Än Salomon Fos 24:16-31

¹⁶Pun inamwo ika eman chon pwüng a turula fän fisu, a chök pwätäsefäl. Nge feiengau epwe tori ekewe aramasangau.

¹⁷Kosap meseik ren chon oputom, lupwen a tolong lon feiengau, kosap pwal pwapwa, lupwen a chepetek.

¹⁸Pun ewe Samol mi Lapalap epwe küna o oput ei lapalap, epwe pwal asepa an song seni ätewe.

¹⁹Kosap öürek pokiten ekewe chon föföringau, kosap pwal lolowo ngeni ekewe aramasangau.

²⁰Pun ekewe chon föföringau esap wor ar apilüköch ngeni ewe fansoun mwer, nge manauen ekewe aramasangau epwe müchüla.

²¹Nei kopwe niuokusiti ewe Samol mi Lapalap o asamolu ewe king, nge kosap chiechi ngeni chokewe mi ü ngeniir.

²²Pun feiengau epwe müttir toriir. Nge iö a tongeni silei ewe mäfeiengau epwe feito seni Kot me ewe king?

²³Ikkei pwal ekoch mwiitun seni ekewe mi tipachem: A ngau ngeni eman soukapwüng an epwe lifilifil aramas lon kapwüng.

²⁴Are a apasa ngeni ewe chon tipis pwe esap wor an tipis, ekewe aramas meinisin repwe otteki o oputa.

²⁵Nge ekewe soukapwüng mi apwüngü ekewe chon tipis repwe fefeitä o iteüöch.

²⁶Eman mi pälüeni chienan fän wenechar, iei asisilen ar pwipwiöchfengen fän let.

²⁷Kopwe akomwen amolätä o fotuki om kewe tanipi, pwe epwe wor mine kopwe manau seni, mürin na kopwap aüetä imwom o popuetä eu famili.

²⁸Kosap pwärätä mettoch mi ngau usun chon arum nge esap wor popun, kosap pwal apasa kapas atuputup usun.

²⁹Kosap apasa, “Ngang üpwe föri ngeni ewe aramas usun mine a föri ngeniei. Üpwe liwini ngeni won ükükün mine a föri ngeniei.”

³⁰Üa fetal ünükün än eman chon chipwang tanipi, üa fetal ünükün eu tanipin wain än eman aramas esap wor an mirit.

³¹Iwe, üa küna pwe ewe tanipi a kula ren iräfölüföl, ewe pwül a pwölüla ren pötöwölingau, nge tittin we tittin fau a sönüla.