Än Salomon Fos 16:1-26

¹Eman aramas a tongeni ekiekietä mettoch lon lelukan, nge mine epwe apasa a feito seni ewe Samol mi Lapalap.

²Eman aramas a ekieki pwe meinisin mine a föri a pwüng, nge ewe Samol mi Lapalap a apwüngü ekiekin letipan.

³Kopwe lükü ngeni ewe Samol mi Lapalap om angang, pwe mine ka ekiekietä epwe fisiöch.

⁴Mettoch meinisin ewe Samol mi Lapalap a föri a wor sopolan, nge sopolan ekewe aramasangau repwe feiengau.

⁵Ewe Samol mi Lapalap a oput chokewe meinisin mi lamalamtekia. A fokun let pwe repwe angei liwinir.

⁶Kot epwe amusala tipisin eman aramas mi eäni kirikiröch me allükülük, nge ren än eman niuokusiti ewe Samol mi Lapalap a kul seni mine a ngau.

⁷Are än eman aramas föför a apwapwai ewe Samol mi Lapalap, i epwe pwal föri pwe chon oputan repwe kinamwe ngeni.

⁸A mürina ach sipwe wöükükün fän pwüng, lap seni watten ach moni tolong fän pwüngingau.

⁹Eman aramas a ekiekietä lon letipan mine epwe föri, nge ewe Samol mi Lapalap a emweni lon an föför.

¹⁰Eman king a kapas fän an manaman seni Kot, esap mwäl won mine a apwüngala.

¹¹Ewe Samol mi Lapalap a mochen pwe aramas repwe nöünöü kilo me aükük mi pwüng me föün kilo mi pwüngüöch.

¹²Ekewe king ra oput föför mi ngau, pun mwür a longolong won pwüng.

¹³Eman king a fokun pwapwa ren kapas wenechar, a echeni ätewe mi apasa mine a let.

¹⁴Än eman king lingeringer a usun chök eman chon künö mi uwato pworausen mäla, nge eman mi mirit a tongeni amanasösötiu an lingeringer.

¹⁵Wopwapwan won mesen eman king iei asisilan pwe mi wor manau, an ümöümöch a usun chök ekewe kuchu mi apüngätiu ütten mwen leres.

¹⁶Ach sipwe eäni tipachem a mürina seni ach eäni kolt, nge ach eäni silelap a mürina seni ach eäni silifer.

¹⁷Ewe alelap ekewe chon wenechar ra aleni a rik seni föför mi ngau, nge ätewe mi tümwünü alan a tümwünü manauan.

¹⁸Lamalamtekia a akom mwen feiengau, nge tunosikesik a akom mwen än eman tur.

¹⁹A mürina ach sipwe tipetekison o nom lein ekewe chon wöüngau lap seni ach sipwe nom lein chon lamalamtekia o angei liapach seniir.

²⁰Eman mi aüselinga än Kot kewe kapas epwe fefeitä, nge eman mi anomu an apilükülük won ewe Samol mi Lapalap epwe feiöch.

²¹Eman mi tipachem lon letipan a iteni eman mi mirit, nge afalafal mürina a awatteela än eman silelap.

²²Tipachem eu puächen manau ngeni chokewe mi eäni tipachem, nge tiparoch a atoto apwüng ngeni ekewe mi umwes.

²³Ekiekin letipen eman mi tipachem a afisätä an afalafal mirit o awattela an kapasen kait.

²⁴Kapas pwetete ra usun chök chönün chunen, ra arar ngeni eman aramas o apöchöküla inisin.

²⁵Eman aramas a ekieki pwe ewe al a fetal won a pwüng, nge lesopolan ewe al a ale ngeni mäla.

²⁶Eman chon angang a achocho le angang pokiten an mochen mongö, an echik a pesei ngeni.