Än Salomon Fos 25:5-24

⁵Kopwe asüela ekewe aramasangau seni fän mesen ewe king, mürin mwün epwe nüküchar fän pwüng.

⁶Kosap püsin atekiokotä fän mesen ewe king ika tolong lon lenien ekewe mi lap.

⁷Pun a mürina än eman epwe ürenuk, “Kopwe mot pekitä,” lap seni än eman epwe amotok fan me fän mesen eman aramas tekia.

⁸Kosap müttir uwalong lon kapwüng mine mesom a küna. Pun met kopwe föri lesopolan, lupwen chon arum a pwärätä pwe ka mwäl.

⁹Kopwe aför ngeni püsin chon arum won osukosuken lefilemi, nge kosap pwärawu mine a monomon ren eman.

¹⁰Pun are ka pwärawu, om säw me itengau esap müchüla, lupwen aramas ra rongorong pwe ka pwärawu mine a monomon.

¹¹Eu kapas eman a apasa lon fansoun fich a usun chök ekewe föün ringo mi oleol usun kolt mi nom lon eu sepi seni silifer.

¹²Eu kapasen fön seni eman mi mirit ngeni eman mi mochen aüselinga a usun chök efoch ring seni kolt ika usun eu fout seni kolt mi fokun mürina.

¹³Eman chon künö mi allükülük a akinamwei ätewe mi tini, usun chök koluk mi patapat a akinamwei eman, lupwen a pwichikar lon fansoun kinikin.

¹⁴Eman mwän mi pwon pwe epwe fangala och, nge esap föri, a usun chök kuchu me asepwäl, nge esap pwüng üt.

¹⁵Eman samol a tongeni tup ren än eman mi tipepos kapas, nge kapas pwetete ra tongeni ataela än eman ü ngenikich.

¹⁶Are ka küna chönün chunen, kopwe chök ün ükükün mine a tufich ngonuk, pun are ka kon mötüla ren, kopwe musäsinawu.

¹⁷Kosap feila fän chomong lon imwen chon arum, pwe esap osukosuk reöm o oputok.

¹⁸Eman aramas mi eäni kapas chofana usun chon arun a usun chök efoch nifötüföt, ika efoch ketilas, ika efoch föün esefich mi ken.

¹⁹Ach apilükülükü eman aramas, esap allükülük lon fansoun osukosuk, a usun chök efoch ngi man ra eni, ika efoch peche mi ter.

²⁰Eman aramas mi köl ngeni eman mi weires letipan a usun chök eman mi angei seni üfan lon fansoun patapat, pwal usun eman mi uwalong salt lon eu kinas.

²¹Are chon oputom a echik, kopwe amongöü, nge are a kaka, kopwe aünü,

²²pun are ka föri iei usun, säw epwe küri usun ekkei a kürikich, nge ewe Samol mi Lapalap epwe ngonuk liwinin.

²³Usun asepwälin efeng a atoto üt, ina usun luapas a atoto wowongau.

²⁴Än eman nom lepwokukun ungen eu imw a mürina seni an epwe nom lon eu imw ren eman fefin mi lalapat.