Än Salomon Fos 18:5-24

⁵Esap mürina ach sipwe echeni eman aramasangau ika ach sipwe arikala pwüngün kapwüng seni eman esap wor an tipis.

⁶Än eman chon tiparoch kapas a afisätä anini, nge ren an kapas a atoto an epwe angei wichiwich.

⁷Eman chon tiparoch a püsin feiengau ren kapasen awan, nge an kewe kapas eu sär fän äsengesin.

⁸Än eman chon luapas kapas ra usun chök elülü mongö mi fokun annö, ra tolong leutun eman aramas.

⁹Eman mi chipwang ngeni an angang a pwipwi ngeni eman mi atai mettoch.

¹⁰Iten ewe Samol mi Lapalap a usun chök eu imw tekia mi pöchökül, ewe chon pwüng a sälong lon o küna manau.

¹¹Nge ekewe chon pisekisek ra ekieki pwe wöür a tümwünüür seni feiengau, usun chök eu tit mi tekia o pöchökül a epeti eu telinimw seni feiengau.

¹²Eman aramas a lamalamtekia mwen feiengau epwe tori, nge tipetekison a akom mwen iteüöch.

¹³Are eman aramas a pälüeni mwen esamwo rongorong, ina an tiparoch epwe pwal säw.

¹⁴Eman aramas mi apilüköch lupwen an samau a tongeni manau. Nge are eman a apilükingau, ese tongeni pwäk.

¹⁵Eman aramas mi mirit a fefeitä lon an silelap, nge eman mi tipachem a aü selingan ngeni kapasen silelap.

¹⁶Än eman aramas lifang a wäsi alan pwe epwe tongeni churi ekewe aramas tekia.

¹⁷Eman mi akomwen fos lon kapwüng, aramas ra ekieki pwe a pwüng tori ewe chon pälüeni a feito o pälüeni an kapas.

¹⁸Pwüngün üttüt a aükätiu anini o awesi fitikoko lefilen ruoman mi pöchökül.

¹⁹Eman pwipwi mi fön letipan a weires ach sipwe liapeni, lap seni ach liapeni eu telinimw mi pöchökül. Nge kapasen anini ra pöchökül usun chök pöchökülen lokkun asamen imwen king.

²⁰Eman aramas a wisen manau ren eselipäen kapasen awan.

²¹Mine eman aramas a apasawu seni awan a eselipä ngeni, iei mine chokewe mi efich fofos repwe angei liwinin.

²²Eman mi küna eman pwülüan a küna eu mettoch mi mürina o angei ümöümöch me ren ewe Samol mi Lapalap.

²³Lupwen eman chon wöüngau a tüngor, a eäni kapas pwetete, nge eman chon wöümong a eäni kapas pälüen mi pöchökül.

²⁴Eman aramas mi chomong chiechian a tongeni fetal ngeni feiengau, nge mi wor eman chiechian a kan ngeni, lap seni wesewesen pwiin.