Än Salomon Fos 20:2-21

²Än eman king lingeringer a usun chök wörüwörün eman laion, nge eman mi asonga a püsin afeiengaua manauan.

³Eman aramas a iteüöch ren an esap atolonga lon fitikoko, nge ekewe chon tiparoch ra müttir anini.

⁴Eman chon chipwang esap tuw pwül lon fansoun fich, epwe kütta anan mongö lon fansoun räs, nge esap künakün.

⁵Ekiekin letipen eman aramas a usun chök koluk mi alolol, nge eman aramas mi weweöch a tongeni üfiretä.

⁶Chomong aramas ra apasa usun püsin ir pwe ra eäni kirikiröch. Nge iö a tongeni küna eman mi wesewesen allükülük?

⁷Eman mi wenechar o föri mine a pwüng, nöün kana ra feiöch.

⁸Eman king mi mot won an lenien mot o eäni kapwüng a tongeni asila mine a ngau, lupwen a küna.

⁹Iö a tongeni apasa, “Üa limeti lelukei, üa limöch seni ai tipis kana?”

¹⁰Ewe Samol mi Lapalap a oput aramas mi eäni ruu sokun föün kilo me ruu sokun aükük.

¹¹Pwal lapalapen manauen eman semirit a pwä ren an föför, ika a limöch o pwüng lon mine a föri.

¹²Ewe Samol mi Lapalap a föri selingach pwe sipwe tongeni rongorong, me mesach pwe sipwe tongeni künakün.

¹³Kosap sani mömöür pwe kosap wöüngauala, kopwe nennela o angang pwe epwe wor anom mongö mi somwola.

¹⁴Ewe chon kamö a lalapat fansoun meinisin pwe liwinin ewe mettoch a kon watte, nge lupwen a feila ekis, a sikesik won mine a möni pwe a kisikis liwinin.

¹⁵Mi wor kolt me chomong fau aüchea, nge kapasen silelap eföü fau mi wesewesen aüchea.

¹⁶Kopwe angei üfen ätewe mi pwon pwe epwe mönätiu än eman wasöla liwinimang, kopwe amwöchü pwe asisilen an pwon ngeni eman chon ekis.

¹⁷Eman aramas a angei anan mongö fän atuputup a annö ngeni, nge mürin, ewe möngö epwe usun chök chari me lon awan.

¹⁸Kopwe föri om akot wesin om angei öüröürom. Are kopwe feila maun, kopwe akomwen angei om öüröür.

¹⁹Eman aramas mi luapas a pwärätä mine a monomon, iei mine kosap chiechi ngeni eman mi kapas chomong.

²⁰Eman aramas mi otteki saman ika inan epwe mäla usun eu lamp a kunula lupwen fansoun rochokich.

²¹Eman aramas mi angakaii wöün me won saman esap feiöch sopolan.