Än Salomon Fos 19:3-22

³Püsin än eman aramas tiparoch a aworato an feiengau, nge mürin a tip ngeni ewe Samol mi Lapalap.

⁴Eman aramas mi wöümong a wor chomong chiechian, nge chiechien eman mi wöüngau ra likitala.

⁵Eman chon pwärätä mi apasatä mine a mwäl lon kapwüng epwe fokun angei liwinin an föför, nge eman mi kapas chofana esap tongeni sü seni liwinin an föför.

⁶Chomong ra kütta cheniir me ren ekewe aramas tekia, nge meinisin ra chiechi ngeni eman mi fangafangöch.

⁷Eman mi wöüngau a küna koput me ren pwin kana, nge epwe fen ifan me ren chiechian kewe? A kökköla mürir, nge ra chök sü seni.

⁸Eman mi angei tipachem a echeni püsin i, nge eman mi eäni mirit epwe fefeitä.

⁹Eman chon pwärätä mi apasatä mine a mwäl lon kapwüng epwe fokun angei liwinin an föför, nge eman mi kapas chofana epwe feiengau.

¹⁰Esap öchiti eman mi tiparoch pwe epwe fokun pisekisek, nge esap fokun öchiti eman amanau pwe epwe nemeni samol.

¹¹Mirit a alisi eman aramas pwe epwe mang ngeni song, nge eman a iteüöch are esap ekieki mine eman a föri ngeni.

¹²Än eman king lingeringer a usun chök wörüwörün eman laion, nge an ümöümöch a usun chök amurenipwin won ekewe fetil.

¹³Eman nau mi tiparoch a atoto feiengau won saman, nge än pwülüen eman mwän souanini a usun chiin üt mi püng fochofoch.

¹⁴Eman mwän a tongeni angei imwan me pisekin me won saman, nge ewe Samol mi Lapalap chök a tongeni awora eman pwülüan mi mirit.

¹⁵Chipwang a eselipato möürüchou, nge eman aramas esap mochen angang epwe echik.

¹⁶Eman aramas mi aleasochisi än Kot allük a tümwünü manauan, nge eman mi turunufasei an kapas epwe mäla.

¹⁷Eman aramas mi kichiöch ngeni chon wöüngau a fangala ngeni ewe Samol mi Lapalap, nge i epwe liwini ngeni liwinin an föför.

¹⁸Kopwe apwüngü noum ät, lupwen a chüen kükün, pwe a mecheres an epwe kaiö mirit, nge kopwe tümwünüfichi pwe kosap wichi tori an epwe mäla.

¹⁹Eman aramas mi songokai epwe püsin angei liwinin. Nge are ka mochen akinamwela, epwe chök lapala an song.

²⁰Kopwe aüseling ngeni kapasen öüröür o etiwa kapasen fön, pwe kopwe tipachem lon kan fansoun repwe feito.

²¹Eman aramas a ekiekietä chomong mettoch lon lelukan, nge mine ewe Samol mi Lapalap a apwüngala epwe fisitä.

²²Eman aramas a itengau ren an tipemong, nge eman mi wöüngau a mürina seni eman chon chofana.