Än Salomon Fos 19:15-28

¹⁵Chipwang a eselipato möürüchou, nge eman aramas esap mochen angang epwe echik.

¹⁶Eman aramas mi aleasochisi än Kot allük a tümwünü manauan, nge eman mi turunufasei an kapas epwe mäla.

¹⁷Eman aramas mi kichiöch ngeni chon wöüngau a fangala ngeni ewe Samol mi Lapalap, nge i epwe liwini ngeni liwinin an föför.

¹⁸Kopwe apwüngü noum ät, lupwen a chüen kükün, pwe a mecheres an epwe kaiö mirit, nge kopwe tümwünüfichi pwe kosap wichi tori an epwe mäla.

¹⁹Eman aramas mi songokai epwe püsin angei liwinin. Nge are ka mochen akinamwela, epwe chök lapala an song.

²⁰Kopwe aüseling ngeni kapasen öüröür o etiwa kapasen fön, pwe kopwe tipachem lon kan fansoun repwe feito.

²¹Eman aramas a ekiekietä chomong mettoch lon lelukan, nge mine ewe Samol mi Lapalap a apwüngala epwe fisitä.

²²Eman aramas a itengau ren an tipemong, nge eman mi wöüngau a mürina seni eman chon chofana.

²³Ach niuokusiti ewe Samol mi Lapalap a emwenikich ngeni manau. Eman mi eäni ei niuokus epwe asösö fän kinamwe, nge esap wor feiengau epwe tori.

²⁴Mi wor aramas ra kon chipwang, ra atolonga pöür lon ewe sepien mongö, ra mwo nge chipwang ar repwe uwalong ewe mongö lon awer.

²⁵Kopwe wichi eman chon turunufas, pwe ekewe chon wewemang repwe kaiö mirit. Kopwe apwüngü eman chon weweöch, pun epwe fefeitä lon an silelap.

²⁶Eman aramas mi angei wöün saman fän pöchökül o asüela inan, i eman nau mi atoto säw me itengau wor.

²⁷Nei, are kopwe ükütiu le aüselinga ekewe kapasen öüröür, mürin kopwe pwal müttir tümwününgau ngeni mine ka fen sile.

²⁸Eman chon pwarätä mi ngau a turunufasei pwüng, nge ekewe aramasangau ra efich pwüngingau.