwe akinamweek, epwe pwal apwapwai lelukom.

¹⁸Anaie esap wor kapasen osuni ie, ekewe aramas ra chök förfetalei mine ra mochen. Nge feiöchün eman aramas mi aleasochisi än Kot kewe allük.

¹⁹Kosap tongeni apwüngü eman chon angang ren kapas chök, pun inamwo ika a weweiti om kapas, nge esap mochen aleasochisi.

²⁰Ka fen küna eman aramas mi müttir le fos? Ka tongeni apilükülükü eman chon tiparoch lap seni ena sokun aramas.

²¹Eman mi nöüwechen ngeni nöün chon angang seni lekükünün, lon eu rän ewe chon angang epwe wöüni wöün.

²²Eman aramas mi nisosong a afisätä fitikoko, nge eman mi songokai a tolong lon chomong tipis.

²³Eman aramas mi lamalamtekia epwe küna tekison, nge eman aramas mi tekison epwe küna iteüöch.

²⁴Eman aramas mi chonäni eman chon solä a oput püsin manauan. Epwe küna liwiningau, are a pwärätä mine a let lon kapwüng. Nge are esap pwärätä, Kot epwe anümamaua.

²⁵Om niuokusiti aramas, iei eu sär fän itom, nge are ka apilükülükü ewe Samol mi Lapalap, kosap feiengau.