Än Salomon Fos 20:21-28

²¹Eman aramas mi angakaii wöün me won saman esap feiöch sopolan.

²²Kosap apasa pwe kopwe liwini ngeni eman chappen an föför mi ngau. Kopwe witiwit ngeni ewe Samol mi Lapalap, i epwe alisuk.

²³Ewe Samol mi Lapalap a oput aramas mi eäni ruu sokun föün kilo, nge eu kilo mi mwäl a ngau me ren.

²⁴Ewe Samol mi Lapalap a akota än eman aramas fetal. Ifa usun än eman aramas epwe tongeni weweiti ewe al a fetal won?

²⁵Kopwe ekiekifichi me mwen om kopwe pwon ngeni Kot och asor. A tongeni fis pwe kopwe liamam me mürin.

²⁶Eman king mi tipachem a tongeni asila iö a föri mine a ngau. Epwe apwüngü ekewe aramasangau, nge esap eäni tong.

²⁷Ngünün eman aramas a usun chök eu lamp seni ewe Samol mi Lapalap, a atittina minen leutuch meinisin.

²⁸Eman king epwe nonom lon wisan lon ükükün fansoun a nemenem fän wenechar, pwüng me kirikiröch.