Än Salomon Fos 21:5-11

⁵Aramas mi akota ar angang o achocho le föri repwe pisekisek, nge chokewe mi chök müttir föri ar angang, nge resap akota me mwan, repwe wöüngau.

⁶Pisek aüchea eman a angei ren an kapas chofana a usun chök ötüöt mi ässila, pwal usun chök eu särin mäla.

⁷Än ekewe aramasangau angangen mwänewüs a püsin afeiengaueer, pun resap mochen föri mine a pwüng.

⁸Ekewe chon tipis ra fetal won efoch al mi pwor, nge chokewe esap wor ar tipis ra föri mine a pwüng.

⁹Än eman nonom lepwokukun ungen eu imw a mürina seni an epwe nom lon ei imw ren eman fefin mi lalapat.

¹⁰Ekewe aramasangau ra chök mochen föri mine a ngau, resap eäni tong ngeni chon arur.

¹¹Lupwen eman chon turunufas a angei liwinin an föför, ekewe chon wewemang ra tipachemela. Nge lupwen eman chon tipachem a angei an öüröür, a fefeitä lon an silelap.