Än Salomon Fos 21:12-30

¹²Kot ewe mi pwüng a silei mine a fis lon imwen ekewe aramasangau, epwe awarato feiengau wor.

¹³Eman mi pinei selingan seni än ekewe chon wöüngau siö epwe püsin siö, nge esap wor eman epwe rongorong.

¹⁴Eu lifang eman a fangala lemonomon a amasösöü song, nge eu lifangen amichimich mi fis lemonomon a amasösöü lingeringer.

¹⁵Ekewe chon pwüng ra pwapwa lupwen pwüng a fisitä, nge chokewe mi föri mine a ngau ra rükö.

¹⁶Eman aramas mi likitala mirit epwe nom lein chon mäla.

¹⁷Eman mi sani ekewe pwapwan fanüfan epwe chök eman chon wöüngau, nge ätewe mi sani wain me löpokus esap pisekisek.

¹⁸Mine ekewe aramasangau ra ekiekin ariaföüü ngeni ekewe chon pwüng epwe püsin küür.

¹⁹Än eman aramas nonom lon fanüapö a mürina seni an epwe nom ren eman fefin mi lalapat me nisosong.

²⁰Lon imwen chon tipachem a wor pisek mi aüchea me löpokus, nge ekewe chon tiparoch ra fangesoroula pisekir.

²¹Eman mi eäni pwüng me kirikiröch epwe manauatam, epwe küna pwüng me iteüöch.

²²Eman meilapen sounfiu mi tipachem a töpworalong lon telinimwen ekewe chon pwora o ataetiu ewe leni mi pöchökül ra anomu ar apilükülük won.

²³Eman mi tümwünü kapasen awan a tümwünü inisin seni osukosuk.

²⁴Eman aramas mi lamalamtekia me sikesik, itan chon turunufas, i ätewe mi föri an föför fän lamalamtekia.

²⁵Än eman aramas chipwang le angang a eselipa ngeni mäla.

²⁶Eman chon chipwang a chök ekieki fansoun meinisin met epwe wor ren, nge ewe chon pwüng a fangala, nge esap kichingau.

²⁷Ewe Samol mi Lapalap a oput än eman aramasangau asor, nge a lapala an oput, lupwen a uwato an asor fän iten och ekiek mi ngau.

²⁸Eman chon pwärätä mi chofana epwe feiengau. Nge eman aramas mi aüselingafichi epwe eäni kapas wenechar iteiten fansoun.

²⁹Eman aramasangau a wopwora, nge eman aramas mi wenechar a ekieköchü usun mine epwe föri.

³⁰Än aramas tipachem, mirit me kapasen öüröür resap tongeni üpalü ngeni ewe Samol mi Lapalap.